شارانى ەل تاۋەلسىزدىگىنىڭ 30 جىلدىعى وراي شقو جاستار رەسۋرستىق ورتالىعى ۇيىمداستىرعانىن ايتا كەتۋىمىز كەرەك. باسقوسۋعا شقو-نىڭ بەلسەندى جاستارى قاتسىپ، كوكەيدە جۇرگەن ويلارىن ورتاعا سالدى. وسى رەتتە شارانى ۇيىمداستىرۋشىلار دوڭگەلەك ۇستەلدى تاۋەلسىزدىكتىڭ 30 جىلدىعىندا ەلىمىزدىڭ جەتكەن جەتىستىگىن ساراپتاۋ، جاستار اراسىندا ۇلتتىق مۇرالارىمىزدى ناسيحاتتاۋ، جاسوسپىرىمدەر اراسىندا وتانسۇيگىشتىك سەزىمدى قالىپتاستىرۋ ءۇشىن ۇيىمداستىرعاندارىن العا تارتتى.
دوڭگەلەك ۇستەل بارىسىندا ءسوز العان شقو جاستار رەسۋرستىق ورتالعىنىڭ جەتەكشىسى ارايلىم ەسىمبەكوۆا تاۋەلسىزدىك ەلىمىزدىڭ وسىپ-وركەندەۋىنە نەگىز بولعانىن ايتا كەلە، ەلباسى نۇرسۇلتان نازاربايەۆتىڭ كورەگەندى ساياساتىنىڭ ارقاسىندا جاستارعا زور مۇمكىندىك ۇستانعان، قارقىندى دامۋعا بەت العان مەملەكەتتىك ىرگە تاسى قالانعانىن اتاپ ءوتتى.
– ماعان كەيبىر ادامدار «بارلىق جەردە جاستاردى قولداپ، ولاردى نەگە ماراپاتتاپ جاتادى» دەپ ءجيى سۇرايدى. بۇل سۇراققا ءوز باسىم «ويتكەنى، ءبىزدىڭ مەملەكەتىمىزدىڭ بولاشاعى جاستاردىڭ قولىندا» دەپ جاۋاپ بەرەمىن. بۇگىندە جاستاردى قولداۋ، ولاردىڭ الەۋمەتتىك ماسەلەسىن شەشۋى، الاڭسىز ءبىلىم الۋىن قامتاماسىز ەتۋ مەملەكەتتىك ساياساتتىڭ باسىم باعىتتارىنىڭ ءبىرى. وسىنداي ساياسات جۇرگىزىپ وتىرعان ەلدىڭ بولاشاعى جارقىن بولاتىنى ءسوزسىز، – دەدى ارايلىم ەسىمبەكوۆا.
دوڭگەلەك ۇستەل بارىسىندا جاستار ءوز ويلارىن ورتاعا سالىپ، ەل تاۋەلسىزدىگىن نىعايتۋ ءۇشىن نە ىستەۋ كەرەك ەكەنىن ايتتى. جاستار جان-جاقتى ءبىلىم الىپ، قازاقستاننىڭ مەملەكەتتىگىن نىعايتۋعا باعىتتاۋدىڭ ماڭىزى زور ەكەنىن تىلگە تيەك ەتتى. ءوز كەزەگىندە س.امانجولوۆ اتىنداعى شقو مەملەكەتتىك ۋنيۆەرسيتەتىنىڭ تۇلەگى، ۆولونتەر ۇلان كوشەرباي «بىزدەر مەملەكەتىمىزگە قانداي پايدامىزدى تيگىزەمىز دەپ ۇدايى ويلانۋىمىز كەرەك. ويتكەنى ءدال ءقازىر بىزدە مۇمكىندىك تە، ۋاقىت تا بار» دەدى.
جيىن سوڭىندا وسكەمەن قالاسىنداعى ۇزدىك ۆولونتەرلەر انىقتالىپ، ماراپاتتالدى.
