تۇركىستان وبلىسى بويىنشا اۆتوموبيل جولدارىنىڭ جالپى ۇزىندىعى 17 700 شاقىرىمدى قۇرايدى. بيىلعى جىل قورىتىندىسىمەن جاقسى جانە قاناعاتتى جاعدايداعى وبلىستىق جانە اۋداندىق ماڭىزى بار جولداردىڭ ۇلەسىن 93،7 پايىزعا جەتكىزۋ جوسپارلانىپ وتىر. بۇل باعىتتا، بيىل اۆتوموبيل جولدارى سالاسىن دامىتۋعا بيۋدجەتتەن 41،4 ملرد تەڭگە بولىنگەن، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

وڭىردەگى قۇرىلىس-جوندەۋ جۇمىستارىنىڭ ناتيجەسىندە  1061،3 شاقىرىم جول جوندەۋدەن وتسە، جىل قورىتىندىسىمەن 560 شاقىرىم جول پايدالانۋعا بەرىلەدى دەپ كۇتىلۋدە. بۇل جونىندە وبلىس اكىمى دارحان ساتىبالدىنىڭ توراعالىعىمەن وتكەن اپپاراتتىق جينالىستا مالىمدەدى.

ماجىلىستە جولعا قاتىستى ماڭىزدى تۇيتكىلدەر ايتىلىپ، ءوڭىر باسشىسى وسى باعىتتاعى جۇمىستاردى جانداندىرۋدى تاپسىردى.

– جولداردىڭ قۇرىلىس ساپاسى – باستى نازاردا. جول قۇرىلىسىن قولعا العان مەردىگەرلەر مەن ساپاسىن قاداعالاۋشى مەكەمەلەر ءتيىستى جۇمىستاردى قولعا الۋى ءتيىس. جولدى سالۋ دا، جوندەۋ دە بەكىتىلگەن كەستەگە سايكەس جۇرگىزىلۋى كەرەك. تۇراقتى قاداعالانادى، – دەدى وبلىس اكىمى دارحان ساتىبالدى.

جيىن بارىسىندا تۇركىستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قۋاتجان جۇماتايەۆ بايانداما جاسادى. ونىڭ ايتۋىنشا، وبلىستىق ماڭىزى بار جولدارعا ءتيىستى قارجى ءبولىنىپ، 379،5 شاقىرىم جول قۇرىلىس-جوندەۋ جۇمىستارىمەن قامتىلعان. جىل قورىتىندىسىمەن  207،6 شاقىرىم جول، 4 كوپىر، 4 قۇبىر، 2 جارىقتاندىرۋ جوباسىن پايدالانۋعا بەرۋ كوزدەلۋدە. قازىرگى تاڭدا، 11 نىسان تولىقتاي پايدالانۋعا بەرىلسە (5 جول، 1 كوپىر، 4 قۇبىر، 1 جارىقشام)، قالعان 9 نىساندا جۇمىستار جالعاسۋدا. وسى ورايدا، بيىل باسقارمانىڭ تاپسىرىسىمەن ىسكە اسىرىلىپ جاتقان نىسانداردا «ۇلتتىق جول اكتيۆتەرى ساپاسى ورتالىعى» رمك توف تاراپىنان 642 سىناما الىنىپ، 96 سىناما سايكەس كەلمەدى. سوعان سايكەس، كەمشىلىكتەرگە جول بەرگەن مەردىگەر، تەحنيكالىق جانە اۆتورلىق قاداعالاۋشى مەكەمەلەرگە 120-عا جۋىق ەسكەرتۋ حاتتار بەرىلىپ، 7،3 ملن. تەڭگە ايىپپۇل سالىندى. سونداي-اق ساپاسىز سالىنعان 8100 م2 اسفالت جابىنى قايتا توسەلدى.

بيىل اۋداندىق ماڭىزى بار جولدارعا – 2،6 ملرد. تەڭگە ءبولىنىپ، 97،3 شاقىرىم جول كۇردەلى جانە ورتاشا جوندەۋ جۇمىستارىمەن  قامتىلدى. اتاپ ايتساق، ەلدى مەكەن كوشەلەرى بويىنشا 197 جوبا ن/ە 584،4 شاقىرىم جول جوندەۋ جۇمىستارىمەن قامتىلۋدا. ونىڭ ىشىندە، «اۋىل – ەل بەسىگى» باعدارلاماسى بويىنشا 98 ەلدى مەكەندە جالپى 131 نىسان نەمەسە 482،5 شاقىرىم كوشە جوندەۋدەن وتكىزىلۋدە. جىل قورىتىندىسىمەن 104 نىسان (365 كوشە) نەمەسە 325،2 شاقىرىمى پايدالانۋعا بەرىلىپ، ينديكاتور كورسەتكىشى 70%-دان 74%-عا جەتەدى.