تۇركىستاندا حالىقتى قولجەتىمدى باعاداعى ازىق-تۇلىكپەن قامتاماسىز ەتۋ ماقساتىندا الەۋمەتتىك ماڭىزى بار ازىق-تۇلىك جارمەڭكەسى ءوتتى. بۇل شارا جەرگىلىكتى تۇرعىندارعا ساپالى ءارى ارزان ونىمدەردى ۇسىنۋعا باعىتتالعان، دەپ حابارلايدى Dalanews.kz
جارمەڭكەدە ءوڭىر كاسىپكەرلەرى بەلسەنە قاتىسىپ، قالا تۇرعىندارىنا ءوز ونىمدەرىن ارزان باعاعا ۇسىنۋدا. مۇنداي جارمەڭكەلەر باعانى تۇراقتاندىرۋعا جانە حالىقتىڭ ازىق-تۇلىككە جۇمسايتىن شىعىندارىن ازايتۋعا ىقپال ەتەدى.
«جارمەڭكەدە تۇراقتاندىرۋ قورىنىڭ ونىمدەرى نارىقتاعى باعادان 30–50 پايىزعا تومەن باعادا ساتىلۋدا. مۇندا ەت-سۇت ونىمدەرى جانە كۇندەلىكتى تۇتىناتىن نەگىزگى ازىق-تۇلىكتەر تۇرعىندارعا تىكەلەي وندىرۋشىلەردەن جەتكىزىلۋدە. جارمەڭكەنىڭ باستى ماقساتى – تۇرعىنداردى ساپالى ءارى قولجەتىمدى ونىمدەرمەن قامتۋ، سونداي-اق جەرگىلىكتى شارۋالاردىڭ ءونىمىن تۇتىنۋشىعا تىكەلەي جەتكىزۋ»، - دەدى «تۇركىستان» اكك» اق تۇراقتاندىرۋ قورى دەپارتامەنتىنىڭ ديرەكتورى لاۋرا جاناسبايەۆا.
جارمەڭكە تۇرعىندار اراسىندا ۇلكەن قىزىعۋشىلىق تۋدىرىپ، كوپتەگەن ازاماتتار وزدەرىنە قاجەتتى ساپالى ونىمدەردى قولجەتىمدى باعامەن ساتىپ العاندارىنا ريزاشىلىقتارىن ءبىلدىردى. الداعى ۋاقىتتا مۇنداي شارالاردى تۇراقتى تۇردە وتكىزۋ جوسپارلانىپ، 3-قازان كۇنى سايرام جانە وتىرار اۋدانى كاسىپكەردەرىنىڭ اۋىلشارۋاشىلىق ونىمدەرىنىڭ جارمەڭكەسى «بىرلىك» سەكتورىندا ۇيىمداستىرىلماق.
