سالتاناتتى شاراعا پەداگوگتار قاۋىمى، ءبىلىم باسقارماسىنىڭ باسشىلىعى، «نۇر وتان» پارتياسى جانە جەرگىلىكتى بيلىكتىڭ وكىلدەرى ارنايى كەلىپ، زاماناۋي ساندىق جۇيەنىڭ جاڭا جوباسىمەن تانىستى.
«بۇل سىنىپتىڭ اشىلاتىنىن ەستىگەندە، قۋانىپ كەتتىم. ءبىرىنشى بولىپ جازىلۋعا اسىقتىم. ءقازىر سىنىپقا كەلىپ، روبوتتاردى قۇراستىرىپ ۇيرەنۋدەمىن. وتە قىزىقتى ەكەن. سوسىن انيماسيا سالاسىن دا مەڭگەرىپ، مۋلتيحيكايالاردى ءوزىم جاساعىم كەلەدى. الدا 3 اي دەمالىس بار، ۋاقىتىمدى ءتيىمدى وتكىزىپ، شەتەلدىك ونەرتاپقىشتار سەكىلدى جارىستارعا بارىپ، جەڭىسكە جەتۋدى كوزدەيمىن. عالىم بولىپ، ەلىمە ەڭبەگىم سىڭەدى دەگەن ارمانىم دا بار»، — دەيدى س.ەرۋبايەۆ اتىنداعى №24 مەكتەپتىڭ 7-سىنىپ وقۋشىسى اقەركە باقبەرگەن.
بۇل سىنىپتار جاڭا تەحنولوگياعا قىزىققان 8-16 جاس ارالىعىنداعى كەز كەلگەن شاكىرتتى قابىلدايدى. ازىرگە مۇنداعى 6 IT كابينەت 80 بالاعا شاقتالىپ وتىر. جانە وقۋ باعدارلاماسىنا وقۋشىلاردىڭ قىزىعۋشىلىعى ەسەلەنىپ، سالانى ەتەنە مەڭگەرۋى ءۇشىن پەداگوگتار دا ەرەكشە ءادىستى قولدانۋعا كوشىپتى.
ۋنيۆەرسيتەت باسشىلىعىنىڭ ايتۋىنشا، وقۋشىلار ءۇشىن مۇندا وقۋ باعدارلاماسى — تەگىن. مەرزىمى — 3 ايعا ۇلاسادى. ساپالى ءبىلىم بەرۋ ماقساتىندا زاماناۋي سوڭعى تەحنيكالارمەن دە جاساقتالىپ وتىر. جانە بۇل ءۇشىن وقۋ ورنى جەكە قورىنان قوماقتى قارجى بولگەن.
راۋان بەگالييەۆا، وقمپۋ عىلىمي جۇمىستار جانە يننوۆاسيالار جونىندەگى پرورەكتورى: «وقۋ ۋاقىتى بالالاردىڭ ساباقتان تىس كەزىندە جۇرگىزىلەدى. جانە سەنبى كۇنى دە ارنايى ساعاتتار بار. سەنبىلىك تۇسكى اس بالالارعا ءبىزدىڭ وقۋ ورنىمىزدىڭ تاراپىنان تەگىن قاراستىرىلىپ وتىر. سونىمەن قاتار، سىنىپتارداعى تەحنيكا جاساقتارى الەمدەگى سوڭعى ۇلگىلەرى دەپ ايتا الامىن. ال ءدارىس بەرۋشى پەداگوگتار وسى ۋنيۆەرسيتەتتىڭ بىلىكتى اعا وقىتۋشىلارى، بارلىعى دا ارنايى سەرتيفيكات العان ماماندار».
وبلىستىق ءبىلىم باسقارماسى ماماندارىنىڭ مالىمەتىنشە، جىل سوڭىنا دەيىن 4500 بالا، ال الداعى جىلى 9000 بالا IT سالاسىن مەڭگەرىپ، ءبىلىمىن جەتىلدىرەدى. جانە 2019 جىلى كۇنگەيدە تاعى 8 100 وقۋشىنى قامتيتىن 30 IT سىنىپتىڭ اشىلۋى دا جوسپارلانىپ قويىپتى.
