قازاقستان پرەزيدەنتى قاسىم-جومارت توقايەۆ ۇكىمەتتىڭ قوسىمشا قۇن سالىعى (ققس) كولەمىن ارتتىرۋ تۋرالى ۇسىنىسىن قولدادى. بۇل تۋرالى مەملەكەت باسشىسى ۇكىمەتتىڭ كەڭەيتىلگەن وتىرىسىندا مالىمدەدى، دەپ جازادى Dalanews.kz.

ۇلتتىق ەكونوميكا ءمينيسترى سەرىك ءجۇمانعاريننىڭ ۇكىمەت وتىرىسىندا تانىستىرعان سالىق رەفورماسىنا سايكەس، ققس بويىنشا تىركەۋ شەگىن 15 ملن تەڭگەگە دەيىن تومەندەتۋ جوسپارلانعان. سونىمەن بىرگە ۇكىمەت سالىق مولشەرلەمەسىن كوتەرۋدى دە قاراستىرىپ وتىر. ونىڭ مولشەرلەمە كولەمىن مينيسترلەر پارلامەنت دەپۋتاتتارىمەن تالقىلاۋدى جوسپارلاپ وتىر. 

"وسىلاي، جۇمىس ىستەڭىزدەر. رەفورما قاجەت ەكەنىن راستايمىن. ءقازىر ءبىزدىڭ باستى مىندەتىمىز – ۇلتتىق قوردان بولىنەتىن ترانسفەرتتەر كولەمىن ازايتۋ، ونىڭ جيناقتاۋشى فۋنكسياسىن كۇشەيتۋ. جيناقتالعان قاراجاتتى ءىرى ينفراقۇرىلىمدىق جوبالاردى قارجىلاندىرۋعا باعىتتاۋ قاجەت. سول ارقىلى مەملەكەتتى دامىتۋ فۋنكسياسىن نىعايتاتىن بولامىز. دەگەنمەن بۇل ماسەلەگە ءالى دە تەرەڭىرەك ءۇڭىلۋ كەرەك"، – دەدى پرەزيدەنت.

سونىمەن قاتار مەملەكەت باسشىسى ەلىمىزدە ەكونوميكا سالالارىن ءارتاراپتاندىرۋ مىندەتىنىڭ ءالى تولىققاندى ورىندالماعانىنا، قازاقستان ەكونوميكاسىنىڭ ءالى دە ۇلتتىق قورعا تاۋەلدى ەكەنىنە باسا نازار اۋدارتتى. 

ايتا كەتسەك،بۇعان دەيىن ۇكىمەت قوسىمشا قۇن سالىعى مولشەرلەمەسىن كوتەرۋدى ۇسىنعان ەدى. ال ققس وسكەن جاعدايدا ۇكىمەت جۇمىس بەرۋشىنىڭ اۋدارۋى ءتيىس الەۋمەتتىك سالىعى مەن مىندەتتى زەينەتاقى جارنالارىن جويۋى مۇمكىن. بۇل ەڭبەكاقى قورىنا تۇسەتىن جۇكتەمەنى 10-30%-عا تومەندەتەدى دەپ كۇتىلەدى. "ال مۇندايدا بۇل شىعىنداردى بيۋدجەت ءوز موينىنا الا الادى"، - دەپ اتاپ ءوتتى ۆيسە-پرەمەر سەرىك جۇمانعارين. ساراپشىلار قاۋىمىنىڭ ءبىرى پاراسى بۇل باستاماعا نارازى.