الەمجەلىدە اسلان ەسىمدى TikTok قولدانۋشىسى كەڭەس ۇكىمەتىن ماقتاپ، ورىس ءتىلىن قولداپ، "ورىس ءتىلىن بىلمەيتىندەر ادام ەمەس" دەگەن سىڭايداعى ۆيدەولار ءتۇسىرىپ ءجۇر. ءتىپتى ول ۆيدەولارىنىڭ بىرىندە داۋلى مالىمدەمەسىمەن سىنعا قالعان تينا كاندەلاكيدى دە اشىق قولدايدى، - دەپ جازادى Dalanews.kz.

ۆيدەولارى ميلليونداعان قارالىم جينايتىن ەر ادامنىڭ وقىرمانى دا از ەمەس. ونىڭ ينستاگرامداعى پاراقشاسىنا 5،5 مىڭ ادام، TikTok-پاراقشاسىنا 44،4 مىڭ ادام جازىلعان.

ول ۆيدەولارىنىڭ بىرىندە قازاقستاندا ورىس ءتىلى "راسىندا، شەتتەتىلىپ جاتقانىن" ايتىپ، تينا كاندەلاكيگە قولداۋ بىلدىرگەن. ءبىر قىزىعى بۇگىندە 1،4 ميلليون قارالىم جيناعان بۇل ۆيدەوسىنا ونى قولداپ، پىكىر جازعاندار دا تابىلعان.

"ول (تينا كاندەلاكي - ەسك.) جاي عانا ءوز ويىن ايتتى. ەشكىمدى قورلاعان جوق، دالەلدەرىن دە كەلتىردى. وعان قازاقستانعا كىرۋگە تىيىم سالاتىنداي قاي جەردە قاتەلەستى؟ سۇراق: بىزدە ورىس ءتىلى مەملەكەتتىك دەڭگەيدە شەتتەتىلىپ جاتقان جوق پا نە؟ مەكتەپتەردە ورىس ءتىلى ساعاتتارى قىسقارعان. بالام قازاق تىلىندە وقىعاندىقتان ورىس ءتىلىن قاتار مەڭگەرگەنىن قالادىم. جەرگىلىكتى ءتىل ۇيرەتۋ مەكتەپتەرىن قاراپ شىققانىمدا ولار ماعان "كەشىرىڭىز، ءبىز تەك اعىلشىن جانە قازاق ءتىلىن ۇيرەتەمىز" دەيدى. ءبىزدىڭ مينيستر نە دەگەنىن ەسكە الايىقشى. ول ماسس مەديا تۋرالى زاڭدى "ماعان رۇقسات بەرسە 100 پايىز قازاقشا دايىندايتىن ەدىم" دەدى. بۇل ماسەلەنى دەپۋتاتتار دا قولداپ وتىر"، - دەيدى اسلان.

تاعى ءبىر ۆيدەوسىندا ەر ادام ورىس ءتىلى قازاقتار ءۇشىن ماڭىزدى ورىندا بولۋى كەرەگىن ايتادى.

"ورىس ءتىلى بارلىق ءىلىم مەن ءبىلىمنىڭ كىلتى، ول ارقىلى كەز كەلگەن ەسىكتى اشا الاسىڭ. الەمدە ميلليونداعان ادامنىڭ بايلانىس ورناتۋىنىڭ كىلتى"، - دەيدى اسلان.

ۆيدەودا ول قازاقتار ءۇشىن ورىس ءتىلى شەكسىز بايلىق ەكەنىن دە جەتكىزگەن.

"بىزگە ورىس ءتىلىن قولدانباۋ - كۇنا. ورىس تىلىمەن تەك باي بولا تۇسەمىز. مەن ءۇشىن ورىس ءتىلى ەرەكشە باعالى. ورىس ءتىلى - بالا كۇنىمنەن باستاۋ العان تۋعان ءتىلىم. مەن تۋعان ءتىلىم ءتىلىمدى ماداقتايمىن"، - دەيدى ول.

Dalanews.kz رەداكسياسى ءتيىستى ورگانداردان بۇل تيكتوك-پاراقشاعا قاتىستى پىكىر ءبىلدىرۋىن سۇرادى.