مەملەكەت باسشىسى بۇگىن، 2025 جىلى 7 قاڭتاردا وتاندىق بيزنەس وكىلدەرىمەن بولعان كەزدەسۋدە ۇكىمەتكە قوسىمشا قۇن سالىعى ماسەلەسىن تاعى دا پىسىقتاۋدى تاپسىردى، دەپ جازادى Dalanews.kz اقوردانىڭ باسپا ءسوز قىزمەتىنە سىلتەمە جاساپ.
"كەز كەلگەن رەفورمانى جان-جاقتى ساراپتاپ، بايىپپەن جۇرگىزگەن ءجون. ەكونوميكا سالالارىنىڭ ەرەكشەلىكتەرىن ەسكەرە وتىرىپ، ءتۇرلى نۇسقالاردى ازىرلەۋ كەرەك. قوسىمشا قۇن سالىعىنا قاتىستى بۇعان دەيىن كوزقاراسىمدى بىلدىرمەگەن ەدىم. ويتكەنى قىزمەتتىك دارەجەمە سايكەس، مەنىڭ ءاربىر ءسوزىم، پىكىرىم قاتاڭ تاپسىرما سياقتى قابىلدانادى. سوعان قاراماستان بۇل ماسەلە بويىنشا ويىمدى جەتكىزگىم كەلەدى. قالاي دەسەك تە، قوسىمشا قۇن سالىعىنىڭ مولشەرلەمەسى سارالانىپ بەلگىلەنۋگە ءتيىس"، - دەدى مەملەكەت باسشىسى.
پرەزيدەنت ۇكىمەت تۇپكىلىكتى شەشىمدى بىلىكتى ساراپشىلاردىڭ، قايتالاپ ايتامىن، بىلىكتى ساراپشىلار مەن كاسىپكەرلەردىڭ، البەتتە دەپۋتاتتاردىڭ پىكىرىنە قۇلاق اسا وتىرىپ، ناقتى ەسەپتەۋلەر نەگىزىندە قابىلداعانى دۇرىس ەكەنىن دە ناقتىلانادى.
"ءبىر انىعى، ۇكىمەتتىڭ قازىرگى ۇسىنىپ وتىرعان مولشەرلەمەسى تىم جوعارى. سىزدەر ناقتى سيفردى ايتتىڭىزدار. ونى قوعام قىزۋ تالقىلادى. ءتىپتى، كەي جاعدايدا ارتىق سوزدەر دە ايتىلدى. دەگەنمەن، بۇل قوعام تالقىسىنا الدىن الا سالىنعان ۇسىنىس بولاتىن. تاعى قايتالاپ ايتامىن، ۇكىمەتتىڭ بۇل باعىتتاعى جۇمىسى بيزنەس، قوعام، كاسىپكەرلەر، ساراپشىلاردىڭ، ياعني بارلىق تاراپتىڭ پىكىرى ەسكەرىلە وتىرىپ جالعاسۋى كەرەك. بيىل ناقتى شەشىم قابىلدانۋعا ءتيىس. مەن بۇعان دەيىن دە ايتتىم: ۇكىمەت بۇل ماسەلەنى دەپۋتاتتارمەن جانە ساراپشىلارمەن ەگجەي-تەگجەيلى تالقىلاۋى كەرەك. بۇگىن ايتىلعان وي-پىكىرلەر دە ەسكەرىلەدى. مەملەكەتكە بارىنشا وڭتايلى شەشىم قاجەت. ياعني ءبىر جاعىنان بيزنەس جۇرگىزۋگە كەدەرگى كەلتىرمەي، قولايلى جاعداي جاسايتىن، ال ەكىنشى جاعىنان، سالىققا قاتىستى ءتارتىپتى كۇشەيتىپ، بيۋدجەت كىرىسىن ارتتىراتىن ءتيىمدى جولدى تابۋىمىز قاجەت"، – دەدى قاسىم-جومارت توقايەۆ.
ءبۇعان دەيىن كاسىپكەرلەر بىرلەسكەن وتىرىس وتكىزىپ، ونىڭ قورىتىندىسى بويىنشا قوسىمشا قۇن سالىعىنىڭ 20 پايىزعا كوتەرىلۋىنە قارسى ەكەندىكتەرىن جاريالاعان.
