تۇركىستان قالاسىندا ۇكىمەتتىك ەمەس ۇيىمداردىڭ وبلىستىق VIII ازاماتتىق فورۋمى باستالدى.
ەكى جىلدا ءبىر رەت وتكىزىلەتىن اتالمىش فورۋم —قوعامدىق ۇيىمدار مەن بيلىك وكىلدەرىنىڭ اراسىنداعى ءوزارا ىنتىماقتاستىق پەن ءىس-قيمىل جۇرگىزۋ ءۇشىن قۇرىلعان سۇحبات الاڭى.
تۇركىستان وبلىسى اكىمدىگىنىڭ ىشكى ساياسات باسقارماسى ۇيىمداستىرعان فورۋم اياسىندا «ۇكىمەتتىك ەمەس ۇيىمنىڭ ۇيىمدىق دامۋى» جانە «جاستار ۇيىمدارىنىڭ ازاماتتىق قوعامدى دامىتۋداعى ءرولى. ەرىكتىلەر قوزعالىسىن دامىتۋ» تاقىرىپتارىندا 2 پلەنارلىق سەكسيا ءوتتى.
ءداستۇرلى شارا مەملەكەتتىك ساياساتتى جۇزەگە اسىرۋداعى قوعامنىڭ ۇكىمەتتىك ەمەس سەكتورى مەن مەملەكەتتىك ورگاندارمەن قارىم-قاتىناسىن دامىتۋ ماقساتىندا ۇيىمداستىرىلدى.
«قاسيەت» قوعامدىق بىرلەستىگىنىڭ ءتورايىمى گۇلسىم اندابايەۆا مەن «جالىن» جاستار ۇيىمى» قوعامدىق بىرلەستىگىنىڭ ءتوراعاسى قۇرمەت كەرىمبەكوۆ پلەنارلىق سەكسيانىڭ تىزگىنشىسى رەتىندە جيىنعا كەلگەن ۇكىمەتتىك ەمەس ۇيىمداردىڭ، قوعامدىق بىرلەستىكتەردىڭ مۇشەلەرىمەن بىرگە ءوز وي-پىكىرلەرىن، ۇسىنىستارىن ورتاعا سالدى.
سونداي-اق، جيىندا تۇركىستان وبلىسى اكىمدىگىنە قاراستى باسقارمالاردىڭ وكىلدەرى مەملەكەت تاراپىنان جاسالىنىپ جاتقان الەۋمەتتىك جوبالاردىڭ سيپاتتاماسىنا، ونىڭ جاستارعا تيىمدىلىگىنە توقتالدى.
جاستار بولاشاعىنا بەي-جاي قارامايتىن قوعامدىق بىرلەستىكتەر مەن ۇكىمەتتىك ەمەس ۇيىمدار سپيكەرلەرگە «جاستار ۇيىمدارىمەن قانداي ارىپتەستىك بايلانىستار بار؟ اتالمىش ۇيىمعا قانداي ۇسىنىس بەرىلەدى؟ فورۋم بارىسىندا نەندەي پىكىرلەر ايتىلماق؟» سىندى ءبىرقاتار ساۋالدارعا جاۋاپ الدى.
پلەنارلىق سەكسيا بارىسىندا ايتىلعان ۇسىنىستار حاتتاماعا جازىلىپ، ءتيىستى ورىندارعا جولدانادى.
