ءبىرىنشى ماسەلە اياسىندا ءسوز باستاعان وبلىستىق كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارما باسشىسىنىڭ ورىنباسارى ءىلياس وسپانوۆ باسقارما تاراپىنان بۇگىنگى تاڭدا باعانى تۇراقتاندىرۋ جۇمىستارى اتقارىلىپ جاتقانىن باياندادى.
وبلىستىق ستاتيستيكا دەپارتامەنتىنىڭ مالىمەتىنە سايكەس، وبلىستا اعىمداعى جىلدىڭ باسىنان بۇگىنگى كۇنگە دەيىن 6 ءتۇرلى ازىق-تۇلىك تاۋارى – قىرىققابات، كارتوپ، پياز، قوي ەتى، تۇزدالماعان سارى ماي جانە مايەكتى قاتتى ىرىمشىكتىڭ قۇنى قىمباتتاعانى بايقالعان.
باسشى ورىنباسارى مۇنىڭ سەبەبىن ءبىرقاتار ازىق-تۇلىك تاۋارلارىنىڭ كورشىلەس قىزعىزستان مەن وزبەكستان، رەسەي، بەلارۋسسيا ەلدەرىنەن جانە ەلىمىزدىڭ وزگە دە وبلىستارىنان تاسىمالدانىپ جاتقانىنان دەپ اتادى.
وسىناۋ ولقىلىقتى تۇزەۋ ءۇشىن وبلىس اكىمى ەگىن ەگىپ، مال بورداقىلاۋعا ارنالعان جەر تەلىمى بولا تۇرا، اتالعان جۇمىستارمەن اينالىسپاي جۇرگەن وڭىرىمىزدەگى بوس جاتقان جەرلەردىڭ كارتاسىن ازىرلەۋدى جۇكتەدى. سونىڭ اياسىندا قاجەتتى شارا قابىلداپ، باعانى تۇراقتاندىرۋعا بولاتىنىن جەتكىزگەن اكىم تۇراقتاندىرۋ قورىن جەرگىلىكتى ازىق-تۇلىك تاۋارلارىمەن تولىقتىرىپ، ايماقتى قاجەتتى ونىممەن تولىقتاي قامتاماسىز ەتۋ جايىن ويلاستىرۋ كەرەكتىگىن ايتتى.
جيىنداعى ەكىنشى ماسەلە جايىندا ءسوز العان وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ ۇكىمەت وتىرىسىندا قارالاتىن ماسەلەلەردىڭ ءبىرى – دەنساۋلىق ساقتاۋدى دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىنىڭ جۇزەگە اسىرۋ جايىن مالىمدەدى. كەلتىرىلگەن مالىمەتكە سايكەس، اتالعان باعدارلاما نەگىزىندە 2016 جىلعا بولىنگەن قاراجات تولىقتاي يگەرىلىپ، ءبىرقاتار سالالارداعى كورسەتكىش جاقسارعان.
اتاپ ايتقاندا، وبلىسىمىزداعى قان ايلانىم جۇيەسى اۋرۋلارىنان ءولىم-جىتىم كورسەتكىشى 8،9 پايىزعا، قاتەرلى ىسىكتەردەن بولاتىن ءولىم-جىتىم كورسەتكىشى 7،4 پايىزعا، جاراقاتتاردان، جازاتايىم وقيعالاردان ءولىم-جىتىم كورسەتكىشى 8،7 پايىزعا جانە نارەستە ءولىم-جىتىم كورسەتكىشى 19،4 پايىزعا تومەندەگەن.
مۇنان بولەك، دەنساۋلىق ساقتاۋ باسقارماسىنىڭ باسشىسى بىرىكتىرىلگەن مەديسينالىق كومەك قاعيداتىنىڭ نەگىزىندە باسىمدىقتى باعىتتار بويىنشا جول كارتاسى ازىرلەنىپ، جۇزەگە اسىرىلىپ جاتقانىن ايتتى.
وسى سىندى مالىمەتتەرگە قانىققان جانسەيىت قانسەيت ۇلى ءاربىر سالاعا ءجىتى نازار اۋدارىپ، جوسپاردى ودان ءارى پىسىقتاپ، كەشەندى جۇمىس ىستەۋ قاجەتتىگىن ەسكەرتتى.
