الماتىداعى وليمپيادالىق دايارلاۋ ورتالىعىنىڭ سپورتتىق بازاسىندا جۇزۋدەن جاستار اراسىندا قازاقستان چەمپيوناتى ءوتتى. ەلشىلىك دوداعا 2006 جىلى تۋعان جانە ودان كىشى جاسوسپىرىمدەر قۇراماسىنىڭ ەڭ مىقتى جۇزۋشىلەرى قاتىستى. سۋ ايدىنىنداعى باسەكەگە 25 كوماندا قۇرامىندا 284 سپورتشى ءتۇرلى باعدارلاما بويىنشا سايىسقا ءتۇستى،دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ. 

جارىس قورىتىندىسىندا تۇركىستان وبلىسىنىڭ سپورتشىلارى تابىستى ونەر كورسەتتى. ءوڭىر مەرەيىن اسقاقتاتقان سپورتشىلاردىڭ دەنى سۋ سپورت تۇرلەرىنەن وبلىستىق وليمپيادا رەزەرۆىنىڭ مامانداندىرىلعان بالالار-جاسوسپىرىمدەر سپورت مەكتەبىنىڭ شاكىرتتەرى. ولاردىڭ ەنشىسىندە 3 التىن، 1 كۇمىس جانە 1 قولا مەدال بار. جۇلدە سالعان سپورتشىلار قاتارىندا داريا توكتوبايەۆا 200، 400 مەتر قاشىقتىققا كەشەندى جۇزۋدەن جانە 200 مەتردە شالقالاي جۇزۋدە قارسىلاستارىن قاپى قالدىرىپ، التىننان القا تاقسا، 400 مەتر ەركىن جۇزۋدە ەكىنشى ورىن الدى.

ەل چەمپيوناتىندا جۇلدە سالعان تاعى ءبىر جەرلەسىمىز – شىڭعىسحان بالابەك. قاراتوبە اۋىلىنىڭ تۋماسى 1500 مەترگە ەركىن جۇزۋدە قولاعا قاناعات ەتىپ، قازاقستان رەسپۋبليكاسىنىڭ سپورت شەبەرىنە ۇمىتكەر اتاندى.

ايتا كەتەيىك، 28 قازان مەن 4 قاراشا ارالىعىندا سينگاپۋردە وتەتىن الەم كۋبوگى وتەدى. الماتى تورىندە وسى سىنعا ەرەسەكتەر اراسىندا ىرىكتەۋ ءوتتى. وبلىس ماقتانىشتارى سوفيا سپودارەنكو 50 مەتر قاشىقتىققا باتتەرفلياي ادىسىمەن، ادەلايدا پچەلينسيەۆا 50 مەترگە براسس ادىسىمەن جۇزۋدەن وسى دوداعا جولداما الدى.

ەندى تۇركىستان وبلىسىنىڭ قۇراماسى اعا جاتتىقتىرۋشى ج. شالداربەكوۆ پەن قازاقستاننىڭ ەڭبەك سىڭىرگەن جاتتىقتىرۋشىسى ا.سمولەيەۆتىڭ جەتەكشىلىگىمەن الەم چەمپيوناتىنا جانە قازاقستاننىڭ قىسقى چەمپيوناتىنا دايىندىقتى باستايدى.