ءبىر توپ بۇزاقىنىڭ قولىنان اجال قۇشقان شەرزات بولاتتىڭ ءىسى بويىنشا جابىرلەنۋشى تاراپتىڭ قورعاۋشىسى سايدا تاۋەكەلوۆا قازاقستاندىقتارعا ۇندەۋ جاسادى، دەپ حابارلايدى Dalanews.kz.
ول كوپشىلىكتەن مارقۇم شەرزاتتىڭ وتباسىن جايىنا قالدىرۋدى سۇرادى.
"سوڭعى كەزدەرى الەۋمەتتىك جەلىلەردە ءوز مۇددەلەرىن كوزدەگەن بلوگەرلەر شەرزاتتىڭ ولىمىنە قاتىستى ءىس بويىنشا سوتتىڭ اشىق ءوتۋىن تالاپ ەتىپ، اشىق مالىمدەمەلەرمەن جوعارعى ورگاندارعا جۇگىنۋدە. ادۆوكاتتار مەن جابىرلەنۋشىلەردىڭ وكىلدەرى سوت پروسەسىن اشىق وتكىزۋدى ءاۋ باستان قولداعانىن جانە بۇل تۋرالى ءوتىنىش بەرۋگە نيەتتى ەكەنىن بەلسەندى تۇردە مالىمدەگەنىن تۇسىندىرگىمىز كەلەدى. پروكۋراتۋرا دا بۇل ۇستانىمدى قولدادى، ءورت قويۋ فاكتىسى بويىنشا تەرگەۋدى ارنايى جاساق تولىعىمەن جۇرگىزىپ جاتىر. ءىس بويىنشا بارلىق شارالار، سونىڭ ىشىندە ءۇيدى ورتەۋ فاكتىسى بويىنشا تەرگەۋ جۇمىستارى قارقىندى جۇرگىزىلۋدە"، – دەيدى قورعاۋشىسى.
سونىمەن قاتار تاراتىلىپ جاتقان جالعان اقپاراتتار تەرگەۋ جۇمىستارىن تەجەيتىنىن اتاپ ءوتتى.
"بۇل ءىس بويىنشا قوعامدىق تالقىلاۋ مەن جالعان اقپاراتتىڭ تارالۋى تەرگەۋگە كەدەرگى كەلتىرىپ قانا قويماي، ورنى تولماس قايعىعا ۇشىراعان وتباسىعا اۋىر تيۋدە. بلوگەرلەردەن وتباسى شەكاراسىن قۇرمەتتەۋدى جانە تەرگەۋ ورگاندارىنا ءوز جۇمىسىن كاسىبي جانە وبەكتيۆتى تۇردە اياقتاۋعا مۇمكىندىك بەرۋدى سۇرايمىز! سونىمەن قاتار بلوگەرلەر مەن جۇرتشىلىقتىڭ نازارىنا شەرزاتتىڭ اتا-اناسى مەن ونىڭ اعاسى ءىس بويىنشا جابىرلەنۋشى رەتىندە تانىلعانىن ايتامىز! قالعان تۋىستارى قىلمىستىق ءىس ماتەريالدارىنا قول جەتكىزە المايدى، سوندىقتان ولاردىڭ ايتقاندارىنىڭ ءبارى – ولاردىڭ سۋبەكتيۆتى قابىلداۋى.
قۇرمەت، جاۋاپكەرشىلىك جانە قولداۋ – ءقازىر شەرزاتتىڭ وتباسىنا قاجەت نارسە”، - دەدى ول.
زاڭگەردىڭ ايتۋىنشا، جابىرلەنۋشى تاراپتىڭ باسپانا ماسەلەسى دە قالىس قالىپ جاتقان جوق.
“قورىتىندىلاي كەلە، تۇرعىن ءۇي ماسەلەسى بويىنشا قارجىلىق قولداۋ ماسەلەسى ءقازىر شەشىلۋدە، شەرزاتتىڭ وتباسىنا پسيحولوگيالىق كومەك كورسەتىلۋدە جانە بالالار قاجەتتى زاتتارمەن قامتاماسىز ەتىلدى. ورنى تولماس قايعى تۋرالى اقپارات تاراتۋدى دوعارىڭىز! ءبىز بارشا قازاقستاندىقتارعا قولداۋ بىلدىرگەنى ءۇشىن العىس ايتامىز، ءبىراق ءقازىر تەرگەۋ جالعان جولمەن ءجۇرىپ جاتىر دەپ ەسەپتەۋگە ەشقانداي العىشارت جوق!"، – دەيدى ول.
ايتا كەتەيىك، كۇنى كەشە مارقۇم شەرزات بولاتتىڭ جاقىندارى توقايەۆقا ۇندەۋ جاساعان ەدى. ولار مەملەكەت باسشىسىنان اشىق سوتتىڭ بولۋىن تالاپ ەتكەن بولاتىن.
“اشىق سوت بولماسا، ءىستىڭ بۇرمالانىپ كەتەتىنىنە ءجۇز پايىز سەنىمدىمىن. قورقىپ وتىرعانىمىز دا - سول. سول سەبەپتى ۇندەۋ جاساپ جاتىرمىز. جاڭا قازاقستاننىڭ زايىرلى مەملەكەت ەكەنىن دالەلدەيتىن اشىق سوت بولۋىنا مۇمكىندىك بەرسە دەيمىز”، - دەگەن ەدى شەرزاتتىڭ اپكەسى.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
15 قازاندا ىشكى ىستەر ۆيسە-مينيسترى تاعى ءۇش كۇدىكتىنى ۇستاعانىن ءمالىم ەتتى.
ال 18 قازاندا تاعى ءبىر كۇدىكتىنى قولعا ءتۇسىردى.
سونىمەن قاتار، الماتى وبلىستىق پوليسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.
ودان كەيىن شەرزاتتىڭ ۇيىنە كۇزەت قويىلدى.
كوپ ۇزاماي مارقۇم شەرزاتتىڭ ءۇيى ورتەندى.
