اباي وبلىسىنىڭ اكىمى بەرىك ءۋالي اۋدانعا ساپارى بارىسىندا تاسكەسكەن اۋىلىنداعى ءبىرقاتار نىسانداردىڭ جۇمىسىمەن تانىستى،– دەپ حابارلايدى Dalanews.kz 

ايماق باسشىسى ەلدى مەكەندەگى ساپارىن جەرگىلىكتى تۇرعىندارمەن بىرگە شىرشا كوشەتتەرىن وتىرعىزۋدان باستادى.

تاسكەسكەن اۋىلىنداعى سپورتتىق ساۋىقتىرۋ كەشەنى 2024 جىلى اشىلعان. ءقازىر مۇندا 90 بالا سپورتتىڭ ءۇش تۇرىمەن (گرەك-ريم، فۋتبول، بوكس) شۇعىلدانادى. عيمارات اۋماعىندا فۋتبول الاڭى بار.

وبلىس اكىمىنە تاسكەسكەندە جەكە ينۆەستورلار ەسەبىنەن سالىناتىن جوبالار تانىستىرىلدى. وسى ەلدى مەكەننىڭ تۋماسى، بەلگىلى مەسەنات تالعات ساقان اۋىلدا 100 ورىندىق قوعامدىق ساۋىقتىرۋ ورتالىعى مەن ءدال وسىنشا ورىندىق بالاباقشا سالۋدى جوسپارلاپ وتىر. قوعامدىق ساۋىقتىرۋ ورتالىعىنىڭ قۇرىلىسى باستالىپ كەتكەن. ەلدى مەكەندە بالاباقشاعا سۇرانىس بار. 90-عا جۋىق بالا بالاباقشا كەزەگىندە تۇر.

ايماق باسشىسى تاسكەسكەن اۋىلىندا ەلدى مەكەننىڭ اقساقالدارىمەن كەزدەسىپ، ۇسىنىس-پىكىرلەرىن تىڭدادى.

وبلىس اكىمى بۇرىن اۋدان ورتالىعى بولعان تاسكەسكەندى دامىتۋ باعىتىنداعى شارالار جالعاساتىنىن ايتتى.

«تاسكەسكەندە اۋقىمدى جۇمىس اتقارىلىپ جاتىر ەكەن. مەملەكەتتىڭ كومەگىنەن بولەك كاسىپكەر ازاماتتار تۋعان جەرىنە قول ۇشىن سوزىپ جۇرگەنى قۋانتادى. بيزنەستىڭ الەۋمەتتىك جاۋاپكەرشىلىگى اياسىندا اۋىلدا بالاباقشا سالىنادى. وسى باعىتتاعى جۇمىستى جالعاستىرۋ كەرەك. تاسكەسكەن – ءۇرجار اۋدانىنداعى ەڭ ءىرى اۋىلداردىڭ ءبىرى. ءبىز بۇرىن اۋدان ورتالىعى بولعان ەلدى مەكەندەردىڭ دامۋىن ءاردايىم نازاردا ۇستاپ وتىراتىن بولامىز»، - دەدى ايماق باسشىسى.