تۇركىستان وبلىسى، ورداباسى اۋدانىندا قوعامدىق كولىكتەر جاڭارتىلدى،- دەپ حابارلايدى Dalanews.kz
تۇركىستان وبلىسىندا تۇرعىنداردى تولعاندىرعان جولاۋشىلار تاسىمالىنا قاتىستى ماسەلەلەر وڭ شەشىمىن تاۋىپ كەلەدى. ورداباسى اۋدانى كولەمىندە 11 الەۋمەتتىك ماڭىزى بار باعىتتار جەرگىلىكتى بيۋدجەتتەن سۋبسيديالانىپ، قوعامدىق كولىكتەرمەن قامتاماسىز ەتىلگەن بولاتىن. ايتسە دە، جولاۋشىلارعا قىزمەت كورسەتۋشى مەردىگەر مەكەمەنىڭ كولىكتەرىنىڭ ەسكىلىگىنەن ماسەلە تۋىنداپ، اۋدان اكىمى ازات ورالبايەۆ كولىكتەردىڭ ساپاسىزدىعىن سىنعا الىپ، سالا جاۋاپتىلارىنا كەمشىلىكتەردى رەتكە كەلتىرۋدى تاپسىرعان.
وسى ماقساتتا اۋداندىق تۇرعىن ءۇي كوممۋنالدىق شارۋاشىلىق، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكسياسى ءبولىمى مەن جولاۋشىلار تاسىمالداۋشى مەردىگەر مەكەمە «SARavto» ج ش س ءتيىستى ناتيجە كورسەتىپ، اۋدان كولەمىندەگى 13 قوعامدىق كولىكتى جاڭارتۋعا قول جەتكىزدى.
بۇگىن اۋدان باسشىسى ارنايى مەملەكەتتىك باعدارلاما ارقىلى ليزينگكە الىنعان، اتالعان سۋ جاڭا وتاندىق قوعامدىق اۆتوكولىكتەردىڭ 6 داناسىن سالتاناتتى راسىممەن حالىق يگىلىگىنە پايدالانۋعا تابىس ەتتى.
ارنايى راسىمدە اۋدان باسشىسى حالىققا ساپالى قىزمەت كورسەتۋ باعىتىنداعى تاپسىرمانى ناتيجەلى ورىنداعان ءتيىستى سالا مەن مەردىگەر مەكەمە قىزمەتكەرلەرىنە ريزاشىلىعىن ءبىلدىرىپ، الداعى ۋاقىتتا قوعامدىق تاسىمال باعىتىنداعى تۇرعىندار يگىلىگى ءۇشىن اتقارىلاتىن شارۋالار تولاستاماي جالعاسىن تاۋىپ، بارلىق باعىتتارداعى ايالدامالار دا جاڭارتىلاتىنىن جەتكىزدى.
ايتا كەتەيىك، اۋدان ورتالىعى تەمىرلان ەلدى مەكەنىندە 4 جانە حالىق كوپ شوعىرلانعان شۇبارسۋ اۋىلىندا 2 قوعامدىق اۆتوكولىك بۇگىننەن باستاپ جولاۋشىلاردى تاسىمالدايدى. قالعان 7 اۆتوكولىك جولاۋشىلارعا قولايلى جاعداي جاساۋ ماقساتىندا، قوسىمشا قوندىرعىلارمەن جابدىقتالىپ، مامىر ايىنىڭ سوڭىنا دەيىن جەتكىزىلەدى.
