"اشىعىن ايتۋ كەرەك، قازىرگى ۆاكسينالاۋ جۇمىسىنىڭ قارقىنى ءالى دە ماردىمسىز، ناقتى قادامدار جاساۋ قاجەت. تۇپتەپ كەلگەندە ازاماتتارىمىز ءوزىنىڭ جانە جاقىن تۋىستارىنىڭ دەنساۋلىعىن ويلاپ، سانالى تۇردە شەشىم قابىلداۋى قاجەت. انتيۆاكسەرلەردىڭ قاۋەسەت، داڭعازا اڭگىمەلەرىنە سەنۋدىڭ قاجەتى جوق. سوندىقتان ءبىز ەكپە سالۋ ناۋقانىن جالعاستىرامىز. ال كەيبىر جەكەلەگەن سالالاردا مىندەتتى تۇردە ۆاكسينا سالدىرۋ قاجەت بولادى"، - دەدى توقايەۆ ۇكىمەتتىڭ كەڭەيتىلگەن وتىرىسىندا.
پرەزيدەنتتىڭ ايتۋىنشا، كەيبىر سالالاردا ۆاكسينانى مىندەتتى تۇردە سالدىرۋ شارالارىنىڭ زاڭنامالىق، ءتىپتى، كونستيتۋسيالىق نەگىزى بار.
"تۋراسىن ايتساق، بۇل – اركىمنىڭ ءوز وتانداستارى الدىنداعى مىندەتى، پارىزى. سونداي-اق، مىنانداي ەكى ماسەلەگە توقتالعىم كەلەدى. بىرىنشىدەن، مىندەتتى ەكپە سالۋ كەزىندە اسىرا سىلتەۋ بولماۋعا ءتيىس. مەديسينالىق سەبەپتەرگە جانە بەلگىلى ءبىر جاعدايلارعا بايلانىستى ەكپە سالدىرمايتىن ادامدار بار. مەملەكەتتىك ورگاندار، اسىرەسە، مونيتورينگ جۇرگىزۋ توپتارى وسى ماسەلەنى ەسكەرۋى كەرەك"، - دەپ تۇيىندەدى توقايەۆ.
ايتا كەتەيىك، بۇعان دەيىن ادىلەت مينيسترلىگى COVID-19-عا قارسى ۆاكسينانى مىندەتتەۋدىڭ قۇقىقتىق نەگىزىن تۇسىندىرگەن بولاتىن. ۆەدومستۆونىڭ اقپاراتىنشا، ينفەكسيالىق جانە پارازيتتىك اۋرۋلاردىڭ پايدا بولۋى مەن تارالۋىنىڭ الدىن الۋ ءۇشىن دەنساۋلىق تۋرالى كودەكستە پروفيلاكتيكالىق ەكپەلەر ەگۋ شاراسى كوزدەلگەن.
كودەكستىڭ 85-بابى 4 جانە 8-تارماقتارىنا سايكەس، مەديسينالىق قارسى كورسەتىلىمدەرى جوق، قازاقستان اۋماعىندا تۇراقتى تۇراتىن جەكە تۇلعالار ينفەكسيالىق جانە پارازيتتىك اۋرۋلارعا قارسى ەكپەلەردى الۋعا مىندەتتى.
ولاردىڭ قاتارىنا كوروناۆيرۋسقا قارسى پروفيلاكتيكالىق ەكپە دە جاتادى. بۇل ۇكىمەتتىڭ 2020 جىلعى 24 قىركۇيەكتەگى №612 قاۋلىسىندا ايتىلعان.
"وسىلايشا، مەديسينالىق قارسى كورسەتىلىمدەرى جوق ادامدار ءۇشىن COVID-19-عا قارسى مىندەتتى ۆاكسينالاۋدىڭ قۇقىقتىق نەگىزدەرى بار جانە بۇل "مەملەكەت ادامنىڭ ءومىر ءسۇرۋى مەن دەنساۋلىعىنا قولايلى اينالاداعى ورتانى قورعاۋدى ماقسات ەتىپ قويادى" دەگەن (كونستيتۋسيانىڭ 31-بابى) كونستيتۋسيالىق نورماعا سايكەس كەلەدى. ادامنىڭ جانە ازاماتتىڭ قۇقىقتارى مەن بوستاندىقتارىنا كەپىلدىك بەرە وتىرىپ، قازاقستان كونستيتۋسياسى مۇنداي شەكتەۋدىڭ جول بەرىلەتىن شەكتەرىن بەلگىلەي وتىرىپ، ولاردى شەكتەۋ مۇمكىندىگىن جوققا شىعارمايدى"، - دەلىنگەن حابارلامادا.
كونستيتۋسيانىڭ 39-بابى 1-تارماعىنا سايكەس، قۇقىقتار مەن بوستاندىقتار حالىقتىڭ دەنساۋلىعىن قورعاۋ ماقساتىندا عانا شەكتەلۋى مۇمكىن.
دەرەككوز: sputnik.kz
