تۇركىستاندا ۇلتتىق ءبىرىڭعاي تەستىلەۋگە دايىندالۋعا ارنالعان رەسپۋبليكالىق «Daryn.online» ءبىلىم بەرۋ پلاتفورماسىنىڭ تانىستىرىلىمى ءوتتى. وبلىستىق جاستار رەسۋرستىق ورتالىعى باسشىسىنىڭ ورىنباسارى پەردەبەك ەسقۇلوۆ جوعارى سىنىپ وقۋشىلارىنا پلاتفورمانىڭ تيىمدىلىگى مەن قولجەتىمدىلىگى مەن ءبىلىم بەرۋ سالاسىنداعى جاڭا مۇمكىندىكتەر تۋرالى ايتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەزدەسۋگە ارنايى قاتىسقان حالىقارالىق «Daryn.online» كومپانياسىنىڭ ءبولىم باسشىسى بايدىبەك قۋاتباي پلاتفورما تۋرالى جان-جاقتى اقپارات بەردى. «Daryn.online – قازاقستانداعى ءبىلىم الۋعا دەگەن سۇرانىستى تولىعىمەن قامتيتىن بىرەگەي پلاتفورما. ءبىزدىڭ ماقساتىمىز – وقۋشىلاردىڭ ءبىلىم الۋ ۇدەرىسىن بارىنشا جەڭىلدەتىپ، ساپالى ءارى قولجەتىمدى وقۋ رەسۋرستارىن ۇسىنۋ. تۇركىستان وبلىسىنداعى جاستاردىڭ بىلىمگە دەگەن ۇمتىلىسى ەرەكشە، سول سەبەپتى وسىنداي كەزدەسۋلەردىڭ ماڭىزى زور» دەدى ول.
كەزدەسۋ بارىسىندا وقۋشىلار مەن اتا-انالارعا پلاتفورمانىڭ مۇمكىندىكتەرى، فۋنكسيونالدارى مەن ۇبت-عا دايىندىققا ارنالعان كۋرستارى تانىستىرىلدى. سونىمەن قاتار تۇركىستان وبلىسىنىڭ 17 اۋدان، قالاسىنان كەلگەن 50 وقۋشىعا «Daryn.online» پلاتفورماسىنا تەگىن تىركەلۋ مۇمكىندىگى ۇسىنىلدى. قاتىسۋشىلار وزدەرىن قىزىقتىرعان سۇراقتارعا جاۋاپ الىپ، ءبىلىم بەرۋ جۇيەسىندەگى جاڭا سيفرلىق تەحنولوگيالارمەن جاقىنىراق تانىستى.ودان بولەك، ۇيىمداستىرۋشىلار ەرەكشە موتيۆاسيا رەتىندە 130 بالدان جوعارى ناتيجە كورسەتكەن وقۋشىلارعا دۋبايعا جولداما بەرىلەتىنىن جاريالادى. بۇل باستاما وقۋشىلاردىڭ ىنتاسىن ارتتىرىپ، جوعارى ناتيجەگە جەتۋگە ۇلكەن سەرپىن بەرمەك.
ايتا كەتەيىك، «Daryn.online» پلاتفورماسى – ءبىلىم الۋشىلاردىڭ ءبىلىم دەڭگەيىن كوتەرۋگە باعىتتالعان زاماناۋي قۇرال. بۇل باستاما تۇركىستان جاستارى ءۇشىن ساپالى بىلىمگە قول جەتكىزۋگە جاڭا جول اشىپ وتىر. تۇركىستان وبلىسى قوعامدىق دامۋ باسقارماسى «جاستار رەسۋرستىق ورتالىعى» كمم-نىڭ ۇيىمداستىرۋمەن وتكەن ءىس-شارانىڭ ماقساتى – ءوڭىر جاستارىن ساپالى ءبىلىم رەسۋرستارىمەن قامتاماسىز ەتىپ، ۇبت-عا ءتيىمدى دايىندىق جۇرگىزۋگە مۇمكىندىك بەرۋ.
