كوپ كۇتكەندەي، ۇلتتىق بانك بۇگىن، 29 قاراشادا بازالىق مولشەرلەمە بويىنشا ءوز شەشىمىن جاريالادى. سونىمەن ول 15،25%-كە دەيىن كوتەرىلدى. پروسەنتتىك ءدالىز +/- 1،0 پ.پ. قۇرادى. نەگىزى، 2022 جىلدان بەرى بازالىق مولشەرلەمە 14،25% دەڭگەيىندە قالىپتاسىپ كەلگەن. وسىلايشا بازالىق سىياقى مولشەرلەمەسىنە ماڭايىنداعى دولبارلارعا نۇكتە قويىلدى، دەپ حابارلايدى Dalanews.kz.
بۇل ارادا مىنا ەكى جايتتى ايقىنداي كەتەلىك: بىرىنشىدەن، بازالىق مولشەرلەمە - بۇل ۇلتتىق بانكتىڭ كوممەرسيالىق بانكتەرگە قىسقا مەرزىمدى نەسيە بەرۋدە جانە ولاردىڭ قاراجاتىن دەپوزيتىنە قابىلداعاندا سۇيەنەتىن پروسەنتتىك ستاۆكاسى. سونداي-اق وعان بانكتەر دە نەسيە مەن دەپوزيت سىياقى مولشەرلەمەلەرىن بەلگىلەۋ كەزىندە سۇيەنەدى. ياعني، بانك سەكتورى، قارجى نارىعى، شوب، ءىرى بيزنەس، جالپى ينۆەستورلار قاۋىمى ءۇشىن بۇل ماڭىزدى اقپارات. ەكىنشىدەن، ۇلتتىق بانك كوپ ءۇشىن كۇتپەگەن "تارتۋ" جاسادى. ياعني، 1% ءوسىمدى ەشكىم كۇتپەدى. جالپى، سوڭعى ەكى كۇنگە دەيىن ءوسىم تۋرالى مۇلدە ءسوز بولماعان. وعان دەيىن قارجىگەرلەر قاۋىمى "بازالىق مولشەرلەمە تومەندەتىلەدى مە الدە وسى قالپىندا قالا ما" دەگەن نۇسقالاردا تاڭداۋ جاساۋمەن بولعان. ال تەڭگە قالاي السىرەي باستادى، سولاي بازالىق مولشەرلەمەنىڭ وسەتىنى بەلگىلى بولدى. كوبىسى 05%-كە ارقا سۇيەگەن ەدى. ەندى نەگە بۇلاي بولدى؟ تومەندە ۇلتتىق بانكتىڭ ەگجەي-تەگجەيلى تۇسىنىكتەمەسىن بەرە وتىرالىق:
قازاقستاندا جىلدىق ينفلياسيا قازان ايىندا 8،5%-عا دەيىن ءوستى
"بۇل "ءتاريفتى ينۆەستيسياعا ايىرباستاۋ" باعدارلاماسىن ىسكە اسىرۋ اياسىندا رەتتەلەتىن قىزمەتتەردىڭ ايتارلىقتاي قىمباتتاۋى مەن تەڭگەنىڭ السىرەۋى سالدارىنان ورىن الۋدا. وعان قوسا ينفلياسيانىڭ ورنىقتى بولىگى دە وسۋدە. جوعارى ىشكى سۇرانىس جاعدايىندا ازىق-تۇلىككە جاتپايتىن تاۋارلار مەن نارىقتىق قىزمەتتەر باعاسىنىڭ ءوسۋى ينفلياسيانىڭ جەدەلدەۋىنە ىقپال ەتتى. بيۋدجەتتىڭ كىرىس بولىگىن ورىنداماۋعا بايلانىستى جالعاسىپ جاتقان فيسكالدىق ىنتالاندىرۋ ەسەبىنەن ەكونوميكا ىشىندەگى پروينفلياسيالىق قىسىم ساقتالۋدا. قازان ايىندا حالىقتىڭ ينفلياسيالىق كۇتۋلەرى تومەندەگەنمەن، قۇبىلمالى بولىپ قالۋدا".
جاھاندىق ينفلياسيا جالپى باياۋلاۋدا
"بۇل دامىعان ەكونوميكالارداعى ەڭبەك نارىعىنداعى جاعدايدىڭ تۇراقتانۋى جانە نەعۇرلىم باياۋ ىسكەرلىك بەلسەندىلىكتى قوسا العاندا، سىرتقى مونەتارلىق تالاپتاردىڭ بىرتىندەپ جەڭىلدەۋىنە اكەلۋدە. الايدا سىرتقى ينفلياسيالىق قىسىم سوڭعى ايلاردا ارتۋدا. وعان ازىق-تۇلىكتىڭ الەمدىك باعاسىنىڭ ءوسۋى، رەسەيدەگى نەعۇرلىم جوعارى ينفلياسيا جانە ايتارلىقتاي باعامدىق اۋىتقۋلار سەبەپ بولۋدا. قارجى نارىقتارىندا ەداۋىر وسكەن قۇبىلمالىلىق بايقالۋدا، بۇل بەلگىسىزدىك پەن ينفلياسيالىق كۇتۋلەردىڭ وسۋىنە اسەر ەتۋى مۇمكىن".
مۇناي باعاسىنىڭ تومەندەۋى
"بازالىق سەنارييدە Brent ماركالى مۇنايدىڭ باعاسى بولجامدى كەزەڭنىڭ سوڭىنا دەيىن ورتاشا ەسەپپەن ءبىر باررەل ءۇشىن 70 اقش دوللارىنا دەيىن تومەندەتۋ جاعىنا قاراي قايتا قارالدى. سەناريي شارتتارى باعانىڭ ناقتى ديناميكاسىن، جۇڭگو تاراپىنان سۇرانىستىڭ تومەندەۋىن، الەمدىك ەكونوميكانىڭ باياۋلاۋىن جانە سولتۇستىك جانە وڭتۇستىك امەريكادا ءوندىرۋدىڭ ءوسۋىن ەسكەرە وتىرىپ قالىپتاستىرىلعان".
2024 جىلعا بولجانعان ينفلياسيا 8-9%-كە دەيىن ناقتىلاندى
"2025 جىلعا ارنالعان بولجام – 6،5-8،5%-عا دەيىن، 2026 جىلعا ارنالعان بولجام 5،5-7،5%-عا دەيىن ءوسۋ جاعىنا قاراي قايتا قارالدى. ينفلياسيانىڭ ورنىقتى بولىگى 2026 جىلى 5%-عا جاقىن قالىپتاسادى. جالپى ينفلياسيا 2027 جىلى نىساناعا جاقىن قالىپتاسادى دەپ كۇتىلەدى. الداعى جىلدارعا ينفلياسيا بويىنشا نەعۇرلىم جوعارى بولجام فيسكالدىق ىنتالاندىرۋدىڭ كەڭەيۋىنە، ءتۇرعىن-ۇي كوممۋنالدىق قىزمەتتەر (تكق) رەفورمالارىنىڭ جالعاسۋىنا، ايىرباستاۋ باعامىنىڭ السىرەۋىنە جانە سىرتقى ينفلياسيالىق قىسىمنىڭ كۇشەيۋىنە بايلانىستى. ينفلياسيا بولجامىنىڭ تاۋەكەلدەرى ىشكى سۇرانىس تاراپىنان قىسىمنىڭ وسۋىنە، سىرتقى ينفلياسيانىڭ جەدەلدەۋىنە جانە ينفلياسيالىق كۇتۋلەردىڭ ارتۋىنا بايلانىستى. سونىمەن قاتار مەملەكەتتىك قارجىنى تۇراقتاندىرۋ قۇرالدارىنا قاتىستى بەلگىسىزدىك ساقتالۋدا. رەتتەلەتىن باعالار مەن تاريفتەردى ودان ءارى ءوسۋى، ونىڭ قارقىنى مەن مەرزىمى دە بولجامنىڭ ماڭىزدى تاۋەكەلى بولىپ قالىپ وتىر".
2024 جىلعا بولجانعان قازاقستان ەكونوميكاسىنىڭ ءوسۋى 4-4،5% دەڭگەيىندە ناقتىلاندى
"2025 جانە 2026 جىلدارعا ارنالعان بولجام تيىسىنشە 4،5-5،5% جانە 4،6-5،6%-عا دەيىن قايتا قارالدى. نەعۇرلىم تومەن بولجامدار مۇنايدىڭ سەنارييلىك باعاسىنىڭ تومەندەۋىنە جانە ءبىرقالىپتى سىرتقى سۇرانىسقا بايلانىستى. ۇلتتىق بانكتىڭ باعالاۋى بويىنشا بولجامدى كەزەڭ ىشىندە ەكونوميكا ىشكى ۇسىنىس مۇمكىندىكتەرىنەن اسىپ تۇسەتىن سۇرانىستىڭ كەڭەيۋى جاعدايىندا وسەدى. بۇل ورنىقتى تۇردە پروينفلياسيالىق قىسىم كورسەتەتىن بولادى".
اقشا باعامى: تەڭگەنىڭ السىرەۋى
"ايىرباستاۋ باعامىنىڭ السىرەۋى، ينفلياسيانىڭ وسۋىنە بايلانىستى ناقتى ماندەگى پايىزدىق مولشەرلەمەلەردىڭ تومەندەۋى، سونداي-اق ونىڭ الداعى جىلدارعا بولجامدارىنىڭ ارتۋى اياسىندا جيىنتىق اقشا-كرەديت شارتتارى جۇمساردى. قارجى نارىقتارىندا وسكەن قۇبىلمالىلىقپەن بىرگە بۇل بازالىق مولشەرلەمەنى كوتەرۋدى قاجەت ەتتى. قارجى جانە ەنەرگەتيكا نارىقتارىنداعى قۇبىلمالىلىقتى ەسكەرە وتىرىپ، كوميتەت ينفلياسيانى ورنىقتى باياۋلاۋ تراەكتورياسىنا تەزىرەك قايتارۋ جانە 5%-دىق تارگەتكە جەتۋ ءۇشىن جاقىن ارادا شەشىم قابىلداۋ كەزىندە اقشا-كرەديت ساياساتىن قوسىمشا قاتاڭداتۋ قاجەتتىلىگىن مۇقيات باقىلايتىن بولادى".
ءسوز سوڭىندا ق ر ۇلتتىق بانكىنىڭ اقشا-كرەديت ساياساتى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2025 جىلعى 17 قاڭتاردا استانا قالاسىنىڭ ۋاقىتىمەن ساعات 12:00-دە جاريالاناتىنى ناقتىلانادى.
بۇعان دەيىن ءبىزدىڭ سايتتا "تەڭگەنىڭ قاتتى السىرەۋى بازالىق مولشەرلەمەنى تومەندەتۋ مۇمكىندىگىن جوققا شىعارادى" دەگەن ماقالا جاريالانعان بولاتىن.
