Belgili kásipker, Lanzhou meiramhana jelisiniń negizin salýshy Gúlbaný Maiǵarina áleýmettik jelide biznestegi urlyq pen qysym máselesin kóterip, budan bylai bul taqyrypta únsiz qalmaitynyn aitty, dep habarlaidy Dalanews.kz.
Kásipkerdiń aitýynsha, qoǵamda kóbine memlekettik sektordaǵy jemqorlyq jii talqylanady. Alaida jeke biznestegi urlyqtyń aýqymy kóp jaǵdaida nazardan tys qalyp jatady. Onyń sózinshe, talai joba daǵdarystan emes, ishki "shemalar" men ádiletsiz áreketterdiń kesirinen toqtap jatyr. Eń qiyny – urlyq bolǵanyn dáleldeý.
Gúlbaný Maiǵarina buryn mundai jaǵdailarǵa kóz juma qaraǵanyn jasyrmady.
"Buryn "jaraidy, taǵy tabarmyn" dep, janjaldan qashyp, únsiz qalatynmyn. Biraq únsizdik jazasyzdyqty kúsheitedi eken", – dedi ol.
Onyń aitýynsha, kásipkerler úndemegen saiyn mundai áreketter qalypty qubylysqa ainalyp, jaýapkershilik sezimi joǵalady. Sonyń saldarynan urlyqtyń aýqymy ulǵaiyp, ashkózdik artady.
Kásipker zańǵa júgingen kezde jaǵdai odan saiyn qiyndai túsetinin de atap ótti. Onyń sózinshe, aryz jazǵan kásipkerdiń ózi birden kúdikke iligip, túrli tekseris pen qysymǵa tap bolýy múmkin. Keide júie kásipkerdi qorǵaýdyń ornyna, oǵan qarsy jumys isteitindei áser qaldyrady.
Kásipker Taldyqorǵanda óz kompaniiasyna qatysty urlyq faktisin anyqtap, dáleldegenin jetkizdi. Alaida is "qylmys quramy joq" degen negizben jabylǵan.
"Zań jolymen júrýge bel býǵanda, kásipkerlerdiń nege jyldar boiy shydaitynyn túsindim. Óitkeni dál sol kezde naǵyz qiyndyq bastalady. Biraq soǵan qaramastan, men sózimniń bárin qujatpen dáleldeimin. Jáne bul isti sońyna deiin jetkizemin", – dedi ol.
Gúlbaný Maiǵarina bizneste urlyqqa tap bolǵan jandardy únsiz qalmaýǵa shaqyryp, bul máseleni ashyq kóterýdiń ýaqyty kelgenin atap ótti.
