تۇركىستان وبلىسى اكىمدىگىندە 2024 جىلعى اسكەرگە شاقىرۋ ناۋقانىنا دايىندىق ماسەلەلەرى بويىنشا جيىن ءوتتى. وبلىستىق شاقىرۋ كوميسسياسىنىڭ ءتوراعاسى بەيسەن تاجىبايەۆتىڭ توراعالىعىمەن وتكەن باسقوسۋعا جۇمىلدىرۋ دايارلىعى، اۋماقتىق قورعانىس جانە ازاماتتىق قورعاۋ باسقارماسى، تۇركىستان وبلىسىنىڭ قورعانىس ىستەرى جونىندەگى دەپارتامەنتى، وبلىستىق دەنساۋلىق ساقتاۋ باسقارماسى، ءبىلىم باسقارماسى، تۇركىستان وبلىسى پوليسيا دەپارتامەنتى جەرگىلىكتى پوليسيا قىزمەتىنىڭ ورىنباسارلارى مەن تجد، ۇلتتىق ۇلان، شەكارا قىزمەتىنىڭ وكىلدەرى جانە بەينە-سەلەكتورلىق بايلانىس ارقىلى اۋدان، قالا اكىمدەرىنىڭ ورىنباسارلارى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كۇن تارتىبىندە كوكتەمگى اسكەرگە شاقىرۋ ناۋقانىنا دايىندىق جۇمىستارىنىڭ بارىسى، جاستاردى اسكەري-پاتريوتتىق باعىتتا تاربيەلەۋ جۇمىسىنىڭ تيىمدىلىگى جانە الداعى جوسپارلار تالقىلاندى. قارۋلى كۇشتەر مەن باسقا دا اسكەري قۇرالىمداردىڭ وكىلدەرى ءوز بولىمدەرىنە اسكەرگە شاقىرىلۋشىلاردى ىرىكتەۋ ءتارتىبى مەن ولاردى جاساقتاۋ ماسەلەلەرى تۋرالى باياندادى. جۇمىستى ناشار ۇيىمداستىرعان اۋدان، قالالارداعى جاۋاپتى تۇلعالارعا ءتيىستى تاپسىرمالار بەرىلدى. تۇركىستان وبلىسىندا 2024 جىلعى كوكتەمگى اسكەرگە شاقىرۋ ناۋقانىنا ازاماتتاردى ىرىكتەۋ جانە الدىن-الا زەردەلەۋ بويىنشا جۇمىستار جۇرگىزىلىپ جاتقانى ايتىلدى. اسكەري بورىشىن وتەۋدەن جالتارىپ جۇرگەن جاستار ماسەلەسى دە ءسوز بولدى.
– جاستاردى ماجبۇرلەپ جىبەرمەي، ولاردى وتان الدىنداعى بورىشىن وتەۋگە قىزىقتىرىپ، اسكەري ءومىردىڭ وزىندىك ەرەكشەلىكتەرى تۋرالى كوبىرەك ناسيحاتتاۋىمىز كەرەك. وسىعان بايلانىستى ءوز تاراپتارىڭىزدان ناقتى ءىس-شارالار جوسپارىن جاساڭىزدار. كەيبىر جاستاردىڭ قارۋلى كۇشتەر قاتارىنا بارعىسى كەلمەۋىنىڭ سەبەبىن انىقتاۋ ءۇشىن زەرتتەۋ جۇمىستارى نە سەبەپتى باياۋ جۇرگىزىلۋدە؟ وبلىستاعى مەكتەپتەردە «جاس سارباز» اسكەري ۇيىرمە سىنىپتارىن اشۋدى قولعا العان ءجون. بيىل وڭىردە اسكەري-پاتريوتتىق باعىتتاعى ءىس-شارالار سانىن كوبەيتۋدى قولعا الىپ، ۇگىت-ناسيحات جۇمىستارىن جانداندىرۋ كەرەك. بارلىق اۋدان-قالادا اسكەري-پاتريوتتىق جانە دە اسكەري ەرىكتىلەر كلۋبىن قۇرۋ قاجەت، – دەدى وبلىس اكىمىنىڭ ورىنباسارى بەيسەن تاجىبايەۆ.
ءوز كەزەگىندە تۇركىستان وبلىسى قورعانىس ىستەرى جونىندەگى دەپارتامەنتىنىڭ باستىعى، پولكوۆنيك نۇرماحانبەت ديۋسەبايەۆ اسكەرگە شاقىرۋ بويىنشا ءوز ۇسىنىستارى مەن ويلارىن جەتكىزدى.
«ازاماتتاردى مەرزىمدى اسكەري قىزمەتكە شاقىرۋدىڭ نەگىزگى مىندەتى – قارۋلى كۇشتەردى جاس ساربازدارمەن ساپالى جانە ۋاقتىلى تولىقتىرۋ. بۇل جۇمىس ۇزدىكسىز جۇرەدى»، دەدى ول.
جيىندا وڭىردە جۇمىسسىز جۇرگەن جاستاردى مۇمكىندىگىنشە اسكەرگە باۋلۋ ماقساتىندا جۇمىستار قولعا الىنعانى ايتىلدى. جاستاردى اسكەري وقۋعا جىبەرۋ بويىنشا جۇمىستار جۇرگىزىلەتىنى ءسوز بولدى. سونىمەن قوسا جاستاردى وتانشىلدىققا، اسكەري باعىتتا تاربيەلەۋ، مەملەكەتتىك ورگانداردىڭ ازاماتتاردى مەرزىمدى اسكەري قىزمەتكە شاقىرۋدى ۇيىمداستىرۋ جانە وتكىزۋ جۇمىستارىنا قاتىستى ماسەلەلەر قوزعالدى.
جيىندا جاۋاپتى تۇلعالارعا اسكەري قىزمەتكە شاقىرۋ بارىسىن قاداعالاۋدى كۇشەيتۋ جانە ازاماتتاردىڭ شاقىرۋ كوميسسياسىنىڭ وتىرىستارىنا كەلۋىن قامتاماسىز ەتۋ ءۇشىن بارلىق شارالاردى قابىلداۋ تاپسىرىلدى.
ايتا كەتەيىك، وتكەن جىلى تۇركىستان وبلىسىنان 4500-گە جۋىق ازامات اسكەرگە اتتاندى. بيىل دا وڭىردەن 4500 جاستى اسكەرگە جىبەرۋ جوسپارلانىپ وتىر. ونىڭ ىشىندە 2255 جاس كوكتەگى ماۋسىمدا بولسا، 2245 جاس كۇزدىك ماۋسىمدا جونەلتىلەدى دەپ كۇتىلۋدە. وسى باعىتتا دايىندىق جۇمىستارى قارقىندى جۇرگىزىلىپ جاتىر.
