ەلوردالىق دارىگەرلەر قالاداعى ەپيدەميولوگيالىق جاعدايعا الاڭداۋلى. ينفەكسيالىق ستاسيونارلاردا ناۋقاستار كوبەيگەن، ءاربىر ەكىنشى پاسيەنتكە وتتەگى كونسەنتراتورى قاجەت، دەپ حابارلايدى قالا اكىمدىگىنىڭ رەسمي سايتى.

ءقازىر كوۆيدتىك اۋرۋحانالاردا 40 ادام جاساندى تىنىس الدىرتۋ اپپاراتىنا قوسىلعان.

"تەك وتكەن تاۋلىكتە عانا ينفەكسيالىق ستاسيونارلارعا 178 ادام جاتقىزىلدى. توسەكتەر لەزدە تولىپ جاتىر! ءاربىر ەكىنشى ناۋقاسقا وتتەگى كونسەنتراتورى قاجەت، ولار ءينۆازيۆتى ەمەس جەلدەتۋ استىندا جاتىر. ال جاعدايى تىم ناشار پاسيەنتتەر جاساندى تىنىس الدىرتۋ اپپاراتىنا قوسىلعان"، - دەيدى ينفەكسيالىق ستاسيونارلاردىڭ مەديسينا قىزمەتكەرلەرى.

دارىگەرلەر جاعدايى اۋىر ناۋقاستاردىڭ كوبى ۆاكسينا الماعان، سانيتارلىق تالاپتاردى ساقتاماي، سالتاناتتى ءىس-شارالارعا قاتىسقان نەمەسە ۇيىمداستىرعان ادامدار ەكەنىن اتاپ ءوتتى.

"بىزدە ءبىر ەرلى-زايىپتى بولدى. تەكسەرۋ كەزىندە ولار جۋىردا عانا كوپ ادام جينالعان مەرەيتويعا بارعانىن مويىندادى.

كوزدەرىنە جاس الىپ، ەشقايدا شىقپاعانىمىز دۇرىس ەدى دەپ وكىندى. ويتكەنى ول كەزدە كۇيەۋىنىڭ جاعدايى تىم ناشار ەدى.

دەنساۋلىقپەن ويناماۋ كەرەك ەكەنىن تاعى دا ەسكە سالعىم كەلەدى.

ەگەر ءسىز سانيتارلىق نورمالاردى ساقتاماساڭىز جانە ەكپە الماساڭىز، وندا "ماعان اۋرۋ جۇقپايدى" دەپ ەركىن جۇرە بەرۋگە بولمايدى"، — دەدى كوۆيدتىك اۋرۋحانالاردىڭ بىرىندە ىستەيتىن جۇقپالى اۋرۋلار دارىگەرى گۇلباقىت ءاديجانوۆا.

2 تامىزداعى جاعداي بويىنشا نۇر-سۇلتان قالاسىنىڭ ينفەكسيالىق ستاسيونارلارىندا 2903 ادام جاتىر. جانساقتاۋ بولىمىندە — 260 ناۋقاس، 40 پاسيەنت جاساندى تىنىس الدىرتۋ اپپاراتىنا قوسىلعان.

قازىرگى تاڭدا COVID-19-بەن كۇرەسۋ ءۇشىن قالادا 16 ستاسيونار جانە 6 مىڭنان استام مەديسينا قىزمەتكەرى جۇمىلدىرىلدى.