Birinshi másele aiasynda sóz bastaǵan oblystyq Kásipkerlik, indýstrialdy-innovatsiialyq damý jáne týrizm basqarma basshysynyń orynbasary Iliias Ospanov basqarma tarapynan búgingi tańda baǵany turaqtandyrý jumystary atqarylyp jatqanyn baiandady.
Oblystyq statistika departamentiniń málimetine sáikes, oblysta aǵymdaǵy jyldyń basynan búgingi kúnge deiin 6 túrli azyq-túlik taýary – qyryqqabat, kartop, piiaz, qoi eti, tuzdalmaǵan sary mai jáne máiekti qatty irimshiktiń quny qymbattaǵany baiqalǵan.
Basshy orynbasary munyń sebebin birqatar azyq-túlik taýarlarynyń kórshiles Qyzǵyzstan men Ózbekstan, Resei, Belarýssiia elderinen jáne elimizdiń ózge de oblystarynan tasymaldanyp jatqanynan dep atady.
Osynaý olqylyqty túzeý úshin oblys ákimi egin egip, mal bordaqylaýǵa arnalǵan jer telimi bola tura, atalǵan jumystarmen ainalyspai júrgen óńirimizdegi bos jatqan jerlerdiń kartasyn ázirleýdi júktedi. Sonyń aiasynda qajetti shara qabyldap, baǵany turaqtandyrýǵa bolatynyn jetkizgen ákim turaqtandyrý qoryn jergilikti azyq-túlik taýarlarymen tolyqtyryp, aimaqty qajetti ónimmen tolyqtai qamtamasyz etý jaiyn oilastyrý kerektigin aitty.
Jiyndaǵy ekinshi másele jaiynda sóz alǵan oblystyq Densaýlyq saqtaý basqarmasynyń basshysy Muqan Egizbaev Úkimet otyrysynda qaralatyn máselelerdiń biri – densaýlyq saqtaýdy damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń júzege asyrý jaiyn málimdedi. Keltirilgen málimetke sáikes, atalǵan baǵdarlama negizinde 2016 jylǵa bólingen qarajat tolyqtai igerilip, birqatar salalardaǵy kórsetkish jaqsarǵan.
Atap aitqanda, oblysymyzdaǵy qan ailanym júiesi aýrýlarynan ólim-jitim kórsetkishi 8,9 paiyzǵa, qaterli isikterden bolatyn ólim-jitim kórsetkishi 7,4 paiyzǵa, jaraqattardan, jazataiym oqiǵalardan ólim-jitim kórsetkishi 8,7 paiyzǵa jáne náreste ólim-jitim kórsetkishi 19,4 paiyzǵa tómendegen.
Munan bólek, Densaýlyq saqtaý basqarmasynyń basshysy biriktirilgen meditsinalyq kómek qaǵidatynyń negizinde basymdyqty baǵyttar boiynsha Jol kartasy ázirlenip, júzege asyrylyp jatqanyn aitty.
Osy syndy málimetterge qanyqqan Janseiit Qanseituly árbir salaǵa jiti nazar aýdaryp, jospardy odan ári pysyqtap, keshendi jumys isteý qajettigin eskertti.
