Túrkistan óńirinde IT synyptardyń sany artyp keledi
Saltanatty sharaǵa pedagogtar qaýymy, bilim basqarmasynyń basshylyǵy, «Nur Otan» partiiasy jáne jergilikti biliktiń ókilderi arnaiy kelip, zamanaýi sandyq júieniń jańa jobasymen tanysty.
«Bul synyptyń ashylatynyn estigende, qýanyp kettim. Birinshi bolyp jazylýǵa asyqtym. Qazir synypqa kelip, robottardy qurastyryp úirenýdemin. Óte qyzyqty eken. Sosyn animatsiia salasyn da meńgerip, mýltihikaialardy ózim jasaǵym keledi. Alda 3 ai demalys bar, ýaqytymdy tiimdi ótkizip, sheteldik ónertapqyshtar sekildi jarystarǵa baryp, jeńiske jetýdi kózdeimin. Ǵalym bolyp, elime eńbegim sińedi degen armanym da bar», — deidi S.Erýbaev atyndaǵy №24 mekteptiń 7-synyp oqýshysy Aqerke Baqbergen.
Bul synyptar jańa tehnologiiaǵa qyzyqqan 8-16 jas aralyǵyndaǵy kez kelgen shákirtti qabyldaidy. Ázirge mundaǵy 6 IT kabinet 80 balaǵa shaqtalyp otyr. Jáne oqý baǵdarlamasyna oqýshylardyń qyzyǵýshylyǵy eselenip, salany etene meńgerýi úshin pedagogtar da erekshe ádisti qoldanýǵa kóshipti.
Ýniversitet basshylyǵynyń aitýynsha, oqýshylar úshin munda oqý baǵdarlamasy — tegin. Merzimi — 3 aiǵa ulasady. Sapaly bilim berý maqsatynda zamanaýi sońǵy tehnikalarmen de jasaqtalyp otyr. Jáne bul úshin oqý orny jeke qorynan qomaqty qarjy bólgen.
Raýan Begalieva, OQMPÝ ǵylymi jumystar jáne innovatsiialar jónindegi prorektory: «Oqý ýaqyty balalardyń sabaqtan tys kezinde júrgiziledi. Jáne senbi kúni de arnaiy saǵattar bar. Senbilik túski as balalarǵa bizdiń oqý ornymyzdyń tarapynan tegin qarastyrylyp otyr. Sonymen qatar, synyptardaǵy tehnika jasaqtary álemdegi sońǵy úlgileri dep aita alamyn. Al dáris berýshi pedagogtar osy ýniversitettiń bilikti aǵa oqytýshylary, barlyǵy da arnaiy sertifikat alǵan mamandar».
Oblystyq bilim basqarmasy mamandarynyń málimetinshe, jyl sońyna deiin 4500 bala, al aldaǵy jyly 9000 bala IT salasyn meńgerip, bilimin jetildiredi. Jáne 2019 jyly kúngeide taǵy 8 100 oqýshyny qamtityn 30 IT synyptyń ashylýy da josparlanyp qoiypty.
