Bilik ýilsbordyń jańa tarifi 1 mamyrdan bastap kúshine enedi degen edi. Biraq áli kúnge deiin halyqtyń qaltasyn ýtilsbor degen atpen belgili burynǵy tonaý jalǵasyp keledi.
Mamandardyń aitýynsha, Qazaqstan – avtokóliktiń baǵasy eń qymbat memleket.
Mysaly, Qazaqstanda 2022 jyly shyqqan jáne qozǵaltqyshynyń kólemi 2,8, al baǵasy 10 000 AQSh dollary bolatyn avtokóliktiń kedendik rásimine 8760 AQSh dollaryn tóleý kerek eken. Ekeýin qosqanda, álgi avtokólik Qazaqstan turǵynyna barlyǵy 18 760 AQSh dollaryna túsedi.
Al Grýziiada dál osyndai avtokóliktiń kedendik rásimine 784 AQSh dollaryn tóleidi. Nátijesinde Grýziia azamaty jańa avtokólikti 10 784 AQSh dollaryna satyp ala alady.
QR Prezidenti Qasym-Jomart Toqaev biylǵy Joldaýynda osy «ýtilsbor» degenniń máselesi halyqtyń janyna batqany týraly aityp, ony qaita qaraý jóninde tapsyrma bergeni belgili.
Osydan keiin, iaǵni 23 aqpanda vitse-premer Roman Skliar ýtilsbordyń baǵasy 50% tómendeidi degen bolatyn. Onymen qoimai, jańa baǵa boiynsha alym naýryzda bastalatynyn aitqan edi. Biraq Skliardyń ýádesi keiin mamyrǵa syrǵytyldy.
Áli nátije joq. Osyndai nemquraidylyqtyń saldarynan el avtoparki tozyp, qala ekologiiasy nasharlap ketti. Jol – transport oqiǵalary kóbeiip, ol apattardan adam ólimi jiiledi.
Ainalaiyn depýtattar, Qudai tileýlerińdi bersin, osy máseleni transport salasyna jaýapty áriptesterińe aityp, teksertip, zerttetip, qarapaiym halyqtyń ýtilsbor degen tonaýdan ábden zárezap bop qinalyp bitkenin Prezident pen Úkimet basshysyna jetkizińizdershi.
