بەلگىلى كاسىپكەر، Lanzhou مەيرامحانا جەلىسىنىڭ نەگىزىن سالۋشى گۇلبانۋ مايعارينا الەۋمەتتىك جەلىدە بيزنەستەگى ۇرلىق پەن قىسىم ماسەلەسىن كوتەرىپ، بۇدان بىلاي بۇل تاقىرىپتا ءۇنسىز قالمايتىنىن ايتتى، دەپ حابارلايدى Dalanews.kz.
كاسىپكەردىڭ ايتۋىنشا، قوعامدا كوبىنە مەملەكەتتىك سەكتورداعى جەمقورلىق ءجيى تالقىلانادى. الايدا جەكە بيزنەستەگى ۇرلىقتىڭ اۋقىمى كوپ جاعدايدا نازاردان تىس قالىپ جاتادى. ونىڭ سوزىنشە، تالاي جوبا داعدارىستان ەمەس، ىشكى "سحەمالار" مەن ادىلەتسىز ارەكەتتەردىڭ كەسىرىنەن توقتاپ جاتىر. ەڭ قيىنى – ۇرلىق بولعانىن دالەلدەۋ.
گۇلبانۋ مايعارينا بۇرىن مۇنداي جاعدايلارعا كوز جۇما قاراعانىن جاسىرمادى.
"بۇرىن "جارايدى، تاعى تابارمىن" دەپ، جانجالدان قاشىپ، ءۇنسىز قالاتىنمىن. ءبىراق ۇنسىزدىك جازاسىزدىقتى كۇشەيتەدى ەكەن"، – دەدى ول.
ونىڭ ايتۋىنشا، كاسىپكەرلەر ۇندەمەگەن سايىن مۇنداي ارەكەتتەر قالىپتى قۇبىلىسقا اينالىپ، جاۋاپكەرشىلىك سەزىمى جوعالادى. سونىڭ سالدارىنان ۇرلىقتىڭ اۋقىمى ۇلعايىپ، اشكوزدىك ارتادى.
كاسىپكەر زاڭعا جۇگىنگەن كەزدە جاعداي ودان سايىن قيىنداي تۇسەتىنىن دە اتاپ ءوتتى. ونىڭ سوزىنشە، ارىز جازعان كاسىپكەردىڭ ءوزى بىردەن كۇدىككە ىلىگىپ، ءتۇرلى تەكسەرىس پەن قىسىمعا تاپ بولۋى مۇمكىن. كەيدە جۇيە كاسىپكەردى قورعاۋدىڭ ورنىنا، وعان قارسى جۇمىس ىستەيتىندەي اسەر قالدىرادى.
كاسىپكەر تالدىقورعاندا ءوز كومپانياسىنا قاتىستى ۇرلىق فاكتىسىن انىقتاپ، دالەلدەگەنىن جەتكىزدى. الايدا ءىس "قىلمىس قۇرامى جوق" دەگەن نەگىزبەن جابىلعان.
"زاڭ جولىمەن جۇرۋگە بەل بۋعاندا، كاسىپكەرلەردىڭ نەگە جىلدار بويى شىدايتىنىن ءتۇسىندىم. ويتكەنى ءدال سول كەزدە ناعىز قيىندىق باستالادى. ءبىراق سوعان قاراماستان، مەن ءسوزىمنىڭ ءبارىن قۇجاتپەن دالەلدەيمىن. جانە بۇل ءىستى سوڭىنا دەيىن جەتكىزەمىن"، – دەدى ول.
گۇلبانۋ مايعارينا بيزنەستە ۇرلىققا تاپ بولعان جانداردى ءۇنسىز قالماۋعا شاقىرىپ، بۇل ماسەلەنى اشىق كوتەرۋدىڭ ۋاقىتى كەلگەنىن اتاپ ءوتتى.
