«ۇزدىك تاجىريبەلەر ورتالىعىنىڭ» ەڭ باستى ەرەكشەلىگى قوعامعا، ادامعا بەيىمدەلگەن باستاپقى مەديسينالىق-سانيتارلىق كومەكتى جۇزەگە اسىرۋ،- دەيدى مەكەمەنىڭ باس دارىگەرى جانار وسپانوۆا.
«ءبىزدىڭ باستى ماقساتىمىز باستاپقى كومەكتى حالىققا قولجەتىمدى جانە ساپالى ەتۋ. سوعان بايلانىستى ءبىز ءۇش ءپرينسيپتى قولداندىق. ءبىرىنشىسى، ەمحانادا كەزەك كۇتتىرمەي مەديسينالىق قىزمەت الۋ، ول ءۇشىن بۇكىل قىزمەتتەردى ەلەكتروندى دەنساۋلىق ساقتاۋ جۇيەسىنە 100% وتكىزىپ، ناۋقاستار ۇيدە وتىرىپ دارىگەردىڭ قارالۋىنا جازىلا الادى. ودان بولەك QR كودتار ارقىلى جازىلا الادى. وسى ارقىلى ءبىز اۋرۋحاناعا كەلەتىن ناۋقاستاردىڭ ساعاتتاپ كەزەككە كۇتۋىن جويدىق. ەڭ باستىسى وسى ەلەكتروندى جۇيە ارقىلى تۇرمىستىق سىبايلاس جەمقورلىق جويىلدى»، – دەپ ءتۇسىندىردى اۋداندىق اۋرۋحانانىڭ باس دارىگەرى جانار مىقتىبەك قىزى.
ەمحاناداعى تاعى ءبىر ەرەكشەلىك، كەلەتىن بارلىق ناۋقاستاردىڭ باعىتىن انىقتاۋ. ياعني، ساۋ ناۋقاستاردى اۋرۋ ناۋقاستاردان اجىراتۋ. دەنى ساۋ، سكرينينگ-پروفوسموترعا كەلەتىن ناۋقاستاردى جاسىل ايماققا قاراي، ال كونسۋلتاسيالىق، دياگنوستيكالىق ەم الۋعا كەلگەن ناۋقاستاردى سول جاققا، سارى ايماققا باعىتتالعان. جەكە جەدەل مەديسينالىق كومەكتى قاجەت ەتەتىن ناۋقاستاردى قىزىل ايماققا ورنالاستىرىپ، 10 مينۋتقا دەيىن مەدكومەك كورسەتىلىپ، ناۋقاستاردىڭ ومىرىنە ءتونىپ تۇرعان ءولىم ءقاۋپىن ازايتىپ، جاعدايىن تۇراقتاندىرىپ، رەانيماسيا بولىمىنە جاتقىزادى.
ەسكەرە كەتەتىن تاعى ءبىر جايت، جاڭا جوبا جۇزەگە اسا باستاعاننان كەيىن مەركى اۋدانىندا العاشقى مەديكو-سانيتارلىق كومەككە تۇسەتىن شاعىمدار 80% ازايعان.
اۋرۋحاناعا كەلگەن ناۋقاستى ءار جەرگە جىبەرىپ، كۇتتىرىپ جۇرمەيتىندەي، سۇراعىن شەشىپ كەتۋگە تولىق جاعدايلار جاسالعان.
وبلىستا «Premy Health Care» ۇلتتىق اسسوسياسياسىمەن بىرگە العاشقا مەديسينالىق كومەك كورسەتەتىن ۇيىمدارعا جاڭا تەحنولوگيالاردى ەنگىزۋ بويىنشا جۇمىستار جۇرگىزىلگەن. جاڭا تەحنولوگيالار الەۋمەتتىك ينتەرگاسيالانعان تۇردە ادامدارعا، تۇرعىندارعا كومەك كورسەتۋگە باعىتتالعان. ونىڭ باستى ەرەكشەلىگى ەمدەۋ مەكەمەلەرىندەگى جۇمىس الەۋمەتتىك سالالارمەن تىعىز بايلانىستى. «ۇزدىك تاجىريلەر ورتالىعىنا» قۇندى اپپاراتتى ورناتۋ ارقىلى ادام اعزاسىنداعى سۋ، بەلوك، ماي، سالماق سىندى بارلىعى جيىرمادان استام ءتۇرىن انىقتاۋعا مۇمكىندىك بەرىلگەن.
«اۋرۋ قايدان پايدا بولادى؟ بارلىق ماسەلە وتباسىندا. ادامدار دۇرىس تاماقتانبايدى، الەۋمەتتىك جاعدايى قالاي، وتاعاسى ىشىمدىك ءىشۋى مۇمكىن، وتباسىنداعى پسيحيكالىق جاعداي ناشار بولۋى مۇمكىن دەگەندەي. سوندىقتان، ءاربىر ۋچاسكەدەگى الەۋمەتتىك قىزمەتكەر اۋىرىپ كەلگەن وتباسىعا ارنايى پورترەت جاسايدى، ول جەردە قانداي پروبلەما بار، اۋرۋدىڭ قايدان شىققانى، سەبەبى دەگەن سياقتى ءتۇرلى ماسەلەلەر قاراستىرىلىپ، باعالانادى. سوسىن سول الەۋمەتتىك ماسەلەلەر ارقىلى، اكىمدىك ارقىلى كومەك كورسەتۋ نەمەسە وتباسىنداعى ادامدارمەن، اتا-اناسىمەن جۇمىس جاساۋ دەگەن سياقتى جۇمىستار اتقارىلادى. الەۋمەتتىك قىزمەتكەرلەر دەگەنىمىز ارنايى دايىندىقتان وتكەن ماماندار. ولاردىڭ باستى ماقساتى ءوز ۋچاسكەسىندەگى ءاربىر وتباسىنىڭ الەۋمەتتىك جاعدايىن باعالاۋ. مىسالى، اكەسى مەن اناسى جۇمىسسىز بولسا، اكىمدىككە شىعىپ، جۇمىس تاۋىپ بەرۋگە، ااك تاعايىنداۋعا، ءوزىنىڭ زاڭدىق قۇقىعىن بىلمەيتىن تۇرعىندارعا ءتۇسىندىرۋ جۇمىسىن جۇرگىزۋدى جۇزەگە اسىرادى. وسى جاڭا جوبانى قوسىمشا تاعى ءتورت اۋداندا جۇزەگە اسىرعالى جاتىرمىز. قورداي، رىسقۇلوۆ، تالاس اۋداندارى جانە شۋ قالالىق ەمحاناسىندا. بىزگە باستى قولداۋ كورسەتىپ وتىرعان «Premy Health Care» ۇلتتىق اسسوسياسياسى. ولار بىزگە ناقتى مامانداردى بەرىپ، قالاي ۇيىمداستىرۋ كەرەك، قىزمەتكەرلەردىڭ بىلىكتىلىگىن ارتتىرۋ، ولاردى وقىتۋ، ادامي كاپيتالعا ينۆەستيسيا جاساۋ سىندى ۇلكەن ماسەلەلەردى بىرلەسە شەشىپ جاتىرمىز»، -دەدى جامبىل وبلىسى دەنساۋلىق ساقتاۋ باسقارماسىنىڭ باسشىسى اسەت قالييەۆ.
مەكەمەدە ارنايى جاستار ورتالىعى دا اشىلعان. وعان 14 پەن 29 جاس ارالىعىنداعى كەز كەلگەن جاستار قاتىسا الادى. سپورتپەن شۇعىلدانىپ، پسيحولوگتىڭ كومەگىن تەگىن الىپ قانا قويماي، سپيرتتىك ىشىمدىكتەردىڭ زيانى، دۇرىس تاماقتانۋ سىندى كوپتەگەن كەڭەس-ماعۇلماتتاردى دا تىڭداي الادى. مامانداردىڭ سوزىنشە، ورتالىق اشىلعالى ءۇش مىڭعا جۋىق ادام كەلىپ، قاجەتتى كومەگىن العان.
