Qazir kovidtik aýrýhanalarda 40 adam jasandy tynys aldyrtý apparatyna qosylǵan.
"Tek ótken táýlikte ǵana infektsiialyq statsionarlarǵa 178 adam jatqyzyldy. Tósekter lezde tolyp jatyr! Árbir ekinshi naýqasqa ottegi kontsentratory qajet, olar invazivti emes jeldetý astynda jatyr. Al jaǵdaiy tym nashar patsientter jasandy tynys aldyrtý apparatyna qosylǵan", - deidi infektsiialyq statsionarlardyń meditsina qyzmetkerleri.
Dárigerler jaǵdaiy aýyr naýqastardyń kóbi vaktsina almaǵan, sanitarlyq talaptardy saqtamai, saltanatty is-sharalarǵa qatysqan nemese uiymdastyrǵan adamdar ekenin atap ótti.
"Bizde bir erli-zaiypty boldy. Tekserý kezinde olar jýyrda ǵana kóp adam jinalǵan mereitoiǵa barǵanyn moiyndady.
Kózderine jas alyp, eshqaida shyqpaǵanymyz durys edi dep ókindi. Óitkeni ol kezde kúieýiniń jaǵdaiy tym nashar edi.
Densaýlyqpen oinamaý kerek ekenin taǵy da eske salǵym keledi.
Eger siz sanitarlyq normalardy saqtamasańyz jáne ekpe almasańyz, onda "maǵan aýrý juqpaidy" dep erkin júre berýge bolmaidy", — dedi kovidtik aýrýhanalardyń birinde isteitin juqpaly aýrýlar dárigeri Gúlbaqyt Ádijanova.
2 tamyzdaǵy jaǵdai boiynsha Nur-Sultan qalasynyń infektsiialyq statsionarlarynda 2903 adam jatyr. Jansaqtaý bóliminde — 260 naýqas, 40 patsient jasandy tynys aldyrtý apparatyna qosylǵan.
Qazirgi tańda COVID-19-ben kúresý úshin qalada 16 statsionar jáne 6 myńnan astam meditsina qyzmetkeri jumyldyryldy.
