تۇركىستان وبلىسىندا ازاماتتىق نەكەدەگى ايەلىن كۇشتەپ جىندىحاناعا جاتقىزعان ەر ادام 9 جىلعا سوتتالدى، دەپ حابارلايدى Dalanews.kz.
تەرگەۋ دەرەگىنشە، وتباسىلىق جانجالدان كەيىن ول ەكى تانىسىمەن بىرگە ايەلدىڭ قول-اياعىن سكوچپەن بايلاپ، ەركىنەن تىس شىمكەنتتەگى مەديسينالىق مەكەمەگە الىپ بارعان.
ءتىنتۋ بارىسىندا كۇدىكتىنىڭ ۇيىنەن جاۋىنگەرلىك وق-دارىلەر تابىلدى. وعان كومەكتەسكەن ەكى سىبايلاسى 8 جىلعا باس بوستاندىعىنان ايىرىلدى. سونىمەن قاتار سوت جابىرلەنۋشىگە مورالدىق زيان ءۇشىن جالپى 11 ميلليون تەڭگە كولەمىندە وتەماقى تولەۋدى مىندەتتەدى. قازىرگى تاڭدا ۇكىم زاڭدى كۇشىنە ەنگەن جوق.
ايتا كەتەيىك، تۇركىستان وبلىسى بويىنشا ادام قۇقىقتارى جونىندەگى ۋاكىلدىڭ وكىلى ايەلگە زاڭسىز باس بوستاندىعىنان ايىرۋ دەرەگى بويىنشا قىلمىستىق ءىستى قايتا جانداندىرۋعا كومەكتەسكەن ەدى.
جابىرلەنۋشى ۋاكىل وكىلىنە جۇگىنىپ، وتباسىلىق جانجالدان كەيىن كۇيەۋى مەن ونىڭ ەكى تانىسى ءوزىن بايلاپ، شىمكەنتتەگى جىندىحاناعا كۇشتەپ اپارىپ تاستاعانىن جەتكىزگەن. ايتۋىنشا، كۇيەۋى ورتالىق قىزمەتكەرلەرىمەن الدىن الا كەلىسىپ، ونى "اقىل-ەسى كەم" دەگەن جەلەۋمەن ەمحاناعا ورنالاستىرعان. ناتيجەسىندە جابىرلەنۋشى مەديسينالىق مەكەمەدە ءۇش كۇن بولعان. سونداي-اق ول سول جەردە قىزمەتكەرلەر تاراپىنان زاڭسىز ارەكەتتەر بولعانىن مالىمدەدى.
جابىرلەنۋشى تۇركىستان قالالىق پوليسيا باسقارماسىنا ارىز جازعان. باستاپقىدا قىلمىستىق ءىس قوزعالعانىمەن، 2024 جىلدىڭ تامىزىندا ءىس توقتاتىلعان.
ومبۋدسمەن وكىلى ءوتىنىش بەرۋشىگە قۇقىقتارى مەن بوستاندىقتارىن قورعاۋ جولدارىن ءتۇسىندىرىپ، قاجەتتى كومەك كورسەتكەن. سونىڭ ناتيجەسىندە تۇركىستان قالاسىنىڭ پروكۋراتۋراسى ءىستى توقتاتۋ تۋرالى قاۋلىنىڭ كۇشىن جويىپ، قىلمىستىق ءىس قايتا قوزعالدى.
جابىرلەنۋشى بۇل ماسەلەنىڭ شەشىلۋىنە كومەكتەسكەنى ءۇشىن العىس ءبىلدىرىپ، بەينەجازبا جولداعان. وكىلدىك ازاماتتاردىڭ سەنىمىن جوعارى باعالاپ، تۋىنداعان ماسەلەلەردى جەدەل شەشۋگە جانە جۇمىس ساپاسىن جەتىلدىرۋگە ۇمتىلاتىنىن اتاپ ءوتتى.
