تۇركىستان وبلىسىنىڭ اكىمى دارحان ساتىبالدى باستاعان دەلەگاسيا جۇڭگو حالىق رەسپۋبليكاسىنا ىسساپارمەن باردى. وسىمەن ەكىنشى رەت ۇيىمداستىرىلعان جۇمىس ساپارىندا وبلىس دەلەگاسياسى بىرنەشە پروۆينسيا مەن قالالارىنداعى الپاۋىت كومپانيالاردىڭ جۇمىسىمەن تانىستى. باستى ماقسات – تۇركىستان وڭىرىندە جاڭا جوبالاردى جۇزەگە اسىرۋ، ينۆەستيسيا تارتۋ، زاۋىت-فابريكالار اشىپ، حالىقتىڭ ءال-اۋقاتىن كوتەرۋ.
تۇركىستان وبلىسىنىڭ اكىمدىگى جانە قىتايداعى قازاقستان ەلشىلىگى مەن باس كونسۋلدىقتىڭ بىرلەسىپ ۇيىمداستىرۋىمەن شەنسي پروۆينسياسىندا ءىسساپار ۇيىمداستىرىلدى. تۇركىستان وبلىسى اكىمى دارحان ساتىبالدى باستاعان دەلەگاسيا مەن قازاقستان رەسپۋبليكاسىنىڭ سيان قالاسىنداعى باس كونسۋلى جوشىحان قىراۋبايەۆ شەنسي پروۆينسياسىنىڭ ۆەينان قالاسىندا ورنالاسقان «Chian Chuangshi Construction Group» كومپانياسىنا تيەسىلى «Weinan Jianguo» قوناقۇيىنە باردى. تۇركىستاندا وسى جوبامەن بەس جۇلدىزدى قوناق ءۇي كەشەنى مەن اكۆاپارك جانە بەينەباقىلاۋ كامەرالارىن شىعاراتىن زاۋىت سالىنباق.
تۇركىستان وبلىسىنىڭ اكىمى دارحان ساتىبالدى ۆەينان قالاسى حالىق ۇكىمەتىنىڭ قالا اكىمى چەن سياويۋن، شەنسي پروۆينسياسىنىڭ حالىقارالىق دوستىق قوعامى ءتوراعاسىنىڭ ورىنباسارى ساو حۋەيمەن كەزدەستى. تاراپتار ءوڭىر الەۋەتىن تانىستىرىپ، ينۆەستيسيالىق جوبالاردى ىسكە اسىرۋ بويىنشا ماسەلەلەردى تالقىلادى.
تۇركىستان ءوڭىرىنىڭ شارۋالارىنىڭ ءبىلىمىن جەتىلدىرۋگە ارنالعان ۇلكەن جوبا دايىنداۋ تۋرالى كەلىسسوز جۇرگىزدى. كەزدەسۋ قورىتىندىسىمەن تۇركىستان قالاسى مەن ۆەينان قالالارى اراسىنداعى ارىپتەستىكتى، بايلانىستى نىعايتۋ، ەكونوميكالىق قارىم-قاتىناستاردى ورناتۋ تۋرالى مەموراندۋمعا قول قويۋ ءراسىمى ءوتتى.
– پرەزيدەنتىمىز قاسىم-جومارت كەمەل ۇلى مەن جۇڭگو حالىق رەسپۋبليكاسىنىڭ ءتوراعاسى سي سزينپين مىرزا وسى كۇنگە دەيىن 7 رەت كەزدەسۋ وتكىزىلىپ، ەكى جاقتى قاتىناستاردى دامىتۋعا باعىتتالعان اسا ماڭىزدى قۇجاتتارعا قول قويىلعان. بۇگىنگى كەزدەسۋدىڭ ماقساتى – تۇركىستان وبلىسى مەن ۆەينان قالاسى اراسىنداعى ءوڭىرارالىق بايلانىستاردى نىعايتۋ.
ءبىزدىڭ وبلىس بيزنەسكە باعىتتالعان. تۇركىستان وبلىسى ارقىلى وتەتىن «باتىس ەۋروپا – باتىس جۇڭگو» حالىقارالىق كولىك ءدالىزى الەمدىك نارىققا شىعۋدىڭ جاڭا مۇمكىندىكتەرىن اشادى. تۇركىستان كۇللى تۇركى الەمىنىڭ رۋحاني استاناسى رەتىندە دامۋ جولىندا. وسى باعىتتا ءتۋريزمدى دامىتۋعا كۇش سالىنادى. بۇل كەلىسىم وڭىرلەرىمىزدىڭ ءتۇرلى سالالاردا دامۋىنا سەرپىن بەرەتىنە سەنىم بىلدىرەمىن، – دەدى وبلىس اكىمى دارحان ساتىبالدى.
تاريحى تەرەڭ ۆەينان قالاسى جەمىس-جيدەك وسىرۋدەن قحر-دا كوش باستاپ تۇر. التىن مەن كومىر ءوندىرىسى قارىشتاپ دامىعان. ۆەينان قالاسىندا قىتايداعى ەڭ ءىرى ءجۇزىم باعى بار. مۇندا ءجۇزىمنىڭ سان الۋان ءتۇرى وسىرىلەدى.
شەنسي پروۆينسياسىنىڭ ۆەينان قالاسىنداعى جۇمىس ساپارى بارىسىندا تۇركىستان وبلىسىنىڭ دەلەگاسياسى ايماقتاعى ءىرى ونەركاسىپ ورىندارىن ارالادى. قىتايداعى ەڭ ءىرى ۇن وندىرەتىن كاسىپورنىندا بولدى.
سونداي-اق ماقسارى مايىن وندىرەتىن كاسىپورىندى كوردى. يندۋستريالدى ايماق جۇمىسىمەن تانىسىپ، اۋىر تەحنيكا مەن ونىڭ ونىڭ بولشەكتەرىن شىعاراتىن زاۋىتىن ارالادى. زاۋىتتا ەكسكاۆاتور، بۋلدوزەردىڭ سان الۋان ءتۇرى شىعارىلادى.
تۇركىستان وبلىسىنىڭ اكىمى دارحان ساتىبالدى باستاعان دەلەگاسيا جۇڭگو حالىق رەسپۋبليكاسىنداعى جۇمىس ساپارىن سيان قالاسىندا جالعاستىردى. ساپار اياسىندا وبلىس اكىمى شەنسي پروۆينسياسى پارتيا كوميتەتىنىڭ حاتشىسى چجاو يدەمەن كەزدەستى. وندا تۇركىستان وبلىسى مەن شەنسي پروۆينسياسى اراسىندا باۋىرلاستىق قارىم-قاتىناس ورناتۋ تۋرالى كەلىسىمگە قول قويىلدى.
تۇركىستان وبلىسىنىڭ دەلەگاسياسى قىتايدىڭ سيان قالاسىندا ساۋدا-ەكونوميكالىق فورۋمعا قاتىستى. بيزنەس-فورۋمدا ەكى ەلدىڭ 80-نەن استام كاسىپورىن وكىلدەرى اراسىندا B2B فورماتىندا كەزدەسۋلەر وتكىزىلدى. بەتپە-بەت جۇزدەسىپ، بيزنەس باستاۋعا ارنايى جينالعان بارلىق كاسىپكەرلەرگە العىس ايتقان دارحان امانگەلدى ۇلى ءار بيزنەس باستاۋشىمەن جەكە جۇمىس ىستەيتىنىن جەتكىزدى.
تۇركىستان وبلىسىنىڭ ينۆەستيسيالىق الەۋەتىمەن تانىستىردى. ءبىرقاتار قۇجاتقا قول قويىلدى. بىرلەسكەن جوبالار اراسىندا اۋىل شارۋاشىلىعىنا ىڭعايلى دروندار شىعارۋ، حالىقارالىق مەكتەپ سالۋ، IT، قۇرىلىستى دامىتۋ، مي اۋرۋىن ەمدەيتىن اۋرۋحانا اشۋ، قۇرىلىس ماتەريالدارى زاۋىتىن سالۋ، سيفرلاندىرۋ ارقىلى اۋىلشارۋاشىلىق داقىلدارىن ءوسىرۋ، تراۆەرتين ءوندىرۋ تۋرالى مەموراندۋمعا قول قويىلدى.
سونداي-اق ءوڭىر باسشىسى ميانيان قالالىق پارتيا كوميتەتىنىڭ تۇراقتى كوميتەتىنىڭ مۇشەسى جانە ۆيسە-مەرى ۆۋ حاو باستاعان دەلەگاسيامەن جۇزدەسىپ، ەكىجاقتى كەلىسسوزدەر جۇرگىزدى. قۇرىلىس ماتەريالدارىن ءوندىرۋ زاۋىتىن سالۋ تۋرالى، اۋىل شارۋاشىلىعى سالاسىن، مەديسينا، ءبىلىم، ءتۋريزمدى دامىتۋ بويىنشا ءبىرقاتار كەلىسىمدەر تالقىلاندى. تۇركىستان وبلىسىندا جاڭا كوكونىس قويماسىن سالۋ جونىندە دە كەلىسسوزدەر ءوتتى.
ءىس-ساپار قىتايدىڭ وزگە وڭىرلەرىندە جالعاسىن تابادى.
