Bul týraly Jastar jylynyń jabylý jáne Volonter jylynyń ashylý saltanatynda Prezident Qasym-Jomart Toqaev aitty, dep habarlaidy Dalanews.kz.
«Elimizdiń ár túpkirinen kelgen jastar astana tórinde, Nur-Sultan qalasynda bas qosty. Sizdermen Táýelsizdik kúni qarsańyzda kezdesip otyrmyz. Biz úshin budan asqan qasterli mereke joq. Barshańyzdy Táýelsizdik kúnimen quttyqtaimyn. Egemendigimizdi nyǵaityp, Qazaqstandy odan ári órkendetý búgingi tolqynnyń boryshy.
Aǵa tolqyn sizderge zor úmit artamyz. Elimizdiń bolashaǵy – ózderińiz. Osy júzdesýde birqatar jas azamattar qoǵamdaǵy ózekti taqyryptar boiynsha jaqsy sóz sóiledi. Oily pikirler aitty. Men barsha jastardy maqtan tutamyn», - dedi Memleket basshysy.
Qazaqstan Prezidenti biylǵy jyldyń mán-mańyzy erekshe bolǵanyn, Elbasy Nursultan Nazarbaevtyń bastamasymen barsha el bolyp, jastar jylyn ótkizgenimizdi aitty.
«Bárimiz bilimdi ári básekege qabiletti urpaq tárbieleý isine airyqsha mán berip otyrmyz. Jalpy, elimizdegi bastamalardyń barlyǵy jas býynnyń jarqyn bolashaǵy úshin qolǵa alyndy. Jastarymyzdyń jan-jaqty damýyna jaǵdai jasaý – meniń Prezident retindegi basty mindetterimniń biri.
Sondyqtan osy másele árdaiym meniń nazarymda bolady. Búgingi jastar – elimizdi erteńi, ultymyzdyń bolashaǵy, memleketimizdiń mártebesi», - dedi Qasym-Jomart Toqaev.
Budan bólek Prezident jastarǵa arnalǵan baǵdarlamalardyń kópshiligi shashyrańqy ekenin, mundai jobalar jastarǵa uǵynyqty, qarapaiym jolmen jasalýy kerek degen pikir bildirdi.
"Jastarǵa arnalǵan "Jasyl el", "Diplommen aýylǵa", "Jastar tájiribesi", "Serpin" sekildi baǵdarlamalar júzege asyp jatyr. Olar óz tiimdiligin kórsetti de. Alaida kóptegen jastar osy jobalardyń qurylymyn jete bilmeidi. Olardy bir-birinen aiyra almai jatady.
2020 jylǵa deiin osy baǵytta birtutas baǵdarlama ázirleýdi tapsyramyn", – dedi Toqaev.
Prezident sonymen qatar memlekettiń óz oiyn ashyq aitatyn jastarǵa kedergi keltirmeitinin atap ótti.
"Bilik árkez jastardyń pikirine qulaq asady. Qazaqstan jastarynyń qoǵamdaǵy máseleler boiynsha óz pikiri, óz kózqarasy bar. Olardyń óz oiyn ashyq aitýyna eshqashan kedergi keltirmeimiz".
