بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە ىشكى ساياسات باسقارماسىنىڭ باسشىسى جانات مەكەيەۆا ايتتى.
«رەسپۋبليكا كۇنىن مەرەكەلەۋگە وراي وبلىستا سالتاناتتى جانە مەرەكەلىك ءىس-شارالار جوسپارى جاساقتالدى. وسىلايشا، شىعىسقازاقستاندىقتار بۇكىل ەل تۇرعىندارىمەن بىرگە «قىران ەلىم – قازاقستانىم!» جالپىۇلتتىق پاتريوتتىق اكسياسىنا قاتىسۋدا. ونىڭ اياسىندا ءانۇران جاپپاي ورىندالادى. سونداي-اق مەملەكەتتىك تۋ سالتاناتتى تۇردە كوتەرىلەدى»، دەدى ج.مەكەيەۆا.
سونداي-اق بارلىق جەردە وبلىستىڭ، جالپى ەلىمىزدىڭ دامۋىنا سۇبەلى ۇلەس قوسقان ازاماتتاردى ماراپاتتاۋ، ماداقتاۋ شارالارى ۇيىمداستىرىلادى. مەملەكەتتىك جانە ۆەدومستۆولىق ناگرادالاردى سالتاناتتى تۇردە تاپسىرۋ راسىمدەرى وتەدى.
پرەزيدەنت توقايەۆ رەسپۋبليكا كۇنى ۇلتتىق مەرەكەگە اينالاتىنىن ۇلىتاۋدا وتكەن ۇلتتىق قۇرىلتايدا مالىمدەگەن ەدى.
"ۇلتتىق مەرەكەلەر مەن اتاۋلى كۇندەر تىزبەسىنە ءبىرقاتار وزگەرىس ەنگىزگەن ءجون. مەن رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىنامىن. سوندىقتان قازاننىڭ جيىرما بەسى كۇنى جىل سايىن ەگەمەندىك كۇنىن ەلىمىزدىڭ باستى مەرەكەسى رەتىندە اتاپ ءوتۋىمىز كەرەك.
1990 جىلى 25 قازاندا قازاقستاننىڭ ەگەمەندىگى تۋرالى دەكلاراسيا قابىلداندى. بۇل ەلىمىزدىڭ تاۋەلسىزدىك جولىنداعى تۇڭعىش قادامى بولاتىن. وسى قۇجاتتى قابىلداعان كەزدە تۇڭعىش پرەزيدەنت نۇرسۇلتان نازاربايەۆ اسا ماڭىزدى، ءتىپتى شەشۋشى ءرول اتقاردى.
رەسپۋبليكا كۇنى ەلدىڭ مەملەكەت قۇرۋ جولىنداعى تاريحي قادامىنىڭ سيمۆولى بولۋى كەرەك. ارينە، تاۋەلسىزدىك كۇنىنىڭ باستاپقى ءمانى ساقتالادى. بۇل كۇن مەملەكەتتىك مەرەكە بولىپ قالا بەرەدى. ءبىراق تاۋەلسىزدىك الۋعا زور ۇلەس قوسقان ۇلتتىق باتىرلارىمىزعا تاعزىم كۇنى رەتىندە اتاپ ءوتىلۋى كەرەك"، – دەدى پرەزيدەنت.
