Bul týraly óńirlik kommýnikatsiialar qyzmetinde ótken brifingte ishki saiasat basqarmasynyń basshysy Janat Mekeeva aitty.
«Respýblika kúnin merekeleýge orai oblysta saltanatty jáne merekelik is-sharalar jospary jasaqtaldy. Osylaisha, shyǵysqazaqstandyqtar búkil el turǵyndarymen birge «Qyran elim – Qazaqstanym!» jalpyulttyq patriottyq aktsiiasyna qatysýda. Onyń aiasynda Ánuran jappai oryndalady. Sondai-aq Memlekettik tý saltanatty túrde kóteriledi», dedi J.Mekeeva.
Sondai-aq barlyq jerde oblystyń, jalpy elimizdiń damýyna súbeli úles qosqan azamattardy marapattaý, madaqtaý sharalary uiymdastyrylady. Memlekettik jáne vedomstvolyq nagradalardy saltanatty túrde tapsyrý rásimderi ótedi.
Prezident Toqaev Respýblika kúni ulttyq merekege ainalatynyn Ulytaýda ótken Ulttyq quryltaida málimdegen edi.
"Ulttyq merekeler men ataýly kúnder tizbesine birqatar ózgeris engizgen jón. Men Respýblika kúnine ulttyq mereke mártebesin qaitarýdy usynamyn. Sondyqtan qazannyń jiyrma besi kúni jyl saiyn Egemendik kúnin elimizdiń basty merekesi retinde atap ótýimiz kerek.
1990 jyly 25 qazanda Qazaqstannyń egemendigi týraly deklaratsiia qabyldandy. Bul elimizdiń táýelsizdik jolyndaǵy tuńǵysh qadamy bolatyn. Osy qujatty qabyldaǵan kezde Tuńǵysh Prezident Nursultan Nazarbaev asa mańyzdy, tipti sheshýshi ról atqardy.
Respýblika kúni eldiń memleket qurý jolyndaǵy tarihi qadamynyń simvoly bolýy kerek. Árine, Táýelsizdik kúniniń bastapqy máni saqtalady. Bul kún memlekettik mereke bolyp qala beredi. Biraq táýelsizdik alýǵa zor úles qosqan ulttyq batyrlarymyzǵa taǵzym kúni retinde atap ótilýi kerek", – dedi prezident.
