"حالىقارالىق باعدارلامالار ورتالىعى" اق تۇركيا ەلىندە ءقازىر تاعىلىمداما باعدارلاماسى بويىنشا ءبىلىم الىپ جاتقان 25 قازاقستاندىق بار ەكەنىن ناقتىلايدى.

"بارلىق ءبىلىم الۋشىلار ءقاۋىپسىز جەردە ءارى كۋراتورلارىمەن جانە قازاقستاننىڭ ديپلوماتيالىق وكىلدىكتەرىمەن بايلانىستا. ولارعا قاجەت بولعان جاعدايدا كومەك كورسەتىلەدى. ق ر سىرتقى ىستەر مينيسترلىگى ەل ازاماتتارىنا ادامدار كوپ جينالاتىن ورىندارعا بارۋدان ۋاقىتشا باس تارتۋدى، ساقتىق شارالارىن ەسكەرۋدى جانە جەرگىلىكتى بيلىكتىڭ ۇسىنىمدارىن ورىنداۋدى سۇرايدى"، دەلىنگەن حابارلامادا.

كەشە، 23 ناۋرىزدا قازاقستاننىڭ تۇركياداعى ەلشىلىگى قازاقستاندىقتاردان نارازىلىق اكسيالارىنا قاتىسۋدان اۋلاق بولۋدى جانە ادامدار كوپ جينالاتىن ورىندارعا بارماۋدى سۇرادى. سونداي-اق "نارازىلىق تۋرالى اقپارات پەن بولىپ جاتقان وقيعالارعا قاتىستى پىكىرلەردى الەۋمەتتىك جەلىلەردە تاراتپاۋعا شاقىردى.

ەلشىلىكتىڭ بۇل مالىمدەمەسى الەۋمەتتىك جەلى قولدانۋشىلارى تاراپىنان قاتتى سىنعا ۇشىرادى.

ايتا كەتسەك، ىستامبۇل مەرى ەكرەم يماموعلۋ مەن ونىڭ باق-پەن بايلانىستى كەڭەسشىسى مۇرات ونگۋن 19 ناۋرىزدا ارنايى وپەراسيا بارىسىندا ۇستالىپ، سوتقا جەتكىزىلدى. ءىس بويىنشا سوتقا بارلىعى 100 كۇدىكتى تارتىلعان. وسىدان كەيىن ەل ىشىندە الەۋمەتتىك جەلىلەردىڭ جۇمىسى شەكتەلدى. سونىمەن قاتار، مەردىڭ ۇستالۋىنا بايلانىستى ىستامبۇلدا 23 ناۋرىزعا دەيىن دەمونستراسيالار مەن ميتينگىلەر وتكىزۋگە تىيىم سالىندى.

نەگىزى، الداعى جەكسەنبىدە رەسپۋبليكالىق حالىق پارتياسىنىڭ سەزىندە يماموعلۋ 2028 جىلعى پرەزيدەنتتىك سايلاۋدا وپپوزيسيا اتىنان تۇسەتىن كانديدات رەتىندە جاريالانادى دەپ كۇتىلگەن ەكەن. ال پرەزيدەنتتىك سايلاۋدىڭ مەرزىمىنەن بۇرىن، ياعني 2027 جىلدىڭ قاراشاسىندا ءوتۋى دە مۇمكىن ەكەندىگى تۋرالى دا سىبىس بار. 

بۇعان دەيىن سايتىمىزدا "توڭكەرىس بولا جازدادى". قور نارىعى قۇلدىراپ، تۇركيا دۇربەلەڭگە بوي ۇرۋدا" دەگەن ماقالا جاريالانعان. سونداي-اق تۇركيانىڭ 15 ميلليونعا جۋىق ازاماتى قاماۋعا الىنعان ىستامبۇل مەرى ەكرەم يماموعلۋدى ەل پرەزيدەنتتىگىنە كانديدات رەتىندە ۇسىندى.