پرەزيدەنت سوزىندە قالادا پاتەرلەردىڭ باعاسى تىم جوعارى ەكەنىن اتاپ وتكەن.
"ارينە، ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. ءبىراق، سولاي ەكەن دەپ ەش قارەكەتسىز قول قۋسىرىپ وتىرۋعا بولمايدى. جاستاردىڭ باسپانا الۋىنا جان-جاقتى جاعداي جاساۋ كەرەك. بۇل – مەملەكەتتىڭ باستى مىندەتىنىڭ ءبىرى"، - دەدى توقايەۆ.
مەملەكەت باسشىسى اكىمدىككە جالعا بەرىلەتىن ءتۇرعىن-ۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەر ويلاستىرۋدى تاپسىردى. الايدا ول جالدامالى ۇيلەر تىم قىمباتقا تۇسپەۋى قاجەت ەكەنىن باسا ايتتى.
"ونداي پاتەرلەر، ەڭ الدىمەن، قولجەتىمدى بولۋعا ءتيىس. جالپى، الماتى جاستارى ءۇشىن باسپانالى بولۋ قول جەتپەس ارمان بولماۋى كەرەك. باسىندا باسپاناسى بار جاستاردىڭ ەرتەڭگى كۇنگە دەگەن سەنىمى ارتادى.
قالادا ءتۇرعىن-ۇي تاپشىلىعىن ازايتۋ – اسا ماڭىزدى مىندەت. كەلەسى جىلدان باستاپ ءتۇرعىن-ۇي قۇرىلىسىن جىل سايىن 10 پايىزعا ارتتىرۋ قاجەت.
ارينە، الماتىدا بوس جەر از. بۇل جاعداي قۇرىلىستىڭ قارقىنىن كۇشەيتۋگە كەدەرگى كەلتىرۋى مۇمكىن. سول سەبەپتى، جاڭا جەرلەردى يگەرۋ كەرەك. قالادا 1500-گە جۋىق ەسكى ءۇي بار. شاعىن اۋدانداردا تۇرعان مۇنداي ۇيلەرگە كۇردەلى جوندەۋ جۇرگىزگەن ءجون. ال، جاڭعىرتۋعا كەلمەيتىندەرىن ءسۇرىپ تاستاۋ قاجەت"، - دەدى توقايەۆ.
پرەزيدەنت اكىمدىككە وسى شارۋانى كەزەڭ-كەزەڭىمەن جۇزەگە اسىرۋ ءۇشىن ناقتى جوسپار ازىرلەۋدى تاپسىردى. سونداي-اق ول جاڭعىرتۋ جۇمىستارىنىڭ تۇرعىندارعا قولايسىزدىق تۋدىرماۋ قاجەت ەكەنىن ەسكە سالدى.
