الەۋمەتتىك جەلى مەن ءبىرقاتار باق-تا استانادا تانىمال ءانشى مارجان اراپبايەۆاعا شابۋىل جاسالعانى تۋرالى اقپارات تارادى، دەپ حابارلايدى Dalanews.kz.
جاريالانعان مالىمەتكە سۇيەنسەك، وقيعا قاڭتاردىڭ باسىندا قوعامدىق ورىندا بولعان. سونىمەن قاتار، جازبادا بۇل ىسكە ءانشىنىڭ ازاماتتىق جۇبايىنىڭ قاتىسى بولۋى مۇمكىن دەگەن بولجام ايتىلدى.
پوليسيانىڭ مالىمەتىنشە، قوعامدىق ورىندا بالاعات سوزدەر ايتىپ، ۇساق بۇزاقىلىق جاساعانى ءۇشىن 43 جاستاعى ەلوردا تۇرعىنى اكىمشىلىك جاۋاپكەرشىلىككە تارتىلعان.
"قوعامدىق ورىندا بەيادەپ سوزدەر قولدانۋ دەرەگى بويىنشا ەلوردا تۇرعىنى جاۋاپقا تارتىلدى. سونىمەن قاتار، تۇرعىن ءۇي اۋلاسىندا ازاماتتىق جۇبايىمەن اراداعى جانجال كەزىندە ايەلگە كۇش قولدانعانى انىقتالدى"، – دەپ مالىمدەدى پوليسيا وكىلدەرى.
بۇدان بولەك، ەر ادامعا قاتىستى دەنە جاراقاتىن كەلتىرۋ دەرەگى بويىنشا بولەك ارىز تىركەلگەن.
اكىمشىلىك ءىس سوتتا قارالىپ، ەر ادام اكىمشىلىك قۇقىقبۇزۋشىلىق تۋرالى كودەكستىڭ 434-بابى، 1-بولىگى بويىنشا 10 تاۋلىككە اكىمشىلىك قاماۋعا الىنعان.
پوليسيا تەرگەۋ جالعاسىپ، وقيعانىڭ بارلىق ءمان-جايى انىقتالىپ جاتقانىن جەتكىزدى.
سونىمەن قاتار، Tengrinews.kz مارجان اراپبايەۆانىڭ مەنەدجمەنتىمەن بايلانىسقا شىققان. ءانشىنىڭ وكىلى ونىڭ جۇبايى ۇستالدى دەگەن اقپاراتتى جوققا شىعارعان.
"بۇل اقپارات شىندىققا جاناسپايدى"، – دەدى ءانشىنىڭ وكىلى.
