استانادا ق ر پرەمەر-مينيسترىنىڭ ورىنباسارى – مادەنيەت جانە اقپارات ءمينيسترى ايدا بالايەۆانىڭ توراعالىعىمەن مينيسترلىكتىڭ كەڭەيتىلگەن القا وتىرىسى ءوتتى، دەپ حابارلايدى Dalanews.kz
جيىنعا ۆيسە-مينيسترلەر، كوميتەت ءتوراعالارى، ۆەدومستۆولىق باعىنىستى ۇيىمداردىڭ جەتەكشىلەرى جانە سالالىق قۇرىلىمداردىڭ وكىلدەرى قاتىستى. وتىرىس بارىسىندا مينيسترلىكتىڭ 2025 جىلعى قىزمەتىنىڭ قورىتىندىلارى سارالانىپ، الداعى كەزەڭگە ارنالعان ستراتەگيالىق باسىمدىقتار ايقىندالدى.
القا وتىرىسىن اشقان ايدا بالايەۆا نەگىزگى زاڭعا ەنگىزىلگەن اۋقىمدى وزگەرىستەرگە ەرەكشە توقتالدى. ول ۇلتتىق مادەنيەتتى قولداۋ مەن تاريحي-مادەني مۇرانى ساقتاۋ ماسەلەلەرى العاش رەت كونستيتۋسيالىق دەڭگەيدە مەملەكەتتىڭ ىرگەلى دامۋ قاعيداتتارىنىڭ قاتارىنا ەنگىزىلگەنىن اتاپ ءوتتى.
كەزدەسۋ بارىسىندا مينيسترلىك قىزمەتىنىڭ بارلىق باعىتتارى بويىنشا جاڭا تاسىلدەر مەن زاماناۋي دامۋ ۇردىستەرى جان-جاقتى قارالدى. سالالاردى ۋاقىت تالابىنا جانە وزەكتى سىن-قاتەرلەرگە ساي جۇيەلى جاڭعىرتۋ قاجەتتىگىنە ەرەكشە نازار اۋدارىلدى.
سونىمەن قاتار دامىعان مەملەكەتتەردىڭ وزىق تاجىريبەسىنە نەگىزدەلگەن جاڭا كونستيتۋسيا جوباسى ءسوز بوستاندىعىنا كەپىلدىك بەرەتىنىن، ازاماتتاردىڭ سيفرلىق كەڭىستىكتەگى قۇقىقتارىن قورعاۋ جونىندەگى نورما العاش رەت ەنگىزىلگەنى اتاپ ءوتىلدى. وسىعان بايلانىستى ايدا بالايەۆا مينيسترلىك پەن ۆەدومستۆولىق باعىنىستى ۇيىمداردىڭ قىزمەتىنە سيفرلىق شەشىمدەردى كەڭىنەن ەنگىزۋ جانە جاساندى ينتەللەكت تەحنولوگيالارىن ءتيىمدى پايدالانۋ ماسەلەسىنە ايرىقشا توقتالدى. پرەمەر-مينيستردىڭ ورىنباسارى سالانىڭ ءبىرىڭعاي ءارى كەشەندى سيفرلىق دامۋ ستراتەگياسىن ازىرلەۋدى تاپسىردى.
القا وتىرىسىنا قاتىسۋشىلار مادەنيەت سالاسىن دامىتۋ، كرەاتيۆتى يندۋستريالاردى جۇيەلى قولداۋ، اقپاراتتىق ساياساتتى جەتىلدىرۋ، ازاماتتىق قوعام ينستيتۋتتارىنىڭ الەۋەتىن ارتتىرۋ، سونداي-اق مەملەكەتتىك جاستار جانە وتباسى ساياساتىن ءتيىمدى ىسكە اسىرۋ ماسەلەلەرىن تالقىلادى.
جيىندى قورىتىندىلاعان ايدا بالايەۆا ارىپتەستەرىنە اتقارىلعان ناتيجەلى جۇمىس ءۇشىن ريزاشىلىعىن ءبىلدىرىپ، ءار باعىتتا ناقتى باستامالار كوتەرىپ، جاۋاپكەرشىلىكپەن ارەكەت ەتۋگە شاقىردى. ۇكىمەت باسشىسىنىڭ ورىنباسارى ۆەدومستۆوارالىق ءوزارا ءىس-قيمىلدى كۇشەيتۋدى جانە قويىلعان مىندەتتەردىڭ ساپالى ءارى مەرزىمىندە ورىندالۋىن قامتاماسىز ەتۋدى تاپسىردى.
