قازاق ادەبيەتىندە قازداي تىزىلگەن تاۋ تۇلعالى الىپتارىمىزدىڭ ءومىر جولىنا كوز جۇگىرتسەك، ءوزىنىڭ قالىپتاسۋىنا ىقپال ەتىپ، ەل قۇرمەتىنە بولەنۋگە جول سىلتەگەن ۇستازىنا دەگەن ىقىلاسى ەرەكشە. ويتكەنى ادام بالاسىنىڭ ومىردەن ءوز ورنىن تابار ازامات بولۋىنا اتا-انانىڭ ىستىق ىقىلاسى مەن ولشەۋسىز ەڭبەگىنەن كەم كۇش جۇمسامايتىن تۇلعانىڭ ءبىرى ۇستاز ەكەنى دە داۋسىز. اتا-بابالارىمىزدان جالعاسقان سارا جولدىڭ پارقىن ءبىلىپ، ونى ءقادىر تۇتار وسكەلەڭ ۇرپاق تۇرعاندا بۇل مەكتەپ ەشقاشان ۇزىلمەيدى. قايتا ونىڭ جاڭارىپ، جاڭعىرعان زامان لەگىمەن جاڭاشا قىرىنان دامىپ وتىراتىنى انىق.
بۇگىندە كوزىنەن جالىن وتىنىڭ ۇشقىنى سەزىلگەن تالاي شاكىرتتىڭ قىرانداي كوك اسپاندا ەركىن سامعاۋىنا جول اشىپ، عىلىم اتتى الەمنىڭ قاسيەتتى تابالدىرىعىنان نىق اتتاۋىنا سەبەپكەر بولىپ جۇرگەن تۇلعالى ازاماتتىڭ ءبىرى – قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، پەداگوگيكا عىلىمدارىنىڭ دوكتورى، قازاقستان جازۋشىلار جانە جۋرناليستەر وداقتارىنىڭ مۇشەسى، پروفەسسور باقتيار ءورىسباي ۇلى سمانوۆ. ارينە، وسىنشاما عىلىمي جانە لاۋازىمدىق اتاق-دارەجەسىنە قاراپ، كەز-كەلگەن جاس ول كىسىگە العاشىندا شاكىرت بولۋعا جۇرەكسىنەرى ءسوزسىز. دەسە دە، باقتيار ءورىسباي ۇلى كىشىلىكتى كىسىلىكتەن جوعارى قويا بىلگەن پاراسات يەسى. عىلىمداعى ورنى قانشالىقتى بيىك دەسەك، شاكىرتكە دەگەن سىيلاستىق قارىم-قاتىناسى مەن ادامگەرشىلىك ىزگى قاسيەتى دە اق باستى الاتاۋدىڭ شىڭىنداي اسقاق.
اكادەميك باقتيار سمانوۆتىڭ ءومىر جولىنىڭ ءوزى كەيىنگى ۇرپاققا ءتالىم بەرەرلىك ونەگەگە تولى. بۇگىندە وزبەكستان رەسپۋبليكاسىنىڭ تاشكەنت وبلىسىنا قارايتىن بوستاندىق اۋدانىنداعى «جاڭا اۋىل» ەلدى مەكەنىندە 1952 جىلى دۇنيەگە كەلگەن ول تۋعان اۋىلىنان تۇلەپ ۇشىپ بيىك ماقساتتارعا قول جەتكىزە ءبىلدى. اعايدىڭ ايتۋى بويىنشا اكەسى ءورىسباي اتامىز دا سانالى عۇمىرىن ۇستازدىققا ارناپ، اۋىل بالالارىنىڭ ساۋاتىن اشىپ، ولاردىڭ ەل ەرتەڭىنە اينالار سانالى ازامات بوىپ قالىپتاسۋىنا ولشەۋسىز ۇلەس قوسقان. تۋعان اۋىل حالقىنا ۇلاعاتتى ۇستاز رەتىندە سىيلى بولعان اكەنى وزىنە ۇلگى تۇتقان باقتيار اعاي دا وسى جولدى تاڭداپ، ونى ءوزىنىڭ قالىپتاسۋ جولىنداعى ارمانىنىڭ باسپالداعى ەتكەنى انىق. «قىران ۇيادا نە كورسە، ۇشقاندا سونى ىلەدى»، – دەپ اتا-بابالارىمىز ايتىپ كەتكەندەي، وتباسىنداعى اكەنىڭ جارقىن بەينەسى بولاشاق اكادەميكتىڭ قالىپتاسۋىنا ايرىقشا ىقپال ەتتى.
ورتا مەكتەپتى بىتىرگەن سوڭ، ۇكىلەگەن ارمان جەتەگىنە ەرىپ، سول ۋاقىتتا قارا دومالاق اۋىل بالالارىنىڭ قولى جەتە بەرمەيتىن اسەم قالا الماتىنىڭ تورىنەن ورىن تەپكەن س.م.كيروۆ اتىنداعى (قازىرگى ءال-فارابي اتىنداعى قازاق ۇلتتىق) قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسەدى. جاستايىنان كوركەم ادەبيەتكە جانى قۇمار، تالانتتى جاس بۇل جەردە بىلىكتى ۇستازداردان ءتالىم الىپ، ءبىلىم قورىن ودان ءارى تەرەڭدەتەدى.
باقتيار اعايمەن وڭاشادا ۇستاز بەن شاكىرت بولىپ اڭگىمە-دۇكەن قۇرا قالساق، اعايدىڭ سوناۋ وتكەن عاسىرداعى ستۋدەنتتىك جىلدارىنا ساپار شەگىپ قايتامىز. اسرەسە، سول ۋاقىتتا وزىنە ءدارىس بەرگەن كەڭەس وداعىنىڭ باتىرى مالىك عابدۋللين اعامىزعا ەرەكشە توقتالىپ، ول كىسىمەن وتكىزگەن ۋاقىتتارىن ەسىنە العاندا اعايدىڭ جانارىنان باتىرعا دەگەن ىنىلىك جانە شاكىرتتىك شەكسىز قۇرمەتتى بايقايتىنمىن. مەن باقتيار اعايدىڭ وسى سوزدەرىن تىڭداي وتىرىپ، ەل ىقىلاسىنا بولەنگەن داڭقتى باتىردىڭ كىشىپەيىلدىگىنە، قاراپايىمدىلىعىنا قاتتى تاڭىرقايتىن ەدىم. ەندى ويلاپ قاراسام، داڭقتى باتىردىڭ وسى ىزگى قاسيەتتەرى ءوز ۇستازىمنىڭ بويىنا دارىعانىن شاكىرتتەرىنە دەگەن ەرەكشە ىقىلاسىنان اڭعارامىن.
مىنە، ەلىمىزگە كەڭىنەن تانىمال، اتاقتى عالىمداردان ءدارىس الىپ، قاناتىنىڭ قاتايۋى باقتيار سمانوۆتىڭ 1973 جىلى ۋنيۆەرسيتەتتەگى وقۋىن اياقتاعان سوڭ، سول كەزدەگى جولدامامەن جىبەرىلگەن اۋىلدىق جەردە ءمۇعالىم بولىپ قالىپ قويماي، ۇلكەن قالادا ودان ءارى ءبىلىمىن شىڭداۋىنا تۇرتكى بولادى. ىبىراي التىنسارين اتىنداعى پەداگوگيكا عىلىمدارى ينستيتۋتىنىڭ اسپيرانتۋراسىن، كسرو پەداگوگيكا عىلىمدارى اكادەمياسىنىڭ باسشى كادرلار بىلىكتىلىگىن كوتەرۋ ينستيتۋتىنىڭ جوعارى كۋرستارىن ءتامامداعان ول رۋحاني تۇرعىدا تولىسا تۇسەدى. ءوقۋ-بىلىم مەن قىزمەتتىك جولدى قاتار الىپ جۇرسە دە، ءار ىسكە دە جاۋاپكەرشىلىك تانىتا بىلگەندىكتەن ۇجىم ورتاسىندا ابىرويعا بولەنەدى. قات-قابات قىزمەتتىڭ بەل ورتاسىندا ءجۇرىپ، عىلىمنان قول ۇزبەگەن باقتيار ءورىسباي ۇلى ەلىمىز تاۋەلسىزدىگىن الار تۇستا 1991 جىلى ماسكەۋدە «قازاق ورتا مەكتەبىندەگى جوعارى سىنىپتاردا ەپيكالىق شىعارمالاردىڭ كەيىپكەرلەر بەينەسىن تالداۋ» تاقىرىبىنداعى كانديداتتىق جۇمىسىن جوعارى دەڭگەيدە قورعاپ شىعادى. ارينە، بۇل ءبىر قاراعانعا عالىمنىڭ كەزەكتى ءبىر ىزدەنىسىنىڭ ناتيجەسى سەكىلدى كورىنۋى مۇمكىن. ءبىراق قازاق ادەبيەتى تاقىرىبىنداعى كانديداتتىق ديسسەرتاسياسىن ماسكەۋ تورىندە قورعاۋ ەكىنىڭ-بىرىنىڭ قولىنان كەلە بەرمەيتىنى، بۇل اسا ۇلكەن جاۋاپكەرشىلىك پەن ىزدەنىستى قاجەت ەتەتىنى ايتپاساق تا تۇسىنىكتى. مەكتەپ مۇعالىمىنەن باستاۋ العان ەڭبەك جولى عىلىمي ينستيتۋتتارداعى ىزدەنىستەردەن سوڭ، قازاقستان رەسپۋبليكاسى پرەزيدەنتى اكىمشىلىگى مەن مينيسترلەر كابينەتى، ۇكىمەت اپپاراتىنداعى جاۋاپتى قىزمەتتەرمەن جالعاسىن تابادى. ءبىلىم ءمينيسترىنىڭ كەڭەسشىسى، جالپى ورتا ءبىلىم باس باسقارماسىنىڭ باستىعى، مينيسترلىكتىڭ القا مۇشەسى سەكىلدى كوپتەگەن اسا جاۋاپتى قىزمەت باسپالداقتارىنان ءوتىپ، ۇيىمداستىرۋشىلىق قابىلەتى شىڭدالا تۇسەدى. كانديداتتىق جۇمىستى عىلىمداعى ورلەۋدىڭ باسپالداعى ەتكەن بولاشاق اكادەميك، ۇزاق ىزدەنىس پەن مول تاجىريبەنىڭ ارقاسىندا 2010 جىلى ارۋ قالا الماتىدا «مەكتەپتە كوركەم شىعارمانى تالداۋدىڭ عىلىمي-ادىستەمەلىك نەگىزدەرى» اتتى دوكتورلىق ديسسەرتاسيانى دا تابىستى قورعاپ شىعادى.
ەلىمىزدىڭ جاۋاپتى لاۋازىمداردا شىڭدالىپ، عىلىمدا دا ءوز قولتاڭباسىن قالىپتاستىرعان باقتيار اعايىمىزدىڭ مەملەكەتتىك قىزمەتتەردەن كەيىنگى ەڭبەك جولى ەلىمىزدىڭ بەلدى جوعارى وقۋ ورىندارىمەن تىكەلەي ۇشتاسىپ جاتىر. بۇل ءوزىنىڭ ءبىلىم العان ءال-فارابي اتىنداعى قازۇۋ-دان باستاۋ العان ۇستازدىق جول قازاق ۇلتتىق قىزدار پەداگوگيكالىق ۋنيۆەرسيتەتىندە فيلولوگيا، تاريح-فيلولوگيا، دايىندىق فاكۋلتەتتەرىندە دەكان، الماتى وبلىسى ماماندار كاسىبىن دامىتۋ ينستيتۋتىندا كافەدرا مەڭگەرۋشىسى، ءبىلىم بەرۋ جۇيەسىنىڭ باسشى جانە عىلىمي-پەداگوگيكالىق كادرلارى بىلىكتىلىگىن ارتتىراتىن رەسپۋبليكالىق ينستيتۋت ديرەكتورى، اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە اپپارات جەتەكشىسى، اكادەميك س.قيرابايەۆ اتىنداعى قازاق ادەبيەتى كافەدراسىنىڭ مەڭگەرۋشىسى سەكىلدى باسشىلىق قىزمەتتەرمەن دە جالعاسىن تاپتى. قانداي جاۋاپتى قىزمەتتە جۇرسە دە، باقتيار ءورىسباي ۇلى عىلىمنان ەشقاشان قول ۇزگەن ەمەس. ەلىمىزدەگى عىلىمي باسىلىمدار مەن بۇقارالىق اقپارات قۇرالدارىندا بۇگىنگى تاڭدا دا دا اعايدىڭ تاعىلىمى مول ماقالالارى ۇزدىكسىز جاريالانىپ تۇرادى. بۇگىندە اكادەميك س.قيرابايەۆ اتىنداعى قازاق ءتىلى مەن ادەبيەتى كافەدراسىنىڭ پروفەسسورى بولىپ قىزمەت اتقاراتىن باقتيار ءورىسباي ۇلى – قازاقستان جازۋشىلار جانە جۋرناليستەر وداقتارىنىڭ مۇشەسى، «قازاق ءتىلى مەن ادەبيەتى»، «ۇلتتىق تاربيە»، «پەداگوگيكا جانە پسيحولوگيا» جۋرنالدارى اقىلداستار القاسىنىڭ مۇشەسى، اباي اتىنداعى قازۇپۋ-دىڭ «فيلولوگيا عىلىمدارى» سەرياسى حابارشىسىنىڭ باس رەداكتورى.
سونداي-اق، قىرعىز ءبىلىم بەرۋ اكادەمياسى مەن ي.ارابايەۆ اتىنداعى قىرعىز مەملەكەتتىك ۋنيۆەرسيتەتى جانىنداعى پەداگوگيكا عىلىمدارىنىڭ دوكتورى (كانديداتى) عىلىمي دارەجەسىن بەرۋ جونىندەگى ديسسەرتاسيالىق كەڭەستىڭ مۇشەسى، وتاندىق عىلىمنىڭ باۋىرلاس قىرعىز ەلىمەن بىتە قايناسىپ، جان-جاقتى دامۋىنا ولشەۋسىز ۇلەس قوسىپ جۇرگەن عالىم-اكادەميك. قىرعىز حالقىنىڭ ءبىرتۋار ازاماتى، اتاقتى شىڭعىس ايتماتوۆتىڭ شاكىرتى ءارى زەرتتەۋشىسى، اكادەميك ابدىلداجان احماتالييەۆپەن اراسىنداعى عىلىمي ارىپتەستىك، ۇلكەن دوستىق پەن سىيلاستىققا ۇلاسۋى بۇگىنگى ۇرپاققا ءتالىمى مول ونەگە. بۇل بايلانىس كەشەگى قازاق-قىرعىز الىپتارىنىڭ باۋىرلاستىق سىيلاستىعىنىڭ تامىرىن تەرەڭگە جايعانىن كورسەتەدى.
اكادەميك ب.سمانوۆ قازاق كسر حالىق-اعارتۋ ءىسىنىڭ وزىق قىزمەتكەرى، قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى، قازاقستان رەسپۋبليكاسى مادەنيەت سالاسىنىڭ ۇزدىگى، قازاقستان رەسپۋبليكاسىنىڭ عىلىمىن دامىتۋعا سىڭىرگەن ەڭبەگى ءۇشىن توسبەلگىلەرىنىڭ، ى.التىنسارين، «قازاقستان كونستيتۋسياسىنا – 20 جىل»، حالىقارالىق تۇركسوي ۇيىمىنىڭ س.قادىشيەۆ، «بايتەرەك-كەلدىبەك» قوعامدىق قورىنىڭ «ەرەن ەڭبەگى ءۇشىن» مەدالدارىنىڭ يەگەرى، حالىقارالىق جامبىل اتىنداعى سىيلىقتىڭ جانە «ۇلت قايراتكەرى» قۇرمەتتى اتاعىنىڭ يەگەرى. سونىمەن قاتار 2017 جىلى ءوزىنىڭ ءبىلىم سالاسىنداعى قاجىرلى ەڭبەگىنىڭ ارقاسىندا ق ر ۇلتتىق عىلىم اكادەمياسىنىڭ اكادەميگى بولىپ ءبىراۋىزدان سايلاندى.
سونىمەن قاتار ول عالىم-ۇستاز، ءدىني-يماندىلىق، رۋحاني-ادامگەرشىلىك تاقىرىبىنا بايلانىستى تاريحي-تانىمدىق، ساياسي-اقپاراتتىق تالداۋ ماقالالار جازىپ جۇرگەن زەردەلى زەرتتەۋشى. جالپى جيىنى 450-دەن استام عىلىمي ەڭبەكتەردىڭ اۆتورى (ونىڭ ىشىندە 9 مونوگرافيا، 15 وقۋلىق، وقۋ-ادىستەمەلىك قۇرالدارى بار). ولار 20 جىلدان استام ۋاقىتتان بەرى ەلىمىزدىڭ ورتا مەكتەپتەرىندە كەڭىنەن قولدانىستا.
باقتيار اعايدى مەن ۋنيۆەرسيتەت قابىرعاسىندا وقىپ جۇرگەن كەزدەن-اق ادەبيەتتىڭ ادىسكەر-عالىمى رەتىندە سىرتتاي تانيتىنمىن. ويتكەنى سول ۋاقىتتا ءوزىم دە وسى ماماندىقتىڭ ماگيستراتۋراسىندا ءبىلىم الىپ جاتقاندىقتان ادىستەمەگە كەلگەندە ول كىسىنىڭ ەڭبەكتەرىنە توقتالماي كەتۋ مۇمكىن ەمەس ەدى. وقۋدى بىتىرگەن سوڭ، ءوزىم ءبىلىم العان قارا شاڭىراقتىڭ سايتىنان «اقپاراتتىق رەسۋرستار بولىمىنە» ۆەب-رەداكتور كەرەك دەگەن حابارلاندىرۋدى وقىپ، باعىمدى سىناپ كورۋ ءۇشىن ۋنيۆەرسيتەتتىڭ كادر بولىمىنە قۇجاتتارىمدى الىپ باردىم. سول ۋاقىتتاعى كادر ءبولىمىنىڭ باستىعى ورالگۇل جايلاۋبايەۆنا قۇجاتتارىممەن تانىسىپ وتىرىپ:
– ءسىز، 210-شى كابينەتكە بارىڭىزشى. سول جەردە رەكتور اپپاراتىنىڭ جەتەكشىسى وتىرادى، – دەپ ەكىنشى قاباتقا ءجون سىلتەدى.
مەن جاسقانا باسىپ، 210-شى كابينەتتىڭ ەسىگىن اشتىم. ىشىندە وتىرعان اق-سارى كەلگەن حاتشى قىزبەن سالەمدەسكەن سوڭ، كادر ءبولىمى باسشىسىنىڭ نۇسقاۋىمەن كەلگەنىمدى ايتتىم. سوندا ول:
– باقتيار ءورىسباي ۇلى رەكتوردىڭ قابىلداۋىندا، كۇتە تۇرىڭىز، – دەدى. بۇل ەسىم ماعان بۇرىننان تانىس، ءوزىن جۇزبە-جۇز كورمەسەم دە ەڭبەكتەرىمەن ازدى-كوپتى تانىستىعىم بار. باقتيار اعايدىڭ تۇلعاسىن وزىمشە كوز الدىما ەلەستەتىپ وتىرعانىمدا ەسىكتەن ءوزى كىرىپ كەلدى. مەن ورنىمنان جالما-جان ۇشىپ تۇرىپ، سالەمدەستىم. جوق، مەن ويلاعانداي قورقىنىشتى ەمەس ەكەن. مەنى جاس دەمەي جىلى شىرايمەن قولىن ۇسىنىپ، كەلگەن شارۋامدى سۇرادى. مەن ىلە-شالا حابارلاندىرۋ بويىنشا كەلگەنىمدى، كادر ءبولىمى وسىندا جىبەرگەنىن ايتىپ، تۇيىندەمەمدى قولىنا ۇستاتتىم. ءوزىم ارتىنان ءجۇرىپ كابينەتىنە ەرە كىردىم.
– سەن، ءبىزدىڭ تۇلەك ەكەنسىڭ عوي، جازۋعا قالايسىڭ، – دەدى باقتيار اعاي تۇيىندەمەمە قاراپ وتىرىپ.
– ورتاشا، دەدىم مەن ساسقالاقتاپ.
– جازا بىلگەن جاقسى، كەيىن وزىڭە كەرەك بولادى. ءۇش ايلىق سىناق مەرزىمىمەن جۇمىسقا قابىلدايمىز، جاقسى ناتيجە كورسەتسەڭ ارى قاراي جالعاستىرامىز، – دەدى اعاي.
– جارايدى، دەدىم. ىشتەگى قۋانىشتان داۋىسىم قاتتىراق شىعىپ. سول تانىستىق كەلە-كەلە ۇلكەن سىيلاستىققا ۇلاستى. باقتيار اعاي ءوزىنىڭ ءالى سياسى كەپپەگەن ماقالالارىمەن ءبولىسىپ، تۋىندىسى جايىندا ويىمدى سۇراپ، پىكىر ءبىلدىرىپ جاتسام ماقتاۋىمدى اسىرىپ قولپاشتاي جونەلەتىن. سونداي ساتتەردە ۇلكەن عالىمنىڭ توبەمدى كوككە جەتكىزۋى مەنى ەرەكشە اسەرگە بولەيتىن. باسشى مەن قىزمەتكەر رەتىندەگى ارىپتەستىك قارىم-قاتىناس ۇستاز بەن شاكىرت بايلانىسىنا ۇلاستى. 2017 جىلى ءوزىم وقىعان فاكۋلتەتتىڭ Phd دوكتورانتۋراسىنا ادەبيەتتانۋ ماماندىعى بويىنشا وقۋعا ءتۇستىم. ول ۋاقىتتا اعاي دا ءبىزدىڭ كافەدراعا مەڭگەرۋشى بولىپ، ءتورتىنشى قاباتتاعى 410-شى ءدارىسحاناعا كەلىپ جاتتى. ويتكەنى سول جىلدىڭ كوكتەمىندە ءبىزدىڭ كافەدراعا اكادەميك سەرىك قيرابايەۆ اتامىزدىڭ 90 جىلدىعىنا وراي اتى بەرىلگەن بولاتىن. سول كەزدە بۇل ءدارىسحانا كافەدرا مەڭگەرۋشىسىنىڭ كابينەتى رەتىندە جاساقتالعان ەدى. اعايدىڭ تىكەلەي شاكىرتى بولىپ بەكىتىلگەن كۇننەن باستاپ ءبىزدىڭ بايلانىسىمىز ودان ءارى نىعايا ءتۇستى. مەن ءوزىمنىڭ بىلگەنىمشە جازعان دۇنيەلەرىمە اعايدىڭ اتىن قوساقتاپ جازىپ، جاريالاۋعا ۇسىنۋ ءۇشىن ول كىسىگە الىپ كەلەتىنمىن. سول كەزدە جەكپە-جەكتە قارسىلاسقا ەسە جىبەرىپ، بەت الپەتى قىزىل قانعا بويالعان سپورتشىداي كۇي كەشكەن اق پاراقتاعى ادەمى جازۋلارىمدى كورگەندە قالام ۇستاۋعا ەندى قايتىپ جۇرەگىم داۋلاماي قالاتىن. ءبىراق ەرىنبەي وقىپ، ءوزىنىڭ ويىن قايتا قوسىپ، ماقالامنىڭ قۇندىلىعىن ارتتىرىپ بەرە وتىرىپ، باقتيار اعاي:
– ويىڭ جاقسى، ۇرلەسە تۇتاناتىن شوق سەكىلدى. دەگەنمەن ونى مەيىلىنشە كوركەم ەتكەنىڭ دۇرىس. ءوزىڭ جازىپ، مەنىڭ فاميليامدى قوسا تىركەپ قويىپسىڭ، سول سەبەپتى ماقالانى اكادەميكتىڭ كوزىمەن قاراۋىما تۋرا كەلدى، – دەپ اعاي شابىتتاندىرىپ قوياتىن. باسپا ءسوز ورتالىعىندا قىزمەتتە ءجۇرىپ، ۋنيۆەرسيتەت جەتىستىكتەرىن گازەتكە جازۋدان باستالعان جازۋ ونەرىمە قانات بىتىرگەن باقتيار ءورىسباي ۇلىنىڭ ىستىق ىقىلاسى ەدى. قانداي ماقالام بولماسىن، جۇرت الدىنا جاسقانا كىرەتىن باسشىعا ەسكەرتۋسىز ەركەلەي باسىپ ءبىر قاراتىپ الاتىن ەدىم. سونداي ساتتەردە ءوزى جۇمىستان باس الماي جاتسا دا، «شوقاش سەن ءشاي قويىپ جىبەر»، ەكەۋمىز سەنىڭ ماقالاڭدى تالقىلاپ تاستايىق دەپ ءبارىن ىسىرىپ قوياتىن ەدى. مىنە، ۇستازىمنىڭ وسى ىزگى قاسيەتى مەنىڭ عىلىم جولىنا كەلۋىمە زور ىقپال ەتتى.
بۇگىندە 70ء-تىڭ شىڭىنا شىعىپ وتىرعان اكادەميك باقتيار ءورىسباي ۇلى ءالى دە تالاي شاكىرتتىڭ جۇرەگىنە نۇر سەۋىپ، قالامىن ۇشتايتىنى ءسوزسىز. شاكىرتىنىڭ جان دۇنيەسىن كوز جانارىنان ۇعىناتىن ارداقتى ۇستازىما تىلەيتىنىم زور دەنساۋلىق، ۇزاق عۇمىر، وتباسىنا باق-بەرەكە. ءسوز سوڭىندا عىلىمداعى تۇعىرىڭىزدان ەشقاشان تومەندەمەڭىز باقتيار اعاي دەگىم كەلەدى.
شوقان قۇتتىبايەۆ، اباي اتىنداعى قازۇپۋ، اكادەميك س.قيرابايەۆ اتىنداعى قازاق ءتىلى مەن ادەبيەتى كافەدراسىنىڭ ماگيستر، اعا وقىتۋشىسى
