ۆەتنامنان ەكاتەرينبۋرگكە بەت العان ونداعان جولاۋشى تاراز اۋەجايىنىڭ ترانزيتتىك ايماعىندا قالىپ قويدى. جوسپارلانعان تەحنيكالىق ايالداما ءبىر تاۋلىككە جۋىق ۋاقىتقا سوزىلعان، دەپ حابارلايدى Dalanews.kz.

Tengrinews رەداكسياسىنىڭ بايلانىس نومىرىنە جولاۋشىلاردىڭ ءبىرى حابارلاسقان. ونىڭ ايتۋىنشا، SCAT اۋە كومپانياسىنىڭ ۇشاعى تارازعا جوسپارلى جانارماي قۇيۋ ءۇشىن قونعان. الايدا كوزدەلگەن ءبىر ساعاتتىڭ ورنىنا جولاۋشىلار «تازا ايماقتا» شامامەن ءبىر تاۋلىككە جۋىق، 18 ساعاتتان استام ۋاقىت وتكىزۋگە ءماجبۇر بولعان.

جولاۋشىنىڭ سوزىنشە، رەيس بىرنەشە رەت كەيىنگە شەگەرىلگەن: اۋەلى ءبىر ساعاتقا، كەيىن تاعى بىرنەشە مارتە. الايدا اۋە كومپانيا وكىلدەرى كىدىرىستىڭ ناقتى سەبەبىن تۇسىندىرە الماعان. سونىمەن قاتار تاسىمالداۋشىنىڭ call-ورتالىعى دا قولجەتىمسىز بولعان.

«تۇتاس ءبىر ۇشاقتاعى جولاۋشىلار تاراز اۋەجايىندا تۇرىپ قالدى. 14 ساعاتتان استام ۋاقىت بويى بىزگە تەك “ءبىز ەشتەڭە بىلمەيمىز” دەگەن جاۋاپ قانا ايتىلىپ كەلەدى. بايلانىس جوق. كومپانيا وكىلدەرى ءبىزدى اقپاراتسىز، كومەكسىز اۋەجاي عيماراتىندا قالدىرىپ كەتتى»، - دەدى رەسەي ازاماتى.

اۋە كومپانياسىنىڭ باسپا ءسوز قىزمەتى ۇزاق كىدىرىس بولعانىن راستادى جانە ونىڭ تەحنيكالىق سەبەپتەرگە بايلانىستى ەكەنىن حابارلاعان. 

«2026 جىلعى 20 قاڭتاردا ورىندالعان فۋكۋوك – تاراز – ەكاتەرينبۋرگ باعىتى بويىنشا VSV5322/451 چارتەرلىك رەيس كەشىكتىرىلدى. ۇشاقتى ۇشۋعا دايىنداۋ بارىسىندا قوسىمشا تەحنيكالىق قىزمەت كورسەتۋ قاجەتتىلىگى انىقتالدى»، - دەپ ءتۇسىندىردى تاسىمالداۋشى.

كومپانيا وكىلدەرى جولاۋشىلاردىڭ جايلىلىعى ءۇشىن بارلىق قاجەتتى شارالار قابىلدانعانىن اتاپ ءوتتى.