پرەزيدەنت دجو بايدەن اق ۇيدە جاڭادان سايلانعان پرەزيدەنت دونالد ترامپتى قابىلدادى. ولار نە تۋرالى سويلەسكەنى بەلگىلى بولدى،- دەپ حابارلايدى Dalanews.kz.

"ازاتتىق" New York Post باسىلىمىنىڭ دەرەكتەرىن كەلتىردى. مالىمەتكە سۇيەنسەك، اقش-تىڭ جاڭادان سايلانعان پرەزيدەنتى دونالد ترامپ قازىرگى پرەزيدەنت دجو بايدەنمەن كەزدەسۋ كەزىندە ۋكرايناداعى سوعىس جانە تاياۋ شىعىستاعى احۋالدى تالقىلاعان. 

"ءبىز تاياۋ شىعىس تۋرالى دا كوپ سويلەستىك. مەن ونىڭ نە ويلايتىنىن بىلگىم كەلدى. جاۋابىن دا ەستىدىم. ول وتە مەيىرىمدى بولدى" دەپ تەلەفون ارقىلى ترامپتان سۇحبات الىپ، ونىڭ سوزىنەن ءۇزىندى كەلتىردى New York Post باسىلىمى"، - دەپ جازىلعان مالىمەتتە.

ترامپتىڭ سوزىنشە، ولار بىر-بىرىمەن قۋانا كورىسكەن جانە 20 قاڭتار كۇنگى يناۋگۋراسيا قارساڭىندا تاعى ءبىر رەت كەزدەسپەك. بايدەن ترامپتى جەڭىسىمەن قۇتتىقتاپ، قاڭتاردا بيلىكتىڭ «ءبىرقالىپتى اۋىسۋىن» كۇتەتىنىن جەتكىزدى.

"ترامپ پەن بايدەننىڭ كەزدەسۋى قارساڭىندا اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆان بايدەننىڭ بۇدان ءارى قاراي دا ۋكراينانى قولداۋعا شاقىرا بەرەتىنىن ايتتى. سەبەبى كييەۆتى قولداۋسىز تاستاپ كەتۋ ەۋروپاداعى تۇراسىزدىقتى ارتتىرۋمەن پارا-پار.

ترامپ سايلاۋالدى كامپانياسى كەزىندە ۋكرايناداعى سوعىستى تەزىرەك اياقتاۋعا ۋادە بەرگەن. دەگەنمەن ءتۇرلى اقپارات قۇرالدارىنداعى دەرەككوزدەردىڭ حابارلاۋىنشا، ترامپتا بۇل بويىنشا ناقتى جوسپار جوق. ول ەكى جاق بىرىنە جەڭىلدىك جاسايدى دەپ ۇمىتتەنەتىن ءتارىزدى"، - دەپ جازدى "ازاتتىق".

ايتا كەتەيىك، بۇعان دەيىن ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى م.ا. جانات مومىنقۇلوۆ Dalanews.kz-كە سۇحبات بەرىپ، اقش-تاعى سايلاۋ ناتيجەلەرى تۋرالى بولجام جاسادى.

"ترامپ الەمدىك ساياساتتا ويىپ تۇرىپ ورىن الادى. ونىڭ ۇستىنە قازىرگىدەي داعدارىس، سوعىس جاعدايىندا ونىڭ ءىس-قيمىلى - ءبارى وتە ماڭىزدى. ءبىراق حارريس قالعان جاعدايدا امەريكانىڭ وسى ساياساتى جالعاسا بەرەدى. قىتايعا، رەسەيگە، يرانعا قاتىستى شەكتەۋ، تەجەۋ ساياساتى جۇرەدى.

مەنىڭ ويىمشا، ءحارريستىڭ جەڭىسىنە قۋانامىز. ال ترامپ كەلەتىن بولسا، رەسەيمەن قارىم-قاتىناسىنداعى وزگەرىستەر ورتالىق ازياعا، بىزگە سالقىن اسەر ەتەدى. ءبارى اينالىپ كەلگەندە حالىقارالىق جۇيەگە اسەر ەتەدى. ءبىز بولجاپ بولمايتىن وقيعالار باستالىپ كەتۋى مۇمكىن. حارريس ورتالىق ازياعا جاڭا ءبىر كوزقاراس تانىتۋى مۇمكىن، ول - اق ءۇيدىڭ ماڭىنداعى بيۋروكراتتاردىڭ وكىلى، تۇراقتىلىقتىڭ "گارانتياسى". ال ترامپ كەلسە، ۋكرايناداعى جاعداي ۇزاققا سوزىلاتىن داۋعا اينالۋى مۇمكىن. سوندىقتان، مەنىڭ ويىمشا، ءحارريستىڭ كەلگەنى قازاقستانعا ءتيىمدى. ورتالىق ازياعا تىكەلەي اسەرى بولماسا دا، شەشىمدەرى ارقىلى اينالىپ كەلگەندە اسەرى بولادى"، - دەدى ول.