بەلگىلى جۋرناليست كوسەمالى ءساتتىباي ۇلى جەلىدە ۋتيلسبورعا قاتىستى پىكىر ءبىلدىرىپ، ەسكى كولىك مىنگەن ەل ازاماتتارى جول اپاتىنا ءجيى ۇشىراپ، مەرت بولىپ جاتقانىن ايتىپ، دابىل قاقتى.  

بيلىك ۋيلسبوردىڭ جاڭا ءتاريفى 1 مامىردان باستاپ كۇشىنە ەنەدى دەگەن ەدى. ءبىراق ءالى كۇنگە دەيىن حالىقتىڭ قالتاسىن ۋتيلسبور دەگەن اتپەن بەلگىلى بۇرىنعى توناۋ جالعاسىپ كەلەدى.

مامانداردىڭ ايتۋىنشا، قازاقستان – اۆتوكولىكتىڭ باعاسى ەڭ قىمبات مەملەكەت.

مىسالى، قازاقستاندا 2022 جىلى شىققان جانە قوزعالتقىشىنىڭ كولەمى 2،8، ال باعاسى 10 000 اقش دوللارى بولاتىن اۆتوكولىكتىڭ كەدەندىك راسىمىنە 8760 اقش دوللارىن تولەۋ كەرەك ەكەن. ەكەۋىن قوسقاندا، الگى اۆتوكولىك قازاقستان تۇرعىنىنا بارلىعى 18 760 اقش دوللارىنا تۇسەدى.

ال گرۋزيادا ءدال وسىنداي اۆتوكولىكتىڭ كەدەندىك راسىمىنە 784 اقش دوللارىن تولەيدى. ناتيجەسىندە گرۋزيا ازاماتى جاڭا اۆتوكولىكتى 10 784 اقش دوللارىنا ساتىپ الا الادى.

ق ر پرەزيدەنتى قاسىم-جومارت توقايەۆ بيىلعى جولداۋىندا وسى «ۋتيلسبور» دەگەننىڭ ماسەلەسى حالىقتىڭ جانىنا باتقانى تۋرالى ايتىپ، ونى قايتا قاراۋ جونىندە تاپسىرما بەرگەنى بەلگىلى.

وسىدان كەيىن، ياعني 23 اقپاندا ۆيسە-پرەمەر رومان سكليار ۋتيلسبوردىڭ باعاسى 50% تومەندەيدى دەگەن بولاتىن. ونىمەن قويماي، جاڭا باعا بويىنشا الىم ناۋرىزدا باستالاتىنىن ايتقان ەدى. ءبىراق سكلياردىڭ ۋادەسى كەيىن مامىرعا سىرعىتىلدى.

ءالى ناتيجە جوق. وسىنداي نەمقۇرايدىلىقتىڭ سالدارىنان ەل اۆتوپاركى توزىپ، قالا ەكولوگياسى ناشارلاپ كەتتى. جول – ترانسپورت وقيعالارى كوبەيىپ، ول اپاتتاردان ادام ءولىمى جيىلەدى.

اينالايىن دەپۋتاتتار، قۇداي تىلەۋلەرىڭدى بەرسىن، وسى ماسەلەنى ترانسپورت سالاسىنا جاۋاپتى  ارىپتەستەرىڭە ايتىپ، تەكسەرتىپ، زەرتتەتىپ، قاراپايىم حالىقتىڭ ۋتيلسبور دەگەن توناۋدان ابدەن زارەزاپ بوپ قينالىپ بىتكەنىن پرەزيدەنت پەن ۇكىمەت باسشىسىنا جەتكىزىڭىزدەرشى.