قاسكويلەر "قازاقستان حالىق بانكى" اكسيونەرلىك قوعامىنىڭ ەنشىلەسى - Tenge Bankء-تىڭ تاشكەنتتەگى فيليالىنان 90 مىڭ دوللار ۇرلاعان، دەپ حابارلايدى Dalanews.kz Kazinform اگەنتتىگىنە سىلتەمە جاساپ.
وزبەكستان ىشكى ىستەر مينيسترلىگىنىڭ مالىمەتىنە سايكەس، قۇقىق قورعاۋ ورگاندارىنا اقشا ۇرلىعى تۋرالى ارىز بيىل ماۋسىم ايىندا تۇسكەن. تەرگەۋ بارىسىندا انىقتالعانداي، الاياقتار POS-تەرمينالعا جالعان دەرەكتەردى ەنگىزگەن، كەيىن بانككە بارىپ، 90 مىڭ دوللاردى قولما-قول الىپ كەتكەن.
ىشكى ىستەر باسقارماسىنىڭ قىزمەتكەرلەرى اقشا ۇرلادى دەگەن كۇدىكپەن 9 ادامدى ۇستادى. قولعا تۇسكەندەردىڭ ءبىرى مۇنداي الاياقتىق سحەمانى Telegram ارنالارى ارقىلى تاۋىپ، ونى تولىق زەرتتەگەنىن ايتتى. تيىسىنشە، جوسپاردى ىسكە اسىرۋ ءۇشىن ولار بانك قىزمەتكەرىمەن ءسوز بايلاسىپ، ونىڭ كومەگىمەن باعدارلامانى جەتىلدىرە تۇسكەن.
مينسترلىكتىڭ باسپا ءسوز قىزمەتىنەن ءمالىم ەتكەندەي، ۇستالعانداردان 12 ۇيالى تەلەفون، POS-تەرمينال جانە 36،5 مىڭ دوللار تاركىلەنگەن.
ايتا كەتسەك، وزبەكستاندا جۇمىس ىستەيتىن Tenge Bank 100% "قازاقستان حالىق بانكى" اكسيونەرلىك قوعامىنىڭ ەنشىلەس كومپانياسى بولىپ سانالادى. ول تاشكەنتتەگى قىزمەتىن 2019 جىلى باستاعان.
بۇعان دەيىن سايتىمىزدا "پاريجدەگى تۇزاق: وزبەك بانكيرى قىلمىس الەمىنىڭ سەركەسىمەن قالاي بەتپە-بەت كەلدى؟" دەگەن ماقالا جاريالانعان بولاتىن.
