شارا اياسىندا شاكىرتتەر مۋزەي قىزمەتكەرلەرى ورازوۆ تالعات پەن بەرىكباي ءابدراسيلوۆتىڭ قوجا احمەت ياساۋي ەسىمىمەن بايلانىستى مۋزەي قورىنداعى تاريحي مۇرالار جانە كەسەنە عيماراتىنىڭ ارحيتەكتۋراسى مەن قۇرىلىمى، وندا ساقتالعان كۇندى جادىگەرلەر جايىندا لەكسياسىن تىڭدادى.
جىل باسىنان بەرى قالانىڭ بارلىق ءبىلىم ۇيالارىندا جوسپارعا سايكەس تۇراقتى تۇردە ۇيىمداستىرىلىپ جاتقان شارانىڭ ماقساتى- سان عاسىرلىق تاريحى بار، بارشا تۇركى جۇرتى باس يگەن قوجا احمەت ياساۋي ءومىرى مەن ۇلاعاتتى ۇلگى-ونەگەسىن جاس ۇرپاققا كەڭىنەن ناسيحاتتاۋ، مۇرالار تاريحىمەن ارنايى تانىستىرىپ، تۋعان جەر مەن ەلدىڭ قادىرىنە سۇيىسپەنشىلىكپەن قاراۋعا ۇلەس قوسۋ، كەسەنە مەن وندا جەرلەنگەن تۇلعالاردىڭ ماڭگىلىك ءىزىن ۇعىندىرۋ.
وسى ورايدا مامانداردىڭ ماعلۇماتىن تىڭداپ، اڭىز-اڭگىمەلەر مەن تاريحي دەرەكتەرگە دە قىزىعا قۇلاق تۇرگەن وقۋشىلار كورمەگە كەلگەن تۋىندىلاردىڭ سىرى مەن قۇپياسىنا ءۇڭىلدى.
اسىرەسە، كەسەنەنىڭ قازانداق بولمەسىنىڭ ەسىگى جايلى اقپاراتقا ىنتىققان جاسوسپىرىمدەر قاقپانى بەزەندىرگەن وسىمدىك تەكتەس ويۋلارمەن قاتار ونداعى تەرەڭ ءماندى سوزدەردىڭ ءمانىن ءتۇسىندى. سونداي-اق، تايقازاننىڭ سىرتقى بەزەندىرىلۋىندە دە تەك قازاقي ناقىشتار ەمەس، ءتۇرلى اراب جازۋى ارقىلى قۇران اياتتارى مەن پايعامبار حاديستەرى جازىلعاندىعى تۋرالى مالىمەت وقۋشىلارعا ايرىقشا رۋح سىيلاعانداي.
- عاسىردان-عاسىرعا مۇرا بولىپ كەلە جاتقان ءتول تاريحىمىزدىڭ، ماڭگىلىك مۇرامىز بەن مۇراتىمىزدىڭ دالەلى — قولدا بار جادىگەرلەرىمىز. بۇل باستاما وزگە دە ءبىلىم ۇيالارىندا جالعاسىن تابادى. ءبىزدىڭ كەلەشەگىمىز-بۇگىنگى ۇرپاق. كەسەنەگە جانە كەسەنە اۋماعىنداعى تاريحي ورىندار مەن تۇلعالار، ءتول مۇرالارى جايلى ماعلۇماتتى بارىنشا ناسيحاتتاپ، جاس ساناعا ءسىڭىرۋ تاريحىمىزعا قۇرمەتپەن قاراۋعا تاربيەلەيتىنى ءسوزسىز. وعان بۇگىن تاعى دا كوز جەتكىزدىك. قاقپا مەن تايقازان زات تۇرىندەگى تاريحي جادىگەرلەر ەمەس، قويناۋى قانشاما سىر مەن ءمان-ماعىناعا تولى ەكەندىگىن ءبىلىپ، قىزىققاندارىنا ەرەكشە قۋاندىم. ءتىپتى، ەرتەڭ كەسەنەگە ارنايى كەلىپ، جادىگەرلەردى كوزبەن كورىپ، تانىسۋعا سۇرانىپ جاتىر. بۇگىنگى ءبىر ساعات ىشىندە العان مالىمەتتەر اياسىندا وقۋشىلار ءتول تاريحىمىزدىڭ بەتتەرىن قىزىعا پاراقتايتىنىنا سەنەمىن»،-دەدى مۋزەي قىزمەتكەرى تالعات ورازوۆ.
