Memleket basshysy búgin, 2025 jyly 7 qańtarda otandyq biznes ókilderimen bolǵan kezdesýde Úkimetke qosymsha qun salyǵy máselesin taǵy da pysyqtaýdy tapsyrdy, dep jazady Dalanews.kz Aqordanyń baspasóz qyzmetine silteme jasap.
"Kez kelgen reformany jan-jaqty saraptap, baiyppen júrgizgen jón. Ekonomika salalarynyń erekshelikterin eskere otyryp, túrli nusqalardy ázirleý kerek. Qosymsha qun salyǵyna qatysty buǵan deiin kózqarasymdy bildirmegen edim. Óitkeni qyzmettik dárejeme sáikes, meniń árbir sózim, pikirim qatań tapsyrma siiaqty qabyldanady. Soǵan qaramastan bul másele boiynsha oiymdy jetkizgim keledi. Qalai desek te, qosymsha qun salyǵynyń mólsherlemesi saralanyp belgilenýge tiis", - dedi Memleket basshysy.
Prezident Úkimet túpkilikti sheshimdi bilikti sarapshylardyń, qaitalap aitamyn, bilikti sarapshylar men kásipkerlerdiń, álbette depýtattardyń pikirine qulaq asa otyryp, naqty esepteýler negizinde qabyldaǵany durys ekenin de naqtylanady.
"Bir anyǵy, Úkimettiń qazirgi usynyp otyrǵan mólsherlemesi tym joǵary. Sizder naqty tsifrdy aittyńyzdar. Ony qoǵam qyzý talqylady. Tipti, kei jaǵdaida artyq sózder de aityldy. Degenmen, bul qoǵam talqysyna aldyn ala salynǵan usynys bolatyn. Taǵy qaitalap aitamyn, Úkimettiń bul baǵyttaǵy jumysy biznes, qoǵam, kásipkerler, sarapshylardyń, iaǵni barlyq taraptyń pikiri eskerile otyryp jalǵasýy kerek. Biyl naqty sheshim qabyldanýǵa tiis. Men buǵan deiin de aittym: Úkimet bul máseleni depýtattarmen jáne sarapshylarmen egjei-tegjeili talqylaýy kerek. Búgin aitylǵan oi-pikirler de eskeriledi. Memleketke barynsha ońtaily sheshim qajet. Iaǵni bir jaǵynan biznes júrgizýge kedergi keltirmei, qolaily jaǵdai jasaityn, al ekinshi jaǵynan, salyqqa qatysty tártipti kúsheitip, biýdjet kirisin arttyratyn tiimdi joldy tabýymyz qajet", – dedi Qasym-Jomart Toqaev.
Búǵan deiin kásipkerler birlesken otyrys ótkizip, onyń qorytyndysy boiynsha qosymsha qun salyǵynyń 20 paiyzǵa kóterilýine qarsy ekendikterin jariialaǵan.
