Álemjelide Aslan esimdi TikTok qoldanýshysy Keńes úkimetin maqtap, orys tilin qoldap, "orys tilin bilmeitinder adam emes" degen syńaidaǵy videolar túsirip júr. Tipti ol videolarynyń birinde daýly málimdemesimen synǵa qalǵan Tina Kandelakidi de ashyq qoldaidy, - dep jazady Dalanews.kz.
Videolary milliondaǵan qaralym jinaityn er adamnyń oqyrmany da az emes. Onyń instagramdaǵy paraqshasyna 5,5 myń adam, TikTok-paraqshasyna 44,4 myń adam jazylǵan.
Ol videolarynyń birinde Qazaqstanda orys tili "rasynda, shettetilip jatqanyn" aityp, Tina Kandelakige qoldaý bildirgen. Bir qyzyǵy búginde 1,4 million qaralym jinaǵan bul videosyna ony qoldap, pikir jazǵandar da tabylǵan.
"Ol (Tina Kandelaki - esk.) jai ǵana óz oiyn aitty. Eshkimdi qorlaǵan joq, dálelderin de keltirdi. Oǵan Qazaqstanǵa kirýge tyiym salatyndai qai jerde qatelesti? Suraq: bizde orys tili memlekettik deńgeide shettetilip jatqan joq pa ne? Mektepterde orys tili saǵattary qysqarǵan. Balam qazaq tilinde oqyǵandyqtan orys tilin qatar meńgergenin qaladym. Jergilikti til úiretý mektepterin qarap shyqqanymda olar maǵan "keshirińiz, biz tek aǵylshyn jáne qazaq tilin úiretemiz" deidi. Bizdiń ministr ne degenin eske alaiyqshy. Ol mass media týraly zańdy "maǵan ruqsat berse 100 paiyz qazaqsha daiyndaityn edim" dedi. Bul máseleni depýtattar da qoldap otyr", - deidi Aslan.
Taǵy bir videosynda er adam orys tili qazaqtar úshin mańyzdy orynda bolýy keregin aitady.
"Orys tili barlyq ilim men bilimniń kilti, ol arqyly kez kelgen esikti asha alasyń. Álemde milliondaǵan adamnyń bailanys ornatýynyń kilti", - deidi Aslan.
Videoda ol qazaqtar úshin orys tili sheksiz bailyq ekenin de jetkizgen.
"Bizge orys tilin qoldanbaý - kúná. Orys tilimen tek bai bola túsemiz. Men úshin orys tili erekshe baǵaly. Orys tili - bala kúnimnen bastaý alǵan týǵan tilim. Men týǵan tilim tilimdi madaqtaimyn", - deidi ol.
Dalanews.kz redaktsiiasy tiisti organdardan bul tiktok-paraqshaǵa qatysty pikir bildirýin surady.
