بۇل زاڭدى دا. قارسى تاراپ وسى كۇنگە دەيىن ورىسشا ويلاپ، ورىسشا سويلەپ كەلدى عوي. ولار ەشتەڭەدەن تارشىلىق كورمەدى. الار زاتىن ورىسشا سويلەپ الدى، بارار جەرىنە ورىسشا سويلەپ باردى. ولارعا توڭىرەگى تۇگەل ورىسشا سويلەيتىن كورىندى. جانە بۇل «ءداستۇردىڭ» ءومىر بويى ساقتالارىنا سەنىمدى بولدى.
ءقازاقتىلدى ورتانىڭ تالاپ-مۇددەسى ەسكەرىلمەدى دەمەيمىز، ءبىراق قوعامدىق ومىردە مىنا ءبىز تۇمسىق تىعا الماي وتىرعان سالالار كوپ. كوزىمىز كورىپ ءجۇر. بىرتىندەپ ايتىپ جاتىرمىز. ايتىپ جاتقانىمىز قارسى تاراپتىڭ شىمبايىنا باتىپ جاتىر.
كۇنى كەشە ۇلتشىل مۇحتار تايجان مەن تانىمال ساۋلەتشى نۇرلان تورەحانوۆ داۋلاستى. داۋ نەدەن تۋدى؟
تايجان بىلاي دەدى:
«بيلىككە ءبىر سۇراعىم بار: ويىن-ساۋىق نەمەسە قوعامدىق ورىنداردا قازاق مۋزىكاسى نەگە جوق؟ كەلۋشىلەردىڭ 80-90 پايىزى قازاق، بىردە-بىر قازاق ءانى جوق! قازاق ەستراداسىنا كوز جۇما قاراپ، تەك رەسەيلىك نەمەسە شەتەلدىك اندەردى قويۋ حالىقتى زومبيگە اينالدىرۋ! مەن بارلىق قوعامدىق ورىنداردا، سۋپەرماركەتتەردە، مولداردا، كينوتەاترلاردا، شاڭعى، كونكي تەبەتىن جەرلەردە، ستاديونداردا قازاق مۋزىكاسى، قازاق ەستراداسى، كەم دەگەندە، 80 پايىز ۋاقىتتى الۋى ءۇشىن زاڭ قابىلداۋدى ۇسىنامىن»
بايقاساڭىز، تايجان كوپ قازاقتىڭ ويىنداعى، بالكىم، ايتا الماعان، بالكىم، بايقاي الماي جۇرگەن دۇنيەنى ايتتى. قيىنداتۋدىڭ قاجەتى جوق. تايجاننىڭ تاپقىرلىعى سوندا، ول حالىق تۇسىنە الاتىن، ءقازاقتىلدى ورتا قولدايتىن قاراپايىم دۇنيەنى جازادى.
ءقازاقتىلدى جانە ءورىستىلدى ورتانىڭ دۇنيەتانىمىنداعى كەرەعارلىق وسىندايدا بايقالادى، ءبىراق. قارسى تاراپ قارسى شىقتى بۇعان.
بۇعان ءازىر ماسكەۋدە تۇراتىن نۇرلان تورەحانوۆ دەگەن ساۋلەتشى بىلاي دەپ جاۋاپ قاتىپتى:
«تايجاننىڭ جازعانىن وقىدىم. ەندەشە، بىلاي جاسايىق. بارلىق جەردە قازاق اندەرى وينادى ەكەن، ەندەشە، ەلدىڭ ءبارى شاپان كيىپ ءجۇرسىن. ال مەيرامحانا مەن كافەلەردەگى اس ءمازىرى بەشبارماق، ىرىمشىك پەن قىمىزدان تۇرسىن. ال ءبىز استىمىزداعى كولىكتى اتقا اۋىستىرىپ، كيىز ۇيگە كوشىپ الايىق. مەكتەپتەردىڭ اعىلشىن، ماتەماتيكا پاندەرىن الىپ تاستايىق».
ايتىڭىزشى، سىزدىڭشە، بۇل ەكەۋىنىڭ قايسىسى لاعىپ وتىر؟ كوشەنىڭ تىلىمەن سويلەسەك، قايسىسى قۋىپ كەتتى. بىزدىڭشە، سوڭعىسى.
تايجان بەشبارماق پەن كيىز ءۇي تۋرالى ءتىس جاردى ما؟ جوق. ونىڭ ءسوزىنىڭ ءوڭىن اينالدىرىپ جىبەرگەن تورەحانوۆتىڭ ءوزى.
تايجان اقىلعا سىيمايتىن ۇسىنىس تاستاعان جوق، نەگىزىندە. شىنىمەن، قازاق مۋزىكاسى نەگە قويىلمايدى؟ ورىستىڭ ءانى، شەتەلدىڭ ءانى شىرقالادى ەكەن، ەندەشە، قازاقتىڭ انىنە نەگە ورىن جوق؟
تايجان مەن تورەحانوۆتىڭ ايتىسىندا سوڭعىسى ۇتىلدى. قازاق اۋديتورياسى سانى جاعىنان دا، ساپاسى جاعىنان دا الدەقاشان وسكەن. ءقازاقتىلدى ورتا الەۋمەتتىك جەلىنى تولىقتاي جاۋلاپ العانىن دا كورىپ وتىرمىز. سوڭعىسى، وسىنى ەسكەرمەدى. ءوز قازاعىنان سىن ەستىدى. ءوز قازاعىنىڭ الدىندا ابىرويىن جوعالتتى. بۇل تورەحانوۆقا كەرەك پە ەدى؟ ال قازىرگى ءتۇرىن قاراڭىز. اقتالعان بولىپ، الدەنەلەردى جازىپ جاتىر.
بۇل ءبىزدىڭ تالاپ ەتكەن جانە تالاپ ەتۋگە ءتيىستى دۇنيەلەرىمىزدىڭ باسى عانا. قارسى تاراپ ءالى تالاي شىرىلدايدى. سەبەبى، ولار وسى كۇنگە دەيىن قارسىلىققا ۇشىراعان جوق. ءقازاقتىلدى ورتانىڭ كوزى اشىلادى دەپ ويلامادى. سولاي عوي؟!
ءوز تاراپىمىزدان ءبىز دە ۇسىنىس ايتايىق. ەلىمىزدەگى راديولاردا (ەۋروپا پليۋس، Love راديو) كۇندىزگى ۋاقىتتا قازاق اندەرى نەگە قويىلمايدى؟ ولار ورىس پەن شەتەلدىڭ ءانىن شىرقاتادى ەكەن، ەندەشە، قايرات نۇرتاس پەن تورەعاليعا دا ورىن بەرسىن؟ نەگە قازاق اندەرى تۇنگى ساعات 12-دەن باستاپ قويىلۋى ءتيىس؟ بۇل نە؟ قازاقتار كوز ىلمەيدى دەگەنى مە؟ ايتپاقشى، بۇعان تورەحانوۆ نە دەر ەكەن؟
دۋمان بىقاي
