تۇركىستان وبلىسىندا ينۆەستيسيالىق احۋالدى جاقسارتۋ ماقساتىندا وڭتۇستىك كورەيا مەملەكەتىمەن كەلىسسوزدەر جۇرگىزىلىپ، ءبىرقاتار جوبالاردى ىسكە اسىرۋ جوسپارلانۋدا. تۇركىستان وبلىسىنىڭ اكىمى دارحان ساتىبالدى بۇگىن استانا قالاسىندا كورەيانىڭ ۆۋسونگ ءبىلىم بەرۋ قورىنىڭ ءتوراعاسى كيم دجون حونمەن ارنايى كەزدەسىپ، كەلىسسوز جۇرگىزدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءبىلىم بەرۋ باعىتىندا قارىم-قاتىناستى نىعايتۋعا باعىتتالعان كەزدەسۋدە تۇركىستان قالاسىندا اقپاراتتىق تەحنولوگيالار سالاسىنداعى قازاقستاندىق WOOSONG ۋنيۆەرسيتەتىن قۇرۋ تۋرالى الدىن الا كەلىسىم بارىسى تالقىلاندى.
ەل پرەزيدەنتى قاسىم-جومارت توقايەۆ ءبىلىم ساپاسىن ارتتىرۋ ءۇشىن الەمدەگى وزىق جوعارى وقۋ ورىندارىنىڭ فيليالدارىن ەلىمىزدە كوپتەپ اشۋدى تاپسىرعانى بەلگىلى. بۇل ەڭ الدىمەن بىلىكتى مامانداردى وقىتىپ شىعارۋعا، جوعارى تەحنولوگيالاردى يگەرۋگە جول اشادى. جاڭا ءبىلىم ورداسىنىڭ يننوۆاسيالار مەن وزىق تەحنولوگيالار ورتالىعىنا اينالارى انىق.
- ءسىزدىڭ ساپارىڭىز مەملەكەتتەرىمىز اراسىنداعى ءبىلىم بەرۋ ىنتىماقتاستىعىن تەرەڭدەتۋ جولىنداعى ماڭىزدى قادامداردىڭ ءبىرى بولىپ تابىلادى. بۇگىنگى كەزدەسۋ تۇركىستان قالاسىندا اقپاراتتىق تەحنولوگيالار سالاسىنداعى قازاقستاندىق WOOSONG ۋنيۆەرسيتەتىن قۇرۋ تۋرالى الدىن الا كەلىسىمدى تالقىلاۋعا جانە قول قويۋعا ارنالعان. بۇل ءبىزدىڭ وبلىسىمىزعا عانا ەمەس، بۇكىل قازاقستانعا ۇلكەن پايدا اكەلەتىن ماڭىزدى جوبا ەكەندىگىنە سەنىمدىمىز. Woosong قورىنىڭ اقپاراتتىق تەحنولوگيالار سالاسىنداعى تاجىريبەسى مەن بىلىكتىلىگى ءبىزدىڭ ءبىلىم بەرۋ جۇيەسىنىڭ دامۋىنا باعا جەتپەس ۇلەس بولادى. ءبىز ستۋدەنتتەرىمىز بەن وقىتۋشىلارىمىزدىڭ جاھاندىق دەڭگەيدە باسەكەگە قابىلەتتى بولۋىنا مۇمكىندىك بەرەتىن زاماناۋي ءبىلىم مەن تەحنولوگيالارعاقول جەتكىزۋىن قامتاماسىز ەتۋگە ۇمتىلامىز. ءبىزدىڭ باستى ماقساتتارىمىزدىڭ ءبىرى - ادامي كاپيتالدى دامىتۋ. بىرلەسكەن ءبىلىم بەرۋ باعدارلامالارى، عىلىمي زەرتتەۋلەر جانە ستۋدەنتتەر مەن وقىتۋشىلار الماسۋى اقپاراتتىق تەحنولوگيالار سالاسىندا جوعارى بىلىكتى مامانداردى دايارلاۋ ءۇشىن قولايلى جاعدايلار جاسايتىنىنا سەنىمدىمىز،- دەدى تۇركىستان وبلىسىنىڭ اكىمى دارحان ساتىبالدى.
جاڭا ءبىلىم ورداسىن اشۋ جوباسىنىڭ تۇركىستان ءوڭىرىنىڭ دامۋىنداعى ماڭىزدى قادام بولماق.
بۇل ينۆەستيسيالاردى تارتۋعا جانە جاڭا جۇمىس ورىندارىن قۇرۋعا، سونداي-اق وبلىستىڭ الەۋمەتتىك-ەكونوميكالىق الەۋەتىن نىعايتۋعا ىقپال ەتەرى انىق. فيليال تۇركىستان قالاسىندا جوعارى وقۋ ورىندارىنىڭ ءبىرىنىڭ بازاسىندا ورنالاسادى. تۇركىستان وبلىسىنىڭ اكىمدىگى جاتاقحانا جانە باسقا دا تەحنيكالىق قولداۋ كورسەتۋگە دايىن. جوعارى وقۋ ورنىن اشۋ تۋرالى كەلىسىمگە 2024 جىلدىڭ اقپان ايىنىڭ باسىندا ۆۋسون ۋنيۆەرسيتەتى دەلەگاسياسىنىڭ قازاقستانعا ساپارى كەزىندە قول جەتكىزىلدى.
