Túrkistan oblysynda ınvestısıalyq ahýaldy jaqsartý maqsatynda Ońtústik Koreıa memleketimen kelissózder júrgizilip, birqatar jobalardy iske asyrý josparlanýda. Túrkistan oblysynyń ákimi Darhan Satybaldy búgin Astana qalasynda Koreıanyń Výsong bilim berý qorynyń tóraǵasy Kım Djon Hónmen arnaıy kezdesip, kelissóz júrgizdi, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Bilim berý baǵytynda qarym-qatynasty nyǵaıtýǵa baǵyttalǵan kezdesýde Túrkistan qalasynda aqparattyq tehnologıalar salasyndaǵy Qazaqstandyq WOOSONG ýnıversıtetin qurý týraly aldyn ala kelisim barysy talqylandy.
El Prezıdenti Qasym-Jomart Toqaev bilim sapasyn arttyrý úshin álemdegi ozyq joǵary oqý oryndarynyń fılıaldaryn elimizde kóptep ashýdy tapsyrǵany belgili. Bul eń aldymen bilikti mamandardy oqytyp shyǵarýǵa, joǵary tehnologıalardy ıgerýge jol ashady. Jańa bilim ordasynyń ınovasıalar men ozyq tehnologıalar ortalyǵyna aınalary anyq.
- Sizdiń saparyńyz memleketterimiz arasyndaǵy bilim berý yntymaqtastyǵyn tereńdetý jolyndaǵy mańyzdy qadamdardyń biri bolyp tabylady. Búgingi kezdesý Túrkistan qalasynda Aqparattyq tehnologıalar salasyndaǵy Qazaqstandyq WOOSONG ýnıversıtetin qurý týraly aldyn ala kelisimdi talqylaýǵa jáne qol qoıýǵa arnalǵan. Bul bizdiń oblysymyzǵa ǵana emes, búkil Qazaqstanǵa úlken paıda ákeletin mańyzdy joba ekendigine senimdimiz. Woosong qorynyń aqparattyq tehnologıalar salasyndaǵy tájirıbesi men biliktiligi bizdiń bilim berý júıesiniń damýyna baǵa jetpes úles bolady. Biz stýdentterimiz ben oqytýshylarymyzdyń jahandyq deńgeıde básekege qabiletti bolýyna múmkindik beretin zamanaýı bilim men tehnologıalarǵaqol jetkizýin qamtamasyz etýge umtylamyz. Bizdiń basty maqsattarymyzdyń biri - adamı kapıtaldy damytý. Birlesken bilim berý baǵdarlamalary, ǵylymı zertteýler jáne stýdentter men oqytýshylar almasýy aqparattyq tehnologıalar salasynda joǵary bilikti mamandardy daıarlaý úshin qolaıly jaǵdaılar jasaıtynyna senimdimiz,- dedi Túrkistan oblysynyń ákimi Darhan Satybaldy.
Jańa bilim ordasyn ashý jobasynyń Túrkistan óńiriniń damýyndaǵy mańyzdy qadam bolmaq.
Bul ınvestısıalardy tartýǵa jáne jańa jumys oryndaryn qurýǵa, sondaı-aq oblystyń áleýmettik-ekonomıkalyq áleýetin nyǵaıtýǵa yqpal eteri anyq. Fılıal Túrkistan qalasynda joǵary oqý oryndarynyń biriniń bazasynda ornalasady. Túrkistan oblysynyń ákimdigi jataqhana jáne basqa da tehnıkalyq qoldaý kórsetýge daıyn. Joǵary oqý ornyn ashý týraly kelisimge 2024 jyldyń aqpan aıynyń basynda Výson ýnıversıteti delegasıasynyń Qazaqstanǵa sapary kezinde qol jetkizildi.
