Túrkistan oblysynyń turǵyny, jalǵyzbasty ana Ahmetova Faýziia Qazaqstan Prezidenti Qasym-Jomart Toqaevqa beineúndeý jasap, basynan ótken aýyr jaǵdai týraly aityp berdi, dep habarlaidy Dalanews.kz.
Onyń sózinshe, 2025 jyldyń 25 sáýirinde tańǵy saǵat 5:30 shamasynda belgisiz úsh er adam ony Túrkistan qalasyndaǵy óz úiinen balalarynyń kózinshe kúshtep alyp ketip, Shymkent qalasyndaǵy “Komek Center” dep atalatyn ońaltý ortalyǵyna aparǵan.
“Atalǵan ortalyq ózderin reabilitatsiialyq ortalyq retinde tanystyryp, meni eshqandai meditsinalyq nemese quqyqtyq negizsiz ustap otyrdy. Meniń esirtkige nemese basqa da psiho-belsendi zattarǵa esh qatysym joq. Eshqandai esepte turmaimyn. Soǵan qaramastan meni kúshpen ustap, uryp-soǵyp, qol qoiýǵa májbúrledi. Qol qoimaǵanym úshin dári-dármek ishkizip, esimdi bilmei qalý deńgeiine jetkizdi””, — deidi ol "Pisma Prezidentý" telegram arnasynda jariialanǵan úndeýinde.
Áiel birneshe márte ózine qol jumsap, kómekteser degen úmitpen qolyn tilip tastaǵanyn da eske aldy.
“Aiaq-qolymdy skotchpen bailap tastady. Janym qinalǵannan óz-ózime qol jumsap, qolymdy birneshe ret kestim. Maqsatym — jedel járdem shaqyryp, úiime habar jetkizý edi. Alaida eshqandai meditsinalyq kómek kórsetilmei, kerisinshe qaita aiaq-qolymdy skotchtap tastady. On kún boiy zańsyz ustaldym”, — dep qosty ol.
Aitýynsha, 5 mamyr kúni ǵana ol týystaryna habarlasyp, solardyń kómegimen ortalyqtan shyǵarylǵan.
“Sol jerde kámeletke tolmaǵan qyzdar men balalar da bar edi. Olardy da qorqytyp, erkinen tys ustap otyrǵanyn kózimmen kórdim. Bul zańsyzdyqqa jol berýge bolmaidy”, — dep kúiindi ol.
Faýziia Ahmetova keiin Shymkent qalasynyń politsiia departamentine aryz jazǵan. Alaida onyń sózinshe, oqiǵadan jiyrma kún ótse de, quzyrly organdar eshqandai tergeý amaldaryn bastamaǵan. Osyǵan bailanysty Ahmetova Memleket basshysynan isti jeke baqylaýǵa alyp, kináli tulǵalardyń zań aldynda jaýap berýin surady.
“Zańsyz ońaltý ortalyǵy áli de jumysyn toqtatpai otyr. Bul jaǵdai quqyq qorǵaý organdarymen atalǵan ortalyqtyń arasynda sybailastyq bar degen kúmán týǵyzýda. Osy oqiǵa boiynsha meniń zańsyz ustalǵanym men zorlyq-zombylyqqa ushyraǵanymdy, “Komek Center” dep atalatyn ortalyqtyń meditsinalyq litsenziiasyz jumys istep otyrǵany, onda kámeletke tolmaǵan balalardyń da zańsyz ustalǵany, politsiia aryzymdy qaraýsyz qaldyrǵanyn, ózimniń balalarymnyń qaýipsizdigi úshin alańdaitynymdy eskere otyryp, sizden osy isti jeke baqylaýyńyzǵa alyp, ádiletti tergeý júrgizilýin jáne kináli tulǵalardyń zań aldynda jaýapqa tartylýyn suraimyn”, — dep málimdedi ol.
