تۇركىستان وبلىسىنىڭ تۇرعىنى، جالعىزباستى انا احمەتوۆا فاۋزيا قازاقستان پرەزيدەنتى قاسىم-جومارت توقايەۆقا بەينەۇندەۋ جاساپ، باسىنان وتكەن اۋىر جاعداي تۋرالى ايتىپ بەردى، دەپ حابارلايدى Dalanews.kz.
ونىڭ سوزىنشە، 2025 جىلدىڭ 25 ساۋىرىندە تاڭعى ساعات 5:30 شاماسىندا بەلگىسىز ءۇش ەر ادام ونى تۇركىستان قالاسىنداعى ءوز ۇيىنەن بالالارىنىڭ كوزىنشە كۇشتەپ الىپ كەتىپ، شىمكەنت قالاسىنداعى “Komek Center” دەپ اتالاتىن وڭالتۋ ورتالىعىنا اپارعان.
“اتالعان ورتالىق وزدەرىن رەابيليتاسيالىق ورتالىق رەتىندە تانىستىرىپ، مەنى ەشقانداي مەديسينالىق نەمەسە قۇقىقتىق نەگىزسىز ۇستاپ وتىردى. مەنىڭ ەسىرتكىگە نەمەسە باسقا دا پسيحو-بەلسەندى زاتتارعا ەش قاتىسىم جوق. ەشقانداي ەسەپتە تۇرمايمىن. سوعان قاراماستان مەنى كۇشپەن ۇستاپ، ۇرىپ-سوعىپ، قول قويۋعا ماجبۇرلەدى. قول قويماعانىم ءۇشىن دارى-دارمەك ىشكىزىپ، ەسىمدى بىلمەي قالۋ دەڭگەيىنە جەتكىزدى””، — دەيدى ول "پيسما پرەزيدەنتۋ" تەلەگرام ارناسىندا جاريالانعان ۇندەۋىندە.
ايەل بىرنەشە مارتە وزىنە قول جۇمساپ، كومەكتەسەر دەگەن ۇمىتپەن قولىن ءتىلىپ تاستاعانىن دا ەسكە الدى.
“اياق-قولىمدى سكوچپەن بايلاپ تاستادى. جانىم قينالعاننان وز-وزىمە قول جۇمساپ، قولىمدى بىرنەشە رەت كەستىم. ماقساتىم — جەدەل جاردەم شاقىرىپ، ۇيىمە حابار جەتكىزۋ ەدى. الايدا ەشقانداي مەديسينالىق كومەك كورسەتىلمەي، كەرىسىنشە قايتا اياق-قولىمدى سكوچتاپ تاستادى. ون كۇن بويى زاڭسىز ۇستالدىم”، — دەپ قوستى ول.
ايتۋىنشا، 5 مامىر كۇنى عانا ول تۋىستارىنا حابارلاسىپ، سولاردىڭ كومەگىمەن ورتالىقتان شىعارىلعان.
“سول جەردە كامەلەتكە تولماعان قىزدار مەن بالالار دا بار ەدى. ولاردى دا قورقىتىپ، ەركىنەن تىس ۇستاپ وتىرعانىن كوزىممەن كوردىم. بۇل زاڭسىزدىققا جول بەرۋگە بولمايدى”، — دەپ كۇيىندى ول.
فاۋزيا احمەتوۆا كەيىن شىمكەنت قالاسىنىڭ پوليسيا دەپارتامەنتىنە ارىز جازعان. الايدا ونىڭ سوزىنشە، وقيعادان جيىرما كۇن وتسە دە، قۇزىرلى ورگاندار ەشقانداي تەرگەۋ امالدارىن باستاماعان. وسىعان بايلانىستى احمەتوۆا مەملەكەت باسشىسىنان ءىستى جەكە باقىلاۋعا الىپ، كىنالى تۇلعالاردىڭ زاڭ الدىندا جاۋاپ بەرۋىن سۇرادى.
“زاڭسىز وڭالتۋ ورتالىعى ءالى دە جۇمىسىن توقتاتپاي وتىر. بۇل جاعداي قۇقىق قورعاۋ ورگاندارىمەن اتالعان ورتالىقتىڭ اراسىندا سىبايلاستىق بار دەگەن كۇمان تۋعىزۋدا. وسى وقيعا بويىنشا مەنىڭ زاڭسىز ۇستالعانىم مەن زورلىق-زومبىلىققا ۇشىراعانىمدى، “Komek Center” دەپ اتالاتىن ورتالىقتىڭ مەديسينالىق ليسەنزياسىز جۇمىس ىستەپ وتىرعانى، وندا كامەلەتكە تولماعان بالالاردىڭ دا زاڭسىز ۇستالعانى، پوليسيا ارىزىمدى قاراۋسىز قالدىرعانىن، ءوزىمنىڭ بالالارىمنىڭ قاۋىپسىزدىگى ءۇشىن الاڭدايتىنىمدى ەسكەرە وتىرىپ، سىزدەن وسى ءىستى جەكە باقىلاۋىڭىزعا الىپ، ادىلەتتى تەرگەۋ جۇرگىزىلۋىن جانە كىنالى تۇلعالاردىڭ زاڭ الدىندا جاۋاپقا تارتىلۋىن سۇرايمىن”، — دەپ مالىمدەدى ول.
