بۇل تۋرالى جاستار جىلىنىڭ جابىلۋ جانە ۆولونتەر جىلىنىڭ اشىلۋ سالتاناتىندا پرەزيدەنت قاسىم-جومارت توقايەۆ ايتتى، دەپ حابارلايدى Dalanews.kz.
«ەلىمىزدىڭ ءار تۇپكىرىنەن كەلگەن جاستار استانا تورىندە، نۇر-سۇلتان قالاسىندا باس قوستى. سىزدەرمەن تاۋەلسىزدىك كۇنى قارساڭىزدا كەزدەسىپ وتىرمىز. ءبىز ءۇشىن بۇدان اسقان قاستەرلى مەرەكە جوق. بارشاڭىزدى تاۋەلسىزدىك كۇنىمەن قۇتتىقتايمىن. ەگەمەندىگىمىزدى نىعايتىپ، قازاقستاندى ودان ءارى وركەندەتۋ بۇگىنگى تولقىننىڭ بورىشى.
اعا تولقىن سىزدەرگە زور ءۇمىت ارتامىز. ەلىمىزدىڭ بولاشاعى – وزدەرىڭىز. وسى جۇزدەسۋدە ءبىرقاتار جاس ازاماتتار قوعامداعى وزەكتى تاقىرىپتار بويىنشا جاقسى ءسوز سويلەدى. ويلى پىكىرلەر ايتتى. مەن بارشا جاستاردى ماقتان تۇتامىن»، - دەدى مەملەكەت باسشىسى.
قازاقستان پرەزيدەنتى بيىلعى جىلدىڭ ءمان-ماڭىزى ەرەكشە بولعانىن، ەلباسى نۇرسۇلتان نازاربايەۆتىڭ باستاماسىمەن بارشا ەل بولىپ، جاستار جىلىن وتكىزگەنىمىزدى ايتتى.
«ءبارىمىز ءبىلىمدى ءارى باسەكەگە قابىلەتتى ۇرپاق تاربيەلەۋ ىسىنە ايرىقشا ءمان بەرىپ وتىرمىز. جالپى، ەلىمىزدەگى باستامالاردىڭ بارلىعى جاس بۋىننىڭ جارقىن بولاشاعى ءۇشىن قولعا الىندى. جاستارىمىزدىڭ جان-جاقتى دامۋىنا جاعداي جاساۋ – مەنىڭ پرەزيدەنت رەتىندەگى باستى مىندەتتەرىمنىڭ ءبىرى.
سوندىقتان وسى ماسەلە ءاردايىم مەنىڭ نازارىمدا بولادى. بۇگىنگى جاستار – ەلىمىزدى ەرتەڭى، ۇلتىمىزدىڭ بولاشاعى، مەملەكەتىمىزدىڭ مارتەبەسى»، - دەدى قاسىم-جومارت توقايەۆ.
بۇدان بولەك پرەزيدەنت جاستارعا ارنالعان باعدارلامالاردىڭ كوپشىلىگى شاشىراڭقى ەكەنىن، مۇنداي جوبالار جاستارعا ۇعىنىقتى، قاراپايىم جولمەن جاسالۋى كەرەك دەگەن پىكىر ءبىلدىردى.
"جاستارعا ارنالعان "جاسىل ەل"، "ديپلوممەن اۋىلعا"، "جاستار تاجىريبەسى"، "سەرپىن" سەكىلدى باعدارلامالار جۇزەگە اسىپ جاتىر. ولار ءوز تيىمدىلىگىن كورسەتتى دە. الايدا كوپتەگەن جاستار وسى جوبالاردىڭ قۇرىلىمىن جەتە بىلمەيدى. ولاردى بىر-بىرىنەن ايىرا الماي جاتادى.
2020 جىلعا دەيىن وسى باعىتتا ءبىرتۇتاس باعدارلاما ازىرلەۋدى تاپسىرامىن"، – دەدى توقايەۆ.
پرەزيدەنت سونىمەن قاتار مەملەكەتتىڭ ءوز ويىن اشىق ايتاتىن جاستارعا كەدەرگى كەلتىرمەيتىنىن اتاپ ءوتتى.
"بيلىك اركەز جاستاردىڭ پىكىرىنە قۇلاق اسادى. قازاقستان جاستارىنىڭ قوعامداعى ماسەلەلەر بويىنشا ءوز پىكىرى، ءوز كوزقاراسى بار. ولاردىڭ ءوز ويىن اشىق ايتۋىنا ەشقاشان كەدەرگى كەلتىرمەيمىز".
