كاسىپقوي بوكسشى دميتريي بيۆولدىڭ بۇرىنعى ايەلى ەكاتەرينا بيۆولدىڭ مالىمدەمەسىنەن كەيىن قىرعىزستاندا ەل نامىسىن قورعاۋعا ءتورت ادۆوكات ءوز ەركىمەن رەسەيگە بارماق، دەپ حابارلايدى Dalanews.kz.
ايتا كەتەيىك، الەمگە ايگىلى بوكسشى دميتريي بيۆولدىڭ ەكس-جۇبايى ەكاتەرينا بيۆول الەۋمەتتىك جەلىدە ءتۇرلى ۇلت وكىلدەرىن قورلايتىن بەينەجازبا جاريالاپ، كوپتىڭ سىنىنا ۇشىراعان بولاتىن. قىرعىزستان ىشكى ىستەر مينيسترلىگى بۇل وقيعاعا دەرەۋ نازار اۋدارىپ، تەرگەۋگە دەيىنگى تەكسەرىس باستالعانىن مالىمدەدى.
قىرعىزستاندىق ادۆوكات بەكسۋلتانوۆتىڭ سوزىنشە، ەلدىڭ قىلمىستىق كودەكسىنىڭ 330-بابى بويىنشا (ناسىلدىك، ەتنيكالىق، ۇلتتىق، ءدىني نەمەسە ءوڭىرارالىق ارازدىقتى (الاۋىزدىقتى) قوزدىرۋ) ءىس قوزعاۋعا بولادى.
1. ناسىلدىك، ەتنيكالىق، ۇلتتىق، ءدىني نەمەسە ءوڭىرارالىق ارازدىقتى (الاۋىزدىقتى) قوزدىرۋعا، ۇلتتىق قادىر-قاسيەتتى قورلاۋعا، سونداي-اق دىنگە، ۇلتقا نەمەسە ناسىلگە قاتىسىنا قاراي ازاماتتاردىڭ ەرەكشەلىگىن، ۇستەمدىگىن نە تومەندىگىن ناسيحاتتاۋعا باعىتتالعان ىس-ارەكەتتەر، ەگەر ولار جاريا تۇردە، بۇقارالىق اقپارات قۇرالدارىن پايدالانا وتىرىپ نەمەسە ينتەرنەت جەلىسى ارقىلى جاسالسا، -
ايلىق ەسەپتىك كورسەتكىشتىڭ (اەك) 1000-نان 2000-عا دەيىنگى مولشەرىندە ايىپپۇل سالۋعا نەمەسە بەس جىلعا دەيىنگى مەرزىمگە باس بوستاندىعىنان ايىرۋعا جازالانادى.
2. ءدال سول ىس-ارەكەتتەر، ەگەر ولار:
1.ءومىر مەن دەنساۋلىققا ءقاۋىپتى ەمەس زورلىق-زومبىلىق قولدانۋ ارقىلى نەمەسە ونى قولدانامىن دەپ قورقىتۋ ارقىلى؛
2.ءوز قىزمەت بابىن پايدالانا وتىرىپ؛
3.ادامدار توبىنىڭ؛
4.ادامدار توبىنىڭ الدىن الا ءسوز بايلاسۋى ارقىلى؛
5.ۇيىمداسقان توپتىڭ؛
6.قىلمىستىق قاۋىمداستىقتىڭ قۇرامىندا جاسالسا بەس جىلدان جەتى جىلعا دەيىنگى مەرزىمگە باس بوستاندىعىنان ايىرۋعا جازالانادى.
بەكسۋلتانوۆتان بولەك، ادۆوكات شىڭعىس تەمىربەكوۆ، ماحابات مەليسوۆنا جانە جانىش باراكوۆ ەكاتەرينا بيۆولعا قارسى قىلمىستىق ىستە ەل نامىسىن قورعاماق.
