Túrkistan oblysynyń ákimi Darhan Satybaldy bastaǵan delegatsiia Qytai Halyq Respýblikasyna issaparmen bardy. Osymen ekinshi ret uiymdastyrylǵan jumys saparynda oblys delegatsiiasy birneshe provintsiia men qalalaryndaǵy alpaýyt kompaniialardyń jumysymen tanysty. Basty maqsat – Túrkistan óńirinde jańa jobalardy júzege asyrý, investitsiia tartý, zaýyt-fabrikalar ashyp, halyqtyń ál-aýqatyn kóterý.
Túrkistan oblysynyń ákimdigi jáne Qytaidaǵy Qazaqstan elshiligi men Bas konsýldyqtyń birlesip uiymdastyrýymen Shensi provintsiiasynda issapar uiymdastyryldy. Túrkistan oblysy ákimi Darhan Satybaldy bastaǵan delegatsiia men Qazaqstan Respýblikasynyń Sian qalasyndaǵy Bas konsýly Joshyhan Qyraýbaev Shensi provintsiiasynyń Veinan qalasynda ornalasqan «Chian Chuangshi Construction Group» kompaniiasyna tiesili «Weinan Jianguo» qonaqúiine bardy. Túrkistanda osy jobamen bes juldyzdy qonaq úi kesheni men akvapark jáne beinebaqylaý kameralaryn shyǵaratyn zaýyt salynbaq.
Túrkistan oblysynyń ákimi Darhan Satybaldy Veinan qalasy halyq úkimetiniń qala ákimi Chen Siaoiýn, Shensi provintsiiasynyń halyqaralyq dostyq qoǵamy tóraǵasynyń orynbasary Tsao Hýeimen kezdesti. Taraptar óńir áleýetin tanystyryp, investitsiialyq jobalardy iske asyrý boiynsha máselelerdi talqylady.
Túrkistan óńiriniń sharýalarynyń bilimin jetildirýge arnalǵan úlken joba daiyndaý týraly kelissóz júrgizdi. Kezdesý qorytyndysymen Túrkistan qalasy men Veinan qalalary arasyndaǵy áriptestikti, bailanysty nyǵaitý, ekonomikalyq qarym-qatynastardy ornatý týraly memorandýmǵa qol qoiý rásimi ótti.
– Prezidentimiz Qasym-Jomart Kemeluly men Qytai Halyq Respýblikasynyń Tóraǵasy Si Tszinpin myrza osy kúnge deiin 7 ret kezdesý ótkizilip, eki jaqty qatynastardy damytýǵa baǵyttalǵan asa mańyzdy qujattarǵa qol qoiylǵan. Búgingi kezdesýdiń maqsaty – Túrkistan oblysy men Veinan qalasy arasyndaǵy óńiraralyq bailanystardy nyǵaitý.
Bizdiń oblys bizneske baǵyttalǵan. Túrkistan oblysy arqyly ótetin «Batys Eýropa – Batys Qytai» halyqaralyq kólik dálizi álemdik naryqqa shyǵýdyń jańa múmkindikterin ashady. Túrkistan kúlli túrki áleminiń rýhani astanasy retinde damý jolynda. Osy baǵytta týrizmdi damytýǵa kúsh salynady. Bul kelisim óńirlerimizdiń túrli salalarda damýyna serpin beretine senim bildiremin, – dedi oblys ákimi Darhan Satybaldy.
Tarihy tereń Veinan qalasy jemis-jidek ósirýden QHR-da kósh bastap tur. Altyn men kómir óndirisi qaryshtap damyǵan. Veinan qalasynda Qytaidaǵy eń iri júzim baǵy bar. Munda júzimniń san alýan túri ósiriledi.
Shensi provintsiiasynyń Veinan qalasyndaǵy jumys sapary barysynda Túrkistan oblysynyń delegatsiiasy aimaqtaǵy iri ónerkásip oryndaryn aralady. Qytaidaǵy eń iri un óndiretin kásipornynda boldy.
Sondai-aq maqsary maiyn óndiretin kásiporyndy kórdi. Indýstrialdy aimaq jumysymen tanysyp, aýyr tehnika men onyń onyń bólshekterin shyǵaratyn zaýytyn aralady. Zaýytta ekskavator, býldozerdiń san alýan túri shyǵarylady.
Túrkistan oblysynyń ákimi Darhan Satybaldy bastaǵan delegatsiia Qytai Halyq Respýblikasyndaǵy jumys saparyn Sian qalasynda jalǵastyrdy. Sapar aiasynda oblys ákimi Shensi provintsiiasy partiia komitetiniń hatshysy Chjao Idemen kezdesti. Onda Túrkistan oblysy men Shensi provintsiiasy arasynda baýyrlastyq qarym-qatynas ornatý týraly kelisimge qol qoiyldy.
Túrkistan oblysynyń delegatsiiasy Qytaidyń Sian qalasynda saýda-ekonomikalyq forýmǵa qatysty. Biznes-forýmda eki eldiń 80-nen astam kásiporyn ókilderi arasynda B2B formatynda kezdesýler ótkizildi. Betpe-bet júzdesip, biznes bastaýǵa arnaiy jinalǵan barlyq kásipkerlerge alǵys aitqan Darhan Amangeldiuly ár biznes bastaýshymen jeke jumys isteitinin jetkizdi.
Túrkistan oblysynyń investitsiialyq áleýetimen tanystyrdy. Birqatar qujatqa qol qoiyldy. Birlesken jobalar arasynda aýyl sharýashylyǵyna yńǵaily drondar shyǵarý, halyqaralyq mektep salý, IT, qurylysty damytý, mi aýrýyn emdeitin aýrýhana ashý, qurylys materialdary zaýytyn salý, tsifrlandyrý arqyly aýylsharýashylyq daqyldaryn ósirý, travertin óndirý týraly memorandýmǵa qol qoiyldy.
Sondai-aq óńir basshysy Mianian qalalyq partiia komitetiniń turaqty komitetiniń múshesi jáne vitse-meri Vý Hao bastaǵan delegatsiiamen júzdesip, ekijaqty kelissózder júrgizdi. Qurylys materialdaryn óndirý zaýytyn salý týraly, aýyl sharýashylyǵy salasyn, meditsina, bilim, týrizmdi damytý boiynsha birqatar kelisimder talqylandy. Túrkistan oblysynda jańa kókónis qoimasyn salý jóninde de kelissózder ótti.
Is-sapar Qytaidyń ózge óńirlerinde jalǵasyn tabady.
